Mut hrăm anih pơtô atông čing hơmâo 30 čô mơnuih jing ƀing tơdăm ngek dra muai hăng ƀing kơhnăk gru đưm duai ania Êđê ƀơi să Êa Phê. Amăng 25 mông hrăm, yua mơnuih kơhnăk gru đưm Y Phôn Ksor pô ngă nai pơtô hăng nai Vũ Lân mơnuih kơhnăk gru grua pơčrâo brơi hơdră atông čing, ayun suang laih anun atông tui tơlơi mơñi jua čing đưm gru grua djuai ania Êđê. Hrŏm hăng kiăng thâo tơlơi pơtô djơ̆ čih ră ruai kơ čing, ƀing hrăm amra hrăm atông sit nik, čih pioh mă rup, čơphil rup video, dưm amăng glông bruă djă pioh kông ngăn gru grua. Amôn Y Li San Kƀuôr, dŏ ƀơi ƀon Puăn, să Êa Phê brơi thâo:

“Ƀuôn gơmơi hơmâo grup atông čing, kâo hor biă mă. Kâo kiăng hrăm atông čing kiăng djru hrŏm, đuăi hyu hăng grup atông čing amăng plơi. Hrơi anai, dưi hrăm kâo mơak biă mă”.

Hlâo kơ anun, kơnôl 7/7, gơnong bruă gru grua pok pơtô hrăm brơi atông hơgor dua, čing tlâo, čing rơma mơng djuai ania Bahnar ƀơi plơi Xí Thoại, să Xuân Lãnh; kơnôl 8/7 pok anih pơtô hrăm atông hơgor dua, čing tlâo, čing rơma pơmut hrŏm ayun suang mơng djuai ania Čăm Hroi ƀơi Sang hră  kơnuk kơna čem rông ba Đinh Núp, să Phú Mỡ. Hrŏm hăng anih pơtô ƀơi Ea Phê, tal anai Dak Lak pok 3 anih pơtô gru grua djuai ania, rĭm anih pơtô hơmâo 30 čô mơnuih hăng him lăng pơgiong hlâo kơnôl 30/8.

Tui yă Nguyễn Thụy Phương Hiếu, kơ-iăng Khua gơnong bruă gru grua, bơrơguăt drơi jăn hăng tuai čuă ngui tơring čar Dak Lak, tơdơi kơ 3 anih pơtô hrăm blung a, gơnong bruă gru grua amra tŏ tui pok dong lu anih pơtô hrăm tui Jơlan hơdră hơnong pơkă dêh čar hăng pok pơhai hơdră bruă phrâo amăng wai pơgang gru grua čing hơgor.

“Hơdôm anih pơtô hrăm anai ngă tui Jơlan hơdră mrô 1719 mă yua ngăn rơnoh mơng thun 2025, dŏ glăi jơlan hơdră amăng thun 2026 amra hơmâo lu anih pơtop hrăm dong, didng nao pok pơhai tui boh tơhnal jơlan hơdră bruă mă mrô 14 amăng tơring čar kah hăng anai lĕ tơlơi pơtrun mrô 03. Ăt čang rơmang hơdôm boh să, phương akŏ pơjing grup čing hơgor tui tơlơi pơkă phrâo amăng tơlơi pơtrun mrô 215 mơng Kơnuk kơna, lơm dưi ngă bruă amra hơmâo hơdră djru brơi klă ƀiă”./.