Rơnuč rơwang hrơi kom, sang tơdăm rông, jing sang rung plơi Đak Pơkao, să Tơtung, hmư̆ ik ăk jua čêng hơgor. Tha plơi ơi Đinh Plơñ (Đinh Plơnh), mơnuih lu thun laih hur har sơ̆n pran jua pơtô glăi tơlơi thâo gah čêng hơgor laih anun tơlơi adoh đưm, pơtưh nao rai brơi kơ hnơr ƀing čơđai hrăm pioh, ñu lăi:

“Kâo gir run pơtô glăi kơ ană amôn thâo kơ jing čêng hăng adoh đưm djuai ania, kiăng kơ gru ama grua amĭ djuai ania Bahnar huăi rơngiă hĭ. Yua kơ jua čêng hơgor, mut tơma amăng pran jua, čơđeh asar djuai ania Bahnar laih. Mơ̆ng čơđai nge phrâo đih amăng rơ-i ung ƀudah đih amăng ajao hai hmư̆ jua čing baih, ngă yang ƀhet tơngia, ngă yang iâu anăn, truh prô̆ tơdăm prăm dra ƀa tơsâo, tha rơma djai đuăi hai. Kâo pơtă pơtăn na nao kơ ană tơčô, atông čing ƀu djơ̆ lăi hyu pơdah brơi arăng lăng kiăng mơak đôč ôh, khom atông abih pran jua, ai hơtai ta, thâo ư̆ añ kơ tơlơi tơnap tap hăng mut hrŏm amăng phung, khul atông čing. Ring čing kơnong hmư̆ mơak khom hơmâo abih bang amăng grup atông pơdjơ̆ hrŏm sa pran jua”.

Ăt tong ten na nao hăng djop boh čing, djop yŭ ayun suang mơ̆ng hlăk muai čơđai čơđeh, mơnuih kơhnăk gru grua ơi Đinh Hyot (Đinh Hdot) đing nao biă mă kơ tơlơi thâo, mơneč atông čing hăng anŏ hiam amăng bơngăt jua mơ̆ng rim tơlơi atông čing đưm, sit ñu pơtô glăi. Ñu pơblang tui anai

“Rim kơ tơlơi atông čing mơ̆ng djuai ania Banar ƀơi Tơtung lêng kơ lir hơbit hăng tơlơi ngă yang soh, ƀơi anŏ jua čing ik ăk kơdok kơdor, ƀơi anŏ kah hăng mơak ngă yang huă asơi hle, hmư̆ tai djăl jua čing ñu phara soh, ngă yang pơtrum kơbao čing tai rơnang ƀiă. Lơ̆m pơtô kơ ană tơčô, ană amôn, kâo ƀư̆ tơngan djă tơlô̆ atông hiư̆m pă brơi găl, mơñi hiam, atông kơđơl, đơ̆t tơngan, čơđeng brơi djơ̆. Ta pô pơtô khom ngă khut khăt, pơtô brơi anŏ hiam khom thâo pơpŭ kơ gông brô̆ jing čêng gru grua đưm djuai ania, hnun kah jua čing plơi Đak Pơkao mơ̆ng dưi djă pioh anŏ hiam tơpă ñu, ba hyu kơtang bang amăng glai klô čư̆ siăng”.

Hrŏm hăng jua jing čêng hmư̆ ik ăm, djring djrang, hơdôm tơlơi adoh đưm djuai ania Bahnar hmư̆ lơlong hăng đok djăl mơak biă mă, laih anun hơdôm tơlơi akhan hri iơ iơ̆k ră ruai kơ tơlơi khin hơtai, prong phĭ đĭ pran mơnuih đưm đă ră hlâo, mĕm ia tơsâo hiam rông ba hơdôm hnơr rơnuk ană tơčô mô yâo, hlăk dưi hơmâo lu mơnuih kơhnâo kơhnăk pơtô glăi. Ơi Đinh Bri, plơi Đak Pơkao, să Tơtung lăi:

 “Tơlơi tơnap amăng tơlơi adoh đưm lĕ kiăng hơmâo pran kơtang, suă jua sui, hơmâo lu er tơlơi adoh, jua mơñi blưh nao amăng boh pơhiăp tơlơi adoh mơak. Ră anai, khul čơđai muai ană tơčô mô yâo kiăo tui kơ tơlơi adoh amăng măi telephôn er tơlơi adoh rơnuk anai đôč. Ƀing tha rơma kah hăng ƀing gơmơi anai khom hneč mă amăng mông mơmŏt mlam, amăng hrơi pơdơi pơdă rơnuč rơwang hrơi kom pơtum hmư̆ tơlơi adoh nao rai tơdruă, kiăng pơtô ba, lăi pơthâo kơ ană tơčô hor hăng khăp kơ tơlơi adoh đưm mơ̆ng ơi yă amĭ ama đưm”.

Thâo pơmin hrŏm tui hăng tơlơi bơngơ̆t anun, mơnuih kơhnăk gru đưm Đinh Plih, plơi Leng, să Tơtung, kah pơpha:

“Ƀing gơmơi gir run pok anih pơtô atông čing hăng adoh đưm ƀơi plơi Đak Plao kơ ƀing ană tơčô, abih bang yua tơlơi glăm ba, bruă gơgrong hăng bơngăt atâo ơi yă đưm đă laih anun hăng ană plơi pla. Kâo hơ̆k mơak gong gai kơnuk kơna să Tơtung đing nao, djru ba. Ƀing gơmơi gir run pơtlep hrŏm lu akŏ bruă pơtô brơi amăng tlam mơmŏt hăng amăng hrơi pơdơi ƀơi sang rung plơi, bơyan pơdơi prong. Ƀuh ƀing ană amôn hŏk mơak mŏn, hrăm atông čing, suang arap, gơmơi pô pơtô tơdah gleh glar hai ăt abih hĭ mơ̆n. Truh ră anai, hơmâo dua grup atông čing hăng khul adoh đưm ƀing čơđai muai pô adoh laih anun 3 grup ƀing tơdăm ngek dra muai”.

Hơdôm tơlơi gir run ƀu pơdơi ôh, mŏng ƀing mơnuih kơhnăk gru grua ƀơi să Tơtung hơmâo tŭi apui bơngač, jă na nao amăng pran jua tơlơi khăp kiăng, hỏ kơ gru ama grua amĭ djuai ania Bahnar brơi kơ ƀing čơđai muai ană tơčô mô yâo djă pioh. Ayong Đinh Văn Anging, sa čô mơnuih hur har kah hăng asar pơjeh, phun aliăng ba gru hlâo amăng bruă pơtrut pơsur djă pioh tơlơi mơak gru grua hiam djuai ania mơ̆ng hlăk ai tơdăm dra să Tơtung, ñu lăi:

 “Ƀing gơmơi mơak biă mă, bơni kơ ƀing nai pơtô ba kah hăng nai Plơñ, nai Hyot ƀu kơdŭn kơ tơlơi tơnap gleh glar hrơi mlam pơtô ba ƀing gơmơi. Kâo pô lĕ sa čô hlăk ai, thun dŏ čơđai đôč kâo ƀuh mơ̆n tơdah ƀing gơmơi ƀu glăm ba bruă anai, kơñ pơgi ƀing nai anun tha rơma, hơjai ia rơgơi tơlơi kơhnâo gru grua hiam đưm anun pơpă ñu či nao? Kâo pơtrut pơsur pran jua kâo pô khom hrăm tŭ yua klă, ƀu kơnong hrăm atông čing hơgor đôč ôh, khom atông thâo hruaih, kơhnăk, thâo tul tia pơkra jua čing mơñi djơ̆ găl, hrăm tui kiăng thâo hơdor pioh hơdôm tơlơi atông čing, tơlơi adoh đưm pioh tơdơi anai pơtô glăi kơ ƀing adơi đeh anet čơđai muai dơ̆ng”.

Ƀu dŏ glăi ƀơi bruă djă pioh gru grua hiam amăng plơi pla đôč ôh, mơnuih kơhnăk gru grua thun dŏ hlăk ai Đinh Ơng dŏ ba gru grua hiam djuai ania Bahnar pơdah amăng plang tơlơi pơhing mơnuih mơnam facebook, pơčrâo brơi anih pioh atông čing čing suang arap hơmâo plơi pla prong rơhaih biă mă, kiăng arăng thâo nao lu hloh:

 “Gru grua djuai ania Bahnar ƀơi Tơtung ta hiam phara biă mă hăng lu tơlơi hiam mơak amăng pran jua. Kâo pơmin, rơngiao kơ bruă hyu pơdah ngui amăng mông ngă yang gru grua đưm, khul čơđai muai kiăng ba yua boh thâo ia rơgơi phrâo ră anai, ba yua plang facebook hăng mông gêh găl arăng pơdah tơlơi atông čing ring hơgor, mă rup pơdah thâo kơ djop anih amăng rŏng lŏn tơnah thâo, lăi pơthâo čing hơgor, tơlơi adoh djuai ania Bahnar hăng ƀing tuai jĕ ataih ƀuh. Sit gru grua hiam anun lir hơbit hăng bruă čơkă tuai dưi pơtrut bruă pơđĭ kyar plơi pla, djru ngă hơđong tơlơi hơdip mơda mơnuih ƀôn sang trơi pơđao hloh, mơ̆ng anun jing hơdră pơgang pioh tong ten kông ngăn gru grua djuai ania ta pô”.

Ƀơi anăp lan sang rung, lăng đĭ bơbung dlông hñueng pơ pơdŭ adih, amăng lăm hơmâo tơpur apui jă ƀlêh, bơngač kiăng pơƀuh pran jua tơlơi hơdip mơda kơtang kah hăng mơnuih khin hơtai ơi Nup dŏ hrŏm, jua čing hơgor mut tơma hrŏm ayun suang, tơlơi adoh đưm tơ-ua amăng čư̆ siăng glai klô ƀơi lŏn mơnai plơi pla Tơtung. Gru grua hiam djuai ania Bahnar dưi tŏ tui djă pioh na nao, djru hrŏm akŏ pơdong plơi pla ala ƀôn kual Dap Kơdư kiăng ƀrư̆ hrơi hiam rô̆, pơdrong sah hing ang.