A Riêu Âr Pục ƀu kơnong jing tơlơi ngui ngor đôč ôh mơ̆ng djuai ania Pa Cô. Anai ăt jing tơlơi găl hơmâo pơsit hăng tơlơi kơdrưh, tơlơi rơgơi mơ̆ng ƀing tha plơi, hăng hơdôm tơlơi phiăn mơ̆ng ơi yă đưm. Hlâo kơ hrơi hơmâo tơlơi phiăn mơ̆ng Kơnuk kơna, sit tơlơi phiăn anun yơh ngă hơđong, ngă bơmơak, phat brơi kơđi dơnô mơnuih ƀôn sang. Tui hăng tơlơi pơmin mơ̆ng djuai ania Pa Cô, hơdôm bruă ƀu mơak, kơđi tơlơi sui mơ̆ng hơdôm sang anŏ tơdah ƀu thâo pơsir mă ôh jing arăng iâu tha nao bơyai. Lơ̆m anun, tơlơi ngui ngor A Riêu Âr Pục hơmâo pơphun kar hăng mông phat kơđi prong biă amăng plơi. Tha plơi Lê Tuấn Mõ, plơi Kê Ré, să A Lưới 3 brơi thâo, tơlơi jơnum ngui anai hơmâo pơphun či bơyai kơđi amăng tơlơi hơdip mơda mơnuih ƀôn sang.

“Tơlơi jơnum ngui Âr Pục tal anai či pơsir hĭ hơdôm tơlơi bơrơdjơ̆ pơrơsao mơ̆ng neh met wa, biă ñu ƀu djơ̆ kơnong amăng bruă pơkhăp rơkơi bơnai, pơhor tơdăm dra đôč ôh, ăt pơsir bruă bơrơsua lŏn tơnah, sang dŏ...Hơdôm tơlơi ƀu mơak mơ̆ sang anŏ ƀu thâo pơsir mă pô, jing arăng iâu tha amăng plơi, iâu mơnuih pơ plơi pơkŏn dong či pơčrông, bơrơƀih, laih anun pơsir hĭ kơđi dơnô”.

Tơlơi pơjing anŏ phara mơ̆ng A Riêu Âr Pục sit anŏ tơpă, ƀu hơmâo gum kơ pô hlơi drơi hơpă ôh. Ƀu kơnong ƀing tha plơi amăng plơi đôč ôh, hơmâo tom hăng tha plơi pơ plơi pơkŏn dong ăt hơmâo iâu nao hmư̆ kơđi mơn. Sa čô mơnuih ană plơi kơnang, ƀu bơdjơ̆ nao kơđi ôh, arăng iâu ngă pô bơyai brơi, pơhlom hiăp tơpă đôč kơ hơdôm bơnah.

Tơlơi jơnum ngui anai hơmâo lu bruă mơn. Mơ̆ng bruă prăp rơmet gơnam, iâu ƀing tha plơi, truh kơ bruă rôk ruai, pơblang brơi. Ƀing nao pơhmư̆ lăi pơthâo tơlơi pơmin mơ̆ng ƀing gơñu, boh pơhiăp djơ̆ găl, ƀơi anŏ ñu hiăp rŏ hăng arăng adoh pơtưh. Tơdơi kơ hmư̆ djŏp tơlơi pơgôp hiăp, ƀing tha yơh pô pơsit brơi tuč rơnuč ñu.

Tơlơi yom hloh mơ̆ng hrơi bơyai kơđi A Riêu Âr Pục ƀu djơ̆ či đô̆ wă hơget ôh, phuñ ñu lĕ kiăng bơmơak brơi. Amăng tơlơi pơtô pơblang mơ̆ng tha plơi ñu hơmâo anŏ djơ̆, anŏ găl, ngă hyŭ pran jua, hơmâo anŏ thâo pap brơi tơlơi soh, thâo añ ƀiă, thâo lăng ba mơnuih tơpuôl ƀiă. Yua hloh kơ anun, tơlơi mơ̆ djuai ania Pa Cô kiăng lĕ bong kjăp tơlơi gum pơgôp amăng plơi pla.

Tơdơi kơ hơdôm bơnah tŭ ư yơh hăng tơlơi tha phat kơđi, anai arăng kôl gang yơh. Lơ̆m aka ƀu hơmâo boh hră, djuai ania Pa Cô mă đing kram anet či mă gai djai hiăp. Hơdôm ƀĕ đing kram anun jing pơ ala brơi tơlơi ƀuăn, tơlơi pơhiăp tơpă sit, tơlơi gơgrong hăng pran jua đăo kơnang hăng mơnuih ƀôn sang.

Rơnuk anai, hrŏm hăng gir djă pioh gru grua đưm, tơlơi jơnum ngui A Riêu Âr Pục hơmâo rŭ pơdong glăi, ba pơƀuh djŏp anih. Mơnuih kơhnâo gru đưm Hồ Thị Tư brơi thâo, bruă rŭ glăi tơlơi phiăn anai ƀu kơnong djă pioh gru grua gơnam yom mơ̆ng djuai ania Pa Cô đôč ôh ăt djru ba ƀing tuai hăng rơnuk čơđai thâo hluh anŏ yom, anŏ hiam, tơlơi găl, hăng hơdip gum pơgôp amăng plơi pla hơmâo djă pioh tui lu rơnuk.

“Bruă pơƀuh glăi tơlơi ngui Âr Pục mơ̆ng djuai ania Pa Cô či pơƀuh anŏ yom gru ama grua amĭ djă tơlơi phiăn đưm kơ ƀing tuai mơ̆ng ataih ăt kah hăng ƀing čơđai amăng plơi pla ñu thâo. Jing tơdơi kơ tơlơi jơnum ngui anai, gơñu thâo hluh anŏ yom mơ̆ng tơlơi pơmin thâo khăp ƀu-eng”.

Mah tơlơi hơdip rơnuk anai pơplih lu laih, samơ̆ anŏ hiam akŏ phun mơ̆ng A Riêu Âr Pục ăt hơmâo neh met wa Pa Cô djă pioh. Anun ƀu djơ̆ kơnong kơ tơlơi phiăn ƀudah mông bơyai kơđi rôk ruai đôč ôh, ñu pơsit brơi pran jua hơdip kiăo tui tơlơi djơ̆, tơlơi găl, tơlơi gum pơgôp hăng pran jua thâo khăp pap mơ̆ng lu rơnuk ƀơi čư̆ siăng Trường Sơn./.