Hơdôm hrơi rơnuč rơwang hrơi tơjuh giăm anai, jum dar dơnao Ea Kao, phương Ea Kao, tơring čar Dak Lak jing anih ngui dik dak mơ-ak hăng hơdôm rơbâo čô mơnuih ƀôn sang hăng tuai rơnguai. Hơdôm tơlơi ngui anun pơdong rơnưh dŏ glăi, čeo SUP, por klang ƀudah đĭ yu ba glăi anih ngui phrâo, ngă lu mơnuih hor ĕp lăng hăng pơlir jê̆ giăm dơnao ia, glai rưng. Mơng sa boh dơnao hơ-et kret kruai, dơnao Ea Kao glăk ƀơƀrư̆ jing anih tui nao amăng rơnuč rơwang hrơi tơjuh mơng mơnuih ƀôn sang hăng tuai rơnguai. Ơi Lê Trương Quân, dŏ amăng ƀuôn Čư̆ Mlim, să Ea Kao pơ-ư ang lơm kual plơi pla jing anih pơhưč tuai čuă ngui. “Hơdôm hrơi giăm anai ƀuh tuai rai ngui pơ dơnao Ea Kao anai lu biă mă, sit biă ñu lĕ amăng yang hrơi tlam. Ƀơi anai hơmâo lu tơlơi ngui anun lĕ pơdong rơnưh dŏ glăi, čeo sang nan, adôh suang, ƀing tuai rai pơ anai hok mơ-ak biă mă. Kâo ăt hmư̆ hing amra pơkra tơdron taih golf ƀơi Ea Kao anai samơ̆ truh ră anai aka ƀu man pơkra ôh, ăt čang rơmang amra tañ ngă kiăng Ea Kao tañ pơplih phrâo, tuai rơnguai tui rai jai hrơi lu tui, mơnuih ƀôn sang amuñ sĭ mơdrô gơnam tam”.

Akŏ bruă tơdron taih golf Ea Kao dong amăng akŏ bruă dưm dăp man pơkra sui thun laih samơ̆ truh ră anai aka ƀu dưi pok pơhai. Tơdah tuh pơ alin ha amăng plĕ anih ngui, pơdơi pran, sĭ mơdrô hăng bơwih bơwang bruă ĕp lăng jum dar dơnao, kual anai amra dưi tŭ mă klă anŏ hiam jum dar, laih dong hơmâo dong bruă mă hăng đĭ tui rơnoh brơi kơ bruă tuai čuă ngui amăng ƀon lan.

Dak Lak hơmâo tơlơi dưi prong kơ bruă tuai čuă ngui samơ̆ truh ră anai aka ƀu hơmâo tơdron taih golf prong rơhaih dưi mă yua. Lơm anun, bruă ngui taih golf lĕ bruă glăk pơtrut pơđĭ kyar tañ, pơhưč ƀing tuai rơnguai duh prăk lu hăng dŏ glăi sui hrơi. Yua anun, bruă dưm dăp man pơkra pơsit 6 akŏ bruă tơdron taih golf hăng abih tih prăk tuh pơ alin rơbêh 11.000 klai prăk ƀơi Ea Kao, Buôn Đôn, Bình Kiến, Tuy An Nam…kiăng pơjing hơdôm anih ngui taih golf pơlir hăng pơdơi pran, gru grua hăng čuă lăng đang glai. Tui ơi Trần Tiến Lợi, Khua khul sĭ mơdrô sang dŏ, lŏn mơnai tơring čar Dak Lak, anai lĕ bruă amra ngă pơtrut kơtang brơi kơ bruă tuai čuă ngui amăng ƀon lan. “Ƀing gơmơi ƀu kơnong kơ lăng tơdron taih golf lĕ anih ngui bơrơguăt drơi jăn đôč ôh mơ̆ ăt lĕ bruă bơwih bơwang akŏ phun dong. Akŏ pơjing bruă pơlir hơbit, pơjing glông pơlir kjăp phik, hơmâo tơdron taih golf, tơdron rơdêh por, sang jưh tuai hăng anih čuă ngui, kiăng pơjing rai gơnam bơwih brơi tuai čuă ngui tô nao rai. Hơdôm akŏ bruă tơdron taih golf prong rơhaih hơmâo pơjing hơdôm kual lŏn krêng krơng jing kual lŏn yôm, ba glăi hơdôm hơpluh rơbâo bruă mă”.

Ƀu djơ̆ kơnong tơdron taih golf, bruă dưm dăp pơplih pơkra tơdơi kơ pơmut hrŏm ăt pok rai anih pơđĭ kyar tuai čuă ngui phrâo lơm tal blung a Dak Lak pơtum pơƀut tơlơi dưi kual Dap kơdư hăng ia rơsĭ. Amăng 257 akŏ bruă đing nao pơhưč tuh pơ alin rơwang blung a, hơmâo 32 akŏ bruă dong amăng anih čuă ngui, pơdơi prong, tơdron taih golf hăng anih bơrơguăt drơi jăn hăng abih tih giăm 127 rơbâo klai prăk. Kual gah ngŏ hơmâo črâo ba pơđĭ kyar anih pơdơi giăm hang ia rơsĭ, tơdron taih golf hăng plơi prong bơwih bơwang; gah yŭ mă yua hơdôm tơlơi dưi mơng glai rưng, ngă hmua hăng gru grua mơng giăm 50 djuai ania kiăng pơjing hơdôm gơnam bơwih brơi tuai čuă ngui yôm phara.

Tui ơi Lê Phúc Long, kơ-iăng khua gơnong bruă gru grua, bơrơguăt drơi jăn hăng tuai čuă ngui tơring čar Dak Lak, bruă dưm dăp tal anai ƀu djơ̆ kơnong pok rai anih pơđĭ kyar đôč ôh mơ̆ ăt jing atur phun kiăng pơhưč hơdôm anom bruă tuh pơ alin pơprong. “Anai lĕ tơhnal pơkă akŏ phun kiăng pơhưč, jak iâu anom bruă tuh pơ alin pơprong glăk đing nao hơdôm kual bơwih brơi tuai čuă ngui, anih pơdơi pran. Hơnong pơkă mơng bruă tuai čuă ngui ƀơi Dak Lak pơ anăp anai lĕ tuh pơ alin pơđĭ kyar hơdôm gơnam tuai čuă ngui mơtah, hơđong kjăp hăng jê̆ giăm đang glai”.

Kiăng hơdôm hơdră amăng akŏ bruă dưm dăp man pơdong ngă tui sit nik, Dak Lak pơsit hrŏm hăng pơgiong anih anom amra đing nao pơjing anih tuh pơ alin tong ten, gơgrong prap lui lŏn mơnai, pơsir hĭ tơlơi gun kơ pơhrui glăi lŏn mơnai hăng gum hrŏm anom bơwih ƀong sĭ mơdrô amăng pok pơhai akŏ bruă. Ơi Đỗ Hữu Huy, Khua jơnum min mơnuih ƀôn sang tơring čar Dak Lak pơsit tong: “Tơring čar Dak Lak ƀuăn gum hrŏm hăng anom bơwih ƀong sĭ mơdrô lơm mă yua lŏn mơnai tui tơlơi pơkôl pơkă, ƀuăn lŏn mă yua gêh gal, pơtrut bruă pơhrui glăi, djru brơi, man pơdong plơi pla phrâo, pơhrui glăi abih lŏn kiăng yua. Hăng hơdôm akŏ bruă phun, akŏ bruă ngă pơtrut tañ, hơdôm akŏ bruă bơdjơ̆ nao prong tơlơi bơwih ƀong huă mơnuih mơnam amăng tơring čar, Khua mua tơring čar amra git gai pơsir hĭ tơnap tap, gun găn, pơhlôm bruă pơhrui glăi lŏn mơnai hăng bruă ngă tui ha amăng plĕ, djơ̆ tơlơi pơkă”.

Mơng tơlơi pơplih phrâo glăk pok rai jum dar dơnao Ea Kao truh pơ bruă anăp nao pơđĭ kyar mơng kual kơdư trun dơnung, Dak Lak glăk hơmâo tơlơi dưi kiăng ngă tui bruă pok prong anih pơđĭ kyar./.