Tui boh tơhnal ngă hrŏm, ứng dụng “Hră lơkak Khánh Hòa kiăng ngă lông lăng” amra lăi pơthâo hơdôm anih ngui, ĕp lăng, gơnam ƀong hăng hơdôm anih ƀong huă hmư̆ hing yua gơnong bruă tuai čuă ngui tơring čar ruah mă, pơsit tong hăng lăi pơthâo amăng rĭm rơwang. Hluai tui ứng dụng anai, tuai čuă ngui dưi ĕp lăng tơlơi pơhing, anih ngui, iâu rơdêh, rơkâo gơnam ƀong ƀudah rơkâo anih ƀong huă amăng măi telephôn mơtăm. Jơlan hơdră amra pok pơhai hơdôm hơdră pơsur yua gơnam kiăng pơtrut pơsur tuai čuă ngui nao ĕp lăng hơdôm anih yôm phara amăng tơring čar Khánh Hòa.

Dua bơnah ăt amra gum hrŏm pơjing anih čih pioh “Hơdôm gơnam ƀong kiăng yua lông lăng” hăng “Sang ƀong huă hmư̆ hing ƀơi Khánh Hòa”, lăi pơthâo hơdôm gơnam ƀong jơman amăng ƀon lan, laih dong djru brơi anom bruă sĭ mơdrô dưi mă yua plang internet, pok phư bruă tơkuh nao rai hăng tuai čuă ngui. Đĭ pơhiăp amăng mông kĭ pơkôl, yă Thái Thị Lệ Hằng, Khua gơnong bruă gru grua, bơrơguăt drơi jăn hăng tuai čuă ngui tơring čar Khánh Hòa brơi thâo, bruă ngă hrŏm lĕ tơlơi yak nao tong ten kiăng ngă tui hơnong pơkă pơplih mrô mơng gơnong bruă tuai čuă ngui, tŏ tui tơlơi dưi yua boh thâo phrâo kiăng tơkuh nao rai tơlơi dưi, lăi pơthâo klă hloh hơdôm anih ngui, gru grua, kơtang tui pran bơkơtưn mơng anih čuă ngui ƀơi Khánh Hòa hăng anăp nao hơnong pơkă ba tơring čar jing anih ruah nao prong hloh mơng tuai čuă ngui amăng lŏn ia hăng jar kmar: “Gơnong bruă kĭ pơkôl ngă hrŏm hăng Grab kiăng pok mă yua ứng dụng lăi pơthâo sa, dua anih ngui, sang ƀong huă hăng anăn “Sang ƀong huă hmư̆ hing” kiăng lăi pơthâo brơi kơ tuai čuă ngui. Lơm tuai nao pơ Khánh Hòa amra pok ứng dụng Grab, amra ƀuh lăi pơthâo gơnam ƀong ƀơi Khánh Hòa. Anai lĕ gơnam bơwih ƀong mrô hăng bruă bơwih tuai čuă ngui rơgơi”.

Bruă pok pơhai yua boh thâo phrâo lơm bruă tuai čuă ngui ƀơi Khánh Hòa tŏ tui pơđĭ kyar kơtang, hăng giăm 12 klăk wŏt tuai čuă ngui, amăng anun hơmâo rơbêh 4,6 klăk tuai mơng tač rơngiao nao pơ Khánh Hòa amăng thun anai; pơhrui mơng bruă tuai čuă ngui rơbêh 42.000 klai prăk. Mơng kơnôl 17-19/7 pơ anăp, Festival ia rơsĭ Khánh Hòa 2026 amra pơphun hăng rơbêh 40 bruă mă gru grua, adôh suang, bơrơguăt drơi jăn hăng tuai čuă ngui, him lăng pơhưč mơng 600.000-800.000 wŏt mơnuih ƀôn sang hăng tuai čuă ngui, ngă pơtrut brơi bruă tuai čuă ngui bơyan prong. /.