Djuai ania Êđê djă kơnung amĭ, đah rơkơi nao dŏ gah sang đah kơmơi, ană đah kơmơi yơh gơgrong yom amăng sang anŏ, pô pơkiăo gong jơlan nao bơyai rơkơi bơnai hai gah sang đah kơmơi mơn. Tơlơi phiăn pơdô̆ rơkơi bơnai mơ̆ng djuai ania Êđê hơmâo 4 tal: Nao bơyai, pơkôl pơkă mă gai, nao tŭ han hăng pơbưp sang anŏ.

Lơ̆m či dŏ kơ pô đah rơkơi ta khăp, ƀing dra Eđê nao lăi pơ gong jơlan nao bơyai. Juăt ñu anong ƀudah ƀing tha amăng kơnung djuai đah kơmơi, pô thâo pơhiăp, thâo tơlơi phiăn...

Ơi Ama H’Loan, ƀơi ƀuôn Akŏ Dhông, phường Buôn Ma Thuột, Dak Lăk brơi thâo: mơ̆ng đưm hlâo, djuai ania Êđê pơmin tơkeng ană bă, ƀă pem čem rông, eh ruă mơañă thu lĕ amĭ. Ană bă tơkeng rai jing djă kơnung amĭ yơh, amăng tơlơi pơdô̆ rơkơi bơnai gah đah bơnai yơh pơkiăo gong jơlan nao bơyai. Yua hnun truh tơdăm prăm dra, ƀing dra Êđê yơh pô prăp lui djŏp gơnam, prăk kăk či dŏ rơkơi, tŭ glăi pô đah rơkơi pơ sang. Laih anun tơlơi phiăn tŭ han jing gru hiam pơƀuh tơlơi phiăn djă kơnung amĭ mơ̆ng djuai ania Êđê.

Lơ̆m anun, gah sang đah bơnai prăp lui sa čeh tơpai, sa boh kông brơi tui gong jơlan nao pơ sang đah rơkơi. Tơdơi kơ anun, ƀing tha dua bơnah pơbưp, hiăp tom, pô đah rơkơi anun tŭ ư či dŏ mơn kơ pô đah bơnai jing djă lui kông.

Giong anun dong, gong lan gah sang đah bơnai jak ba pô đah bơnai anun nao pơ sang đah rơkơi či hiăp tom, pơkôl pơkă brơi pô đah bơnai anun dŏ lăng gah sang đah rơkơi ƀơ̆i. Amăng hrơi blan anun, sang đah rơkơi lông sem lăng ñu khăp sit mơn hă, thâo bơwih bơwang, gui djuh sô̆ ia mơn hă. Bruă anai kiăo tui tơlơi pơkă mơ̆ng dua bơnah mơn.

Amăng hrơi pơkôl brơi đah bơnai dŏ pơ sang đah rơkơi, gah đah rơkơi tơña pơpŭ pơnang hlao yơh, sang đah bơnai khŏm prăp rơmet pŭ pơnŭ. Bruă anai jing sa tơlơi hiam mơn, pơpŭ kơ tơlơi ƀă pem čem rông mơ̆ng amĭ ama pô đah rơkơi či ñu dŏ mơn.

Tơdơi kơ pô đah bơnai dŏ gah đah rơkơi, tơdah sang đah rơkơi tŭ laih,jing brơi sang đah bơnai nao tŭ han. Tơdah pô đah rơkơi ƀu gưt dŏ dong tah, jing gah sang đah rơkơi iâu sang đah bơnai nao hiăp tom.

Tui hăng NSƯT Vũ Lân, mơnuih kơsem min gru grua Dap Kơdư, amăng hrơi tŭ han, sang đah rơkơi prăp lui sa čeh tơpai, sa drơi bơbui či pơtrun ană ñu glăi pơ sang đah bơnai. Bơ gah đah bơnai, hrơi tŭ han lĕ gơñu djă ba pơnŭ gah sang đah rơkơi tơña. Amăng anun yom hloh lĕ sa boh kông kar hăng tơlơi pơkă mă gai djai hiăp, tơlơi ƀuăn mơ̆ng đah rơkơi hăng đah bơnai. Dua rơkơi bơnai buh eng ao Êđê pơƀuh anŏ kơdrưh amăng hrơi ngă yang prong amăng tơlơi hơdip ană mơnuih ta.

Rak lan glăi pơ sang đah bơnai, ƀing kiăo tui tŭ han juăt iâu ƀing tơdăm dra čuih, pơtual, pơgăn hĭ. Laih anun pô đah rơkơi anun khŏm brơi kơ ƀing gơñu kông mơn. Tui hăng tơlơi phiăn, rak jơlan glăi pơ sang hơmâo lu tơlơi lông, hnun kah rơkơi bơnai mơ̆ng kjăp, thâo khăp ƀu-eng, bơwih ƀong đĭ, tơkeng lu ană bă.

Tŭ glăi han pơ sang, tha plơi pơ ala brơi dua bơnah sang pơƀuh ƀing anong, amĭ ama, adơi amai sang đah rơkơi, sang đah bơnai hăng kơnung djuai dua bơnah. Ƀơi anăp lu mơnuih, dua rơkơi bơnai pơbuh kông laih anun sit jing rơkơi bơnai laih. Tơlơi anai pơtă pơtăn kơ dua rơkơi bơnai khŏm pơkhăp kjăp. Tơdah hlơi ba glăi kông, ƀu kjăp pran, ngă tơlơi soh sat, hơgao akŏ hơget thơ khŏm duh ba tla pơnŭ kơ pô adih yơh.

Tơdơi kơ ngă yang giong, arăng atông čing, rơkơi bơnai djă đing pơčuar, ƀong hrŏm sa tơlŏ asơi, ƀong sa čơđeh hơtai bui. Sang anŏ, kơnung djuai, gơyut gơyâo dua bơnah brơi gơnam pơpŭ kơ dua rơkơi bơnai.

Tui hăng yă H’Yam Bkrông ƀơi ƀuôn Tơng Jŭ, phường Ea Kao, tơring čar Dak Lăk, djuai ania Êđê pơmin, tơdah dua rơkơi bơnai phrâo dŏ, krong truh 4-5 mông mơguah hrơi tơdơi jing tơlơi pơkhăp dua gơñu kjăp truh kơ tha, lui kơ djai ba mơtăm./.