Amăng lan sang păng bơbung hăng tôl ƀơi tơring kual Đăk Tô, tơring glông Đăk Tô (tơring čar Kon Tum), mơnuih rơgơi kơhnâo A Huyền atông sa tơlơi adôh hmư̆ hăng juăt hmư̆ anun lĕ “Tiếng chày trên sóc Bom Bo” hăng đing trơng yua ñu pơkra rai. Dua gah tơngan rơmoăn rơmĕ atông tui yŭ adôh tui tơlơi adôh anai, A Huyền bơră ruai glăi pran hor mơng ñu hăng gông brô̆ mơng djuai ania pô, amăng anun đing trơng arăng lăng kar hăng gông brô̆ yôm ƀơi kual Dap kơdư.

“Đing trơng anai lĕ pơkra tui rơnuk phrâo, dưi atông hơdôm tơlơi adôh đưm, tơlơi adôh sô hơđăp hăng tơlơi adôh phrâo ră anai. Kiăng pơkra rai đing trơng anai ăt glêh glar mơng, ta kiăng hyu ĕp djrao kah dưi pơkra rai đing trơng, anun kiăng mut nao ataih amăng glai rưng, tơdơi anun koh ba glăi đing djrao tui tơlơi kiăng, phang ƀơi apui kiăng djrao krô hăng kjăp tui ta kiăng. Kiăng đing djrao dưi atông mơñi djơ̆, ta kiăng trơ̆i đing djơ̆ hăng er mơñi ta kiăng, đing glông lĕ hmư̆ er hơtai, bơ đing ber ta hmư̆ ñu djal”.

Ƀu djơ̆ kơnong pơkra đing trơng đôč ôh mơ̆, A Huyền ăt djă pioh hăng pơkra gông pơtâo-sa djuai gông brô̆ sui mơng đưm hlâo ƀơi kual Dap kơdư. Hơdôm boh pơtâo duñ glăi mơng čroh ia, tơdơi anun A Huyền pơkra jing gông pơtâo, atông hmư̆ mơ-ak biă mă, lăng krêh krơh mơ̆ ăt yôm biă mă mơn, kar hăng jua mơñi mơng glai čư̆. Mơnuih rơgơi kơhnâo A Huyền brơi thâo, mơng dŏ anet, pran jua ñu hơmâo “rông ba” hăng hơdôm jua mơñi mơng hơdôm djuai gông brô̆ djuai ania anun lĕ đing trơng, đing K’lông put, gông pơtâo, čing hơgor mơng djuai ania Sêdang. Yua anun, tơdơi kơ hrăm giong sang hră gưl prong Gru grua adôh suang ling tơhan ƀơi Hà Nội, ñu pot glăi pơ plơi pla Đăk Tô, Kon Tum, A Huyền trăm ñu pô amăng hơdôm hrơi ngui ngor, pơčeh pơkra rai lu djuai gông brô̆ mơng djuai ania pô. Rơngiao kơ bruă pơkra gông brô̆ mơng A Huyền ăt hyu atông amăng hơdôm hrơi ngui ngor pơprong amăng ƀon lan ƀơi kual Dap kơdư, hyu atông ƀơi Plơi gru grua-tuai čuă ngui djop djuai ania Việt Nam (Đồng Mô, Sơn Tây, Hà Nội).

“Kâo mut hrŏm lu jơlan hơdră ngui ngor pơprong anun lĕ jơlan hơdră ngui sang čơ sâm Ngọc Linh. Kâo ăt nao atông lu anih anun lĕ Hà Nội, Sài Gòn hăng Đà Nẵng. Mut hrŏm jơlan hơdră anai kâo ăt hơmâo arăng ƀơk brơi hră pơpŭ anun lĕ “Mơnuih djă bơngač gông brô̆, djă pioh gru grua plơi pla mơng djuai ania pô” hơmâo jao miđai ia mah hăng hră pơpŭ lơm kâo nao atông gông brô̆ pơ Sài Gòn”.

Ƀu djơ̆ kơnong pơkra gông brô̆ djuai ania pô đôč ôh mơ̆ A Huyền lêng abih pran jua hăng bruă pơtô glăi ƀing čơđai sang hră hăng rơnuk tơdơi. Phrâo anai, anom bruă gru grua hăng pôr pơhing tơring glông Đăk Tô (Kon Tum) gum hrŏm hăng Jơnum min mơnuih ƀôn sang tơring kual Đăk Tô pok anih pơtô čing hơgor, ayun suang hăng gông brô̆ djuai ania brơi ƀing hlăk ai. Mơnuih rơgơi kơhnâo A Huyền hơmâo pơtô brơi 30 čô hlăk ai.

“Kiăng dưi atông đing trơng, ta kiăng pơtop hrăm na nao tơhrơi kah hăng mlăm, ƀing kiăo tui hrăm ƀơi anai, ƀing gơñu hrăm 3 truh pơ 4 blan kah dưi atông đing trơng, ƀing čơđai hor biă mă, atông lu wŏt jua đing trơng amra kơđŏm amăng pran jua, amăng akŏ dlô pran jua ƀing gơñu. Ră anai, ƀing kiăo tui hrăm yua A Huyền pơtô lĕ ƀing čơđai sang hră hơmâo mơng anih 4, anih 7, 9 hăng 10”.

Hăng pran khăp biă mă hăng gông brô̆ djuai ania pô, yua anun A Huyền ăt dŏ pơmĭn nao kơ bruă rơngiă tui ƀơƀrư̆ gru grua hiam mơng djuai ania pô. Tơlơi hơdip ră anai hăng lu boh thâo phrâo, plang mơnuih mơnam hăng hơdôm tơlơi ngui phrâo ngă ƀing hlăk ai ataih mơng tơlơi ngui ngor amăng plơi pla anun lĕ atông čing hơgor hăng lu djuai gông brô̆ djuai ania. Yua anun, mơnuih rơgơi kơhnâo A Huyền gir run ba ƀing gơñu pot glăi hăng plơi pla, djru brơi rơnuk hlăk ai hluh rơđah hăng jai hor gru grua djuai ania pô.

“Yua kâo ƀuh ră anai ƀing tha rơma thâo pĕ gông brô̆ djuai ania pô dŏ aset biă mă, yua anun kâo pơmĭn kiăng tŏ tui hăng pơtô brơi rơnuk hlăk ai čơđai, pơtô brơi rơnuk tơdơi thâo anai lĕ gông brô̆ gru grua djuai ania pô, ƀing ta kiăng pơđĭ kyar, kiăng gơyut gơyâo amăng lŏn ia hăng tač rơngiao thâo lu dong kơ gru grua ƀing ta, gông brô̆ mơng djuai ania ta”.

Ƀing ta dưi lăi, A Huyền lĕ sa čô mơnuih kơhnâo kơhnăk ba gru amăng bruă pơkra hăng pơtô glăi gông brô̆ djuai ania Sêdang ƀơi tơring glông Đăk Tô, tơring čar Kon Tum. Hơdôm tơlơi gum pơgôp mơng A Huyền ƀu djơ̆ kơnong ngă yôm tui gru grua djuai ania Sêdang đôč ôh mơ̆ ăt ngă gông brô̆ kual Dap kơdư jai hrơi hơmâo lu mơnuih hor hăng pơpŭ lăng yôm./.