Sa amăng hơdôm tơlơi đing nao hloh bruă tơring čar Khánh Hòa sit nik lăi pơthâo atur mrô ia rơgơi djă piho kông ngăn gru grua hiam djuai ania Čăm hăng pơdă prưng pơdah lăng online. Čih pơmut dưm amăng atur ia rơgơi mrô djop rơnoh yom gru grua hiam djuai ania Čăm găn rơgao hĭ anih anom djă pioh pơgang lui ƀu kơnong amăng anih gru grua, bơwih brơi bruă kơsem min, pơtô hrăm, pôr pơthâo hăng pơtruh nao rai hăng ƀing tuai amăng dêh čar hăng jar kmar.

Tui hăng anom bruă mơdrô, tơlơi mơ̆ djă pơkong tơkai ƀing tuai dŏ ƀu kơnong hyu ĕp lăng anih anom hiam lŏn mơnai glai klô đôč ôh, dŏ kiăng hyu ĕp đing hmư̆ tơlơi ră ruai kơ kông ngăn gru grua đưm anun dơ̆ng. Mơ̆ng bơnah sem lăng anun yơh, gru grua djuai ania Čăm jing gơnam brơi djă pioh jing gơnam gêh găl pioh akŏ pơjing hơdôm mơta gơnam pơhưč ƀing tuai hyu yom phara biă mă, kiăng găn rơgao thâo hluh lu. Ơi Alain Nguyễn, Khua phun kông ty bơwih brơi anih pơdơi pơdă Hoàn Mỹ, tơring čar Khánh Hòa lăi:

“ Tuh pơ alin ƀơi tơring čar Khánh Hoà găn rơgao 10 thun hăng anai, jai hrơi kâo ƀuh mơak biă mă, gru grua hiam djuai ania Čăm djru gơmơi thâo hluh lu amăng gru phun đưm ră ruai. Yua kơ anun, gơmơi khin mơ̆n rơkâo pôr pơthâo gru grua hiam djuai ania Čăm, mơ̆ng anun, kiăng pơđĭ kyar gơnam tuai hyu ngui ĕp lăng djop gru grua djuai ania ƀiă. Ƀu djơ̆ lăi rai pơ Việt Nam kơnong mơnơi ia rơsĭ, hyu huă ƀong mơnong ƀong huă jơman đôč ôh dŏ găn rơgao hyu ĕp lăng gru grua kiăng thâo hluh, hmư̆ arăng ruai glăi kơ ană tơčô mô yâo ta thâo kơñ pơgi ni anăp”.

Ƀing mơnuih rơgơi kơhnâo lăi pơtong, pơblih yua mrô hlăk pok jơlan anŏ gêh găl ba gru grua hiam đưm djuai ania Čăm nao giăm hăng ƀing tuai rơnguai hloh, kơnang kơ atur gru grua ia rơgơi mrô mut ĕp ră anai. Khă hnun, kiăng pơhưč lu tuai hơmâo tơlơi kiăng hyu ĕp lăng gru grua hiam đưm, bruă pơblih yua mrô khom nao hrŏm pơđĭ tui tơlơi thâo thăi kơ mơnuih mă bruă. Grup hyu pơtô lăi, ƀing ngă bruă bơwih brơi tuai čuă ngui hăng ƀing dŏ amăng plơi pla, mơnuih ƀôn sang yơh pô pơdah thâo gru grua hiam, djă pioh tơlơi thâo ia rơgơi, mơ-it hyu gru grua djuai ania pô kơ tuai thâo.

Kơ-iăng nai tha prin, Nai prin tha Ngô Văn Danh, ding kơna hơđăp Khul kông ngăn  gru grua dêh čar lăi:

“Thâo hruaih ia rơgơi phrâo klă laih, gêh găl kơ bruă pôr pơthâo, pơhưč ĕp lăng, hmar biă mă. Samơ̆ kiăng biă mă thâo tong ten rơnoh yom gru grua, tơlơi thâo ƀiă lĕ, kơnong lăi pơthâo tŭ kơ hơmâom đôč. Biă mă ñu tuai ƀing tač rơngiao, lơ̆m gơñu mut rai pơ anai, tơlơi thâo arăng phara biă mă, ƀu kơnong hyu ngui đôč đač ôh, gơñu hyu ngui, jing gơñu mơnuih thâo lu hloh kơ pô lăi pơthâo mơtam lah”.

Hrŏm hăng anun, pơđĭ tui boh tŭ yua ba tuai hyu ngui ĕp lăng kông ngăn gru grua hiam, pok prong anih anom brơi tuai jar kmar rai ngui, ĕp lăng gơnam tam čơkă tuai phara biă mă khom đing nao lu hloh. Sa jơlan hơdră anăp ngă bruă phrâo dưi hơmâo lu mơnuih đing nao lĕ pơđĭ kyar tuai čuă ngui Halal, lir hơbit hăng gru grua đăo Islam mơ̆ng djuai ania Čăm.

Tui hăng ƀing rơgơi kơhnâo kơsem min, hrŏm hăng pơhưč tuai rai mơ̆ng kual Trung Đông laih anun lu dêh čar đăo Islam, bruă akŏ pơjing bơwih brơi khul tuai hyu ngui dŏ dong ƀong huă lăp djơ̆ tơhnal pơkă Halal, lir hơbit hăng bruă mă yua pơdah thâo gru grua hiam djuai ania Čăm amra pok jơlan phrâo kơ bruă čơkă tuai hyu ngui. Ayong Huỳnh Thanh Tâm, Khul Kơsem min gah Djuai ania hăng Tơlơi hrăm kơ ană mơnuih ƀôn prong Hồ Chí Minh pơblang:

“Mah khul mơnuih ƀôn sang đăo Islam ƀơi ƀôn prong Hồ Chí Minh ƀu lu ôh samơ̆ anai lĕ anih bơwih ƀong huă prong phun mơ̆ng dêh čar, hlăk pơhưč lu mơnuih ngă bruă mơdrô tuh pơ alin, tuai mơ̆ng kual Trung Đông amra ba yua djop mơta tơlơi bơwih bơwang kơ tuai Halal, jĕ giăm hăng đăo Islam Čăm amăng kual dŏ ƀơi ƀôn prong Hồ Chí Minh”.

Hăng Khánh Hòa-sa boh tơring čar hơmâo djă pio lu pra yang đưm Čăm hiam biă mă, anih khul mơnuih ƀôn sang Čăm juăt mut ngă yang pơpŭ-djă pioh na nao kah hăng tơlơi hơdip bơngăt jua kơ ană plơi pla. Yă Thái Thị Lệ Hằng, Khua Gơnong bruă Gru grua, Pơrơguăt drơi jăn hăng Tuai čuă ngui tơring čar Khánh Hòa lăi lĕ, lơ̆m mơnuih ƀôn sang pô mơtam ngă hrŏm djă pioh hăng pơđĭ tui gru grua hiam, kông ngăn gru đưm ƀu kơnong dưi djă pioh pơgang lui đôč ôh, dŏ jing bruă ngă pơsir tơlơi bơwih ƀong huă kơnang kơ bruă čơkă tuai hyu ngui.

“Yua hơgĕt ƀing ta ƀu ngă bruă djă pioh lĕ, ƀu pơđĭ tui hơdôm rơnoh yom gru grua hiam pioh čơkă tuai, lơ̆m tuai rai ngui pơ Khánh Hòa, arăng pơtong rơđah anih rai pơ anai hyu ngui ĕp lăng gru grua đưm djuai ania Čăm, dŏ hnơ̆ng gru hiam amăng plơi pla djuai ania, hơmâo gơnam bơwih brơi kơ tuai hyu ngui găn rơgao? Mơ̆ng anun, pơtô hrăm kiăng thâo khăp kơ gru grua hiam đưm djuai ania, lu bruă mă gru grua đơ đa rơngiă tui, anun kiăng djă piho glăi”.

Ta ƀuh rơđah, amăng rơnuk ba yua ia rơgơi mrô, bruă djă pioh gru grua hiam djuai ania čăm ƀu kơnong dŏ djă pioh rơnoh yom mơ̆ng đưm đôč ôh, dŏ jing pran kơtang phrâo kơ gru grua hiam. Lơ̆m boh thâo ia rơgơi, tơlơi thâo hră hăng ia rơgơi gum hrŏm amăng plơi pla, gru grua hiam đưm djuai ania Čăm amra ƀu dưi djă pioh đôč ôh, amra jing pran kơtang pơtrut pơđĭ kyar bruă tuai čuă ngui, djru hrŏm anom bruă tuh tia pơkra ming čih pioh gru grua hiam hăng pôr pơthâo rup rap mơ̆ng Việt Nam truh pơ jar kmar amăng rŏng lŏn tơnah.