Hrơi jơnum ngui yua Ding jum gru grua - bơkjăp drơi jăn hăng tuai čuă ngui ngă hrŏm hăng Jơnum min mơnuih ƀôn sang tơring čar Khánh Hoà pơphun, hơmâo rơbêh 1.000 čô kơhnâo, adoh suang, ngă sen, mơnuih bơkjăp drơi jăn mơ̆ng hơdôm boh tơring čar Khánh Hòa, Gia Lai, Dak Lăk, Lâm Đồng, An Giang, Tây Ninh hăng ƀôn prong Hồ Chí Minh. Khul hơmâo brơi 117 Pri mah, 117 pri Prăk, 234 Pri kông amăng bruă bơkjăp drơi jăn; 19 pri A, 19 pri B hăng 20 pri C kơ bruă gru grua, čơkă tuai.

Hrơi jơnum ngui jing bruă sit nik pok pơhai ngă tui tơlơi pơtrun mrô 80 mơ̆ng Ding jum kơđi čar kơ đĭ kyar gru grua hiam Việt Nam, pơsit tơlơi gơgrong mơ̆ng gru grua, amăng anun hơmâo gru djuai ania Chăm, jing pran jua, anŏ kơtang amăng lăm, jing tơlơi gêh găl pơtrut đĭ kyar tañ, hơđong kjăp./.