Ƀu djơ̆ kơnong bruă tuai čuă ngui dik dak ƀơi hơdôm anih gah kual Dơnung tơring čar Khánh Hòa, kual lŏn Ninh Thuận hlâo adih đôč ôh. Hơdôm hang ia rơsĭ Ninh Chữ, Vĩnh Hy, kual ngui pơdơi pran ter hang ia rơsĭ, anih ĕp lăng gru grua, plơi pla pơkra gơnam sô hơđăp anun lĕ Bàu Trúc, Mỹ Nghiệp ăt ƀuh lu tuai čuă ngui. Tơdah Nha Trang yôm hăng tuai čuă ngui ter hang ia rơsĭ, anih pơdơi pran, Phan Rang-Ninh Thuận hơđăp hơmâo tơlơi dưi kơ kual lŏn mơnai glai čư̆ hiam, gru grua yôm phara, gơnam đang hmua hiam hơdjă. Ayong Huỳnh Trọng Lượng, tuai čuă ngui mơng Nha Trang nao pơ Phan Rang brơi thâo: “Gru grua yôm phara ƀơi Nha Trang ngă pơđĭ kyar tuai čuă ngui. Amăng anun, Phan Rang ăt dŏ lu anŏ hiam sô hơđăp, djă pioh hơdôm rơnoh yôm gru grua đưm, sit biă ñu lĕ gru grua mơng djuai ania Čăm. Hơdôm gơnam tuai čuă ngui ƀơi anai ăt hơmâo djop mơta, mơng eng ao, gơnam tam, akhăn ƀak truh pơ hơdôm gơnam pơkra mă hăng tơngan, ngă kơ tuai hơmâo dong tơlơi ruah kiăng hyu ĕp lăng hăng blơi gơnam, tơlơi anai yôm biă mă”.

Tơdơi kơ ha thun pơmut hrŏm, anih pơđĭ kyar tuai čuă ngui ƀơi Khánh Hòa hơmâo pok prong, hơdôm anih čuă ngui gah Dơnung tơring čar ƀơƀrư̆ pơlir hăng hơdôm gơnam yua hrŏm. Amăng 6 blan akŏ thun 2026, Khánh Hòa čơkă giăm 12 klăk tuai čuă ngui, đĭ rơbêh 40% pơhmu tui tơđar, pơhrui mơng tuai čuă ngui giăm 42.500 klai prăk.

Kual gah Dơnung tơring čar hơmâo dong tơlơi dưi lơm giăm tơdron rơdêh por jar kmar Cam Ranh, jơlan glông tơkuh nao rai gêh gal, hrŏm hăng anăn apăn anih čuă ngui Khánh Hòa. Ơi Alain Nguyễn, pô wai lăng anih pơdơi prong Hòan Mỹ, phường Ninh Chữ brơi thâo, anom bruă hơmâo tơlơi dưi lơm pơmut hrŏm 2 boh tơring čar: “Tơdơi kơ ha thun pơmut hrŏm, ƀing gơmơi pơmut hrŏm lu boh than yôm phăn. Mơng mơnuih mă bruă, ngăn rơnoh pơđĭ kyar glăk hơmâo tơlơi pơplih kơtang nao kual Dơnung Khánh Hòa. Sit biă ñu, mrô tuai čuă ngui mơng Nha Trang hơdai nao dŏ pơ kual Dơnung Khánh Hòa lu tui, ngă pơtrut phrâo brơi pơđĭ kyar tuai čuă ngui ƀơi ƀon lan”.

Tơdơi kơ pơmut hrŏm hăng Ninh Thuận, tơring čar Khánh Hòa pơtrut lăi pơthâo, pơsur bruă tuai čuă ngui, amăng anun tơlơi kơđŏm glăi lĕ Festival ia rơsĭ thun 2026 hăng anăn “Ia iom mơng kual ia rơsĭ-Hrưn tơbiă jar kmar”, pơphun dong mơng kơnôl 17/7-19/7. Laih dong Nha Trang, hơmâo lu bruă pơphun ƀơi kual Dơnung tơring čar anun lĕ pơdă prưng hăng pơphun bruă pơkra gơnam gru grua gô̆ lŏn Bàu Trúc, mơñam abăn ao Mỹ Nghiệp ƀơi să Ninh Phước; ngui pĕ gông brô̆, ayun suang djuai ania Čăm ƀơi pra yang Po Klong Garai; jơlan hơdră ngui adôh suang rôk jơlan, đĭ hyu rơdêh bơnga ƀơi phương Đông Hải. Sit biă ñu ƀơi să kual čư̆ siăng Lâm Sơn pơphun ngui sĭ boh troh hăng pơnah mliă bơnga. Bruă pok prong ngui Festival ia rơsĭ tơl hơdôm boh ƀon lan pơgôp tŏ tui gru grua ƀon lan, hơmâo dong gơnam tuai čuă ngui hăng tơlơi bơwih ƀong brơi mơnuih ƀôn sang./.