Mơng giăm 4 mông 30 mơnit, plơi mă akan hơdang Mũi Né (phương Mũi Né, tơring čar Lâm Đồng) dik dak lơm lu ƀattô pơwot glăi pơ hang tơdơi kơ ha mlăm hyu mă akan hơdang. Hơdôm rơtuh boh ƀattô hăng song nan pơtum pơƀut glăi, lơm anun ƀơi hang ia rơsĭ, bruă blơi pơhrui akan ăt dik dak mơn. Lăng trun mơng glông, hơdôm rơtuh boh ƀattô hăng song nan ba nao akă pơ hang ia rơsĭ mơtah mơda, ba glăi anŏ hiam phara amăng plơi Mũi Né rĭm mơguah.

Ƀơi anai, song nan lĕ gơnam ƀu kơƀah ôh kiăng kơ pơdŭ pơgiăng mơnuih hăng akan hơdang ba nao pơ hang. Sang čơ sĭ gơnam dik dak lơm mơnuih ƀôn sang hăng ƀing sĭ mlia pơtum pơƀut ƀơi hang ia rơsĭ kiăng kơ blơi akan hơdang phrâo ba glăi. Lu akan hơdang phrâo mă hơmâo mơnuih ƀôn sang pơčlah ƀơi hang ia rơsĭ hlâo kơ ba nao pơ sang čơ hăng anih blơi pơhrui.

Tơdơi kơ mông sĭ mơdrô, ƀing mơnuih mă akan hơdang săk glăi hơñuôl, prap hyu mă dong. Lơm ia rơsĭ trun, lu mơnuih hyu duñ đĕ čung hăng ruah akan hơdang ƀơi hang ia rơsĭ, pơgôp đĭ tui prăk pơhrui. Tơdơi kơ hơdôm mông mă bruă glêh glar, plơi mă akan hơdang pơwot glăi tơlơi hơdip hơđong mơ-ak hăng lu ƀattô akă ƀơi hang ia.

Ƀu djơ̆ kơnong anih bơwih ƀong mơng djop rơnuk mơnuih mă akan hơdang, plơi Mũi Né ăt dŏ djă pioh hơdôm anŏ yôm phara mơng plơi pla ter hang. Hơdôm boh ƀattô pơwot glăi amăng mơguah, mông sĭ akan hơdang, rup rap mơnuih čeo sang nan, săk hơñuôl ƀudah hơdôm rơtuh boh ƀattô akă ter hang ia rơsĭ ba glăi rup rap bơwih ƀong huă jê̆ giăm samơ̆ lăng hiam biă.

Mơng tơlơi hơdip jê̆ giăm anun hơmâo pơgôp ba glăi tơlơi pơhưč phara mơng Mũi Né, anih tuai čuă ngui ƀu djơ̆ kơnong ĕp ƀuh anŏ hiam mơng ia rơsĭ đôč ôh mơ̆ ăt ƀuh tơlơi hơdip sit nik mơng plơi mă akan hơdang sô hơđăp ăt dŏ djă pioh amăng djop rơnuk./.