Amăng sang kyâo klup pơbung brik sô laih, yă H’Brơi glăk dŏ dai rơjao brơi tơčô ñu pit, dai rah rơjao adoh rah tơlơi M’nông. Ƀơi pơnăng sang ñu lĕ hră pơpŭ bơni hơmâo răk lui, kah hăng pơsit brơi anŏ tŏ tui rơnuk mơ̆ng sa boh sang anŏ ngă hơkrŭ lŏn ia.

Yă K’Brơi tơkeng thun 1975, amăng sang anŏ hơmâo amĭ ama rơkơi hăng amĭ ama ñu leng kơ ngă tơhan djru brơi tơhan pơ anih ngă hơkrŭ B4 Nâm Nung amăng rơnuk blah ayăt Prang hăng ayăt Mi. Tơkeng rai lơ̆m lŏn ia phrâo rơngai, pơlir hơbit, ñu prong hăng jua čing ama ñu atông, er amĭ ñu adoh, tơlơi khăp kơ gru grua M’nông mut amăng drah kơtăk čơđeh asar ñu mơ̆ng anet laih. Yă H’Brơi lăi: “Kâo thâo hăng hơdor tơlơi adoh anai mơ̆ng dŏ anet laih. Hlâo adih, rim amăng plơi ngui ngor, ngă yang, kâo juăt kiăo tui amĭ kâo hyu adoh. Pơ sang lĕ hmư̆ amĭ adoh pơngui ană tơčô, anun yơh jing hơdor mơ̆ng hrơi hơbin kâo hai ƀu thâo lơi. Hrăm adoh huăi tơnap hơget lơi, phun ñu ta gir pơhmư̆, hơdor lui giong anun hrăm adoh tui”.

Hăng djuai ania M’nông, tơlơi adoh ƀu djơ̆ sa tơlơi adoh đôč ôh, ñu ăt djă pioh gru phun, tơlơi phiăn hăng pơtô brơi tơlơi hơdip hiam, ngă bruă djơ̆ amăng plơi pla. Mơ̆ng tơlơi adoh pơngui, adoh pơtưh truh kơ akhan hri (Ot Ndrong), abih bang djă pioh tơlơi pơtô mơ̆ng ơi yă kơ tơlơi thâo khăp, gum pơgôp, hăng pran jua mă bruă. Mông anai, yă H’Brơi pioh glăi tơlơi khăp tơlơi adoh đưm kơ rơnuk ană tơčô dong.

Prô̆ tơdăm prăm dra, hơdip hăng tơlơi adoh mơ̆ng amĭ, amai H’Như, ană đah bơnai yă H’Brơi juăt laih hăng bruă gru grua mơ̆ng plơi pla. Ră anai, ñu jing Khua khul suang M’nông mơ̆ng să Nâm Nung: “Mơ̆ng anet laih kâo kiăo tui amĭ nao hrăm adoh, hrăm suang hrŏm ƀing neh met ngă bruă adoh suang mơ̆ng să. Amĭ kâo ngă khua khul, anun jing kâo hmư̆ tơlơi  adoh, hrăm suang mơ̆ng anun yơh hor adoh, hor suang gru djuai ania M’nông gơmơi”.

Jing sa čô khua hlăk ai ƀon Ja Rah, să Nâm Nung, amai H’Như lăng bruă djă pioh gru ama grua amĭ jing bruă mơ̆ng hlăk ai yơh. Hơdôm mông jơnum khul lơ̆m mơmot ƀu kơnong lăi nao bruă mă đôč ôh ăt jing anih či hrăm adoh pơtŏp suang. Abih bang ƀing hlăk ai tơdăm dra hăng ƀing čơđai muai nao jơnum hrŏm Khul hlăk ai ƀon Ja Rah hơmâo năng ai rơbêh 30 čô, amăng anun hơmâo hlăk ai đa arăng ruah amăng grup suang să Nâm Nung yua amai H’Như wai lăng. Amai H’Như lăi: “Lu mơnuih amăng grup suang leng kơ hlăk ai tơdăm dra amăng plơi soh anun bruă hyu jak iâu tañ mơn. Ƀing gơmơi juăt pơmut hrŏm hrơi pơtŏp suang, hrăm adoh wơ̆t hăng bruă jơnum khul hlăk ai hlao, tui anuñ ñu hơmâo anih pơbưp ngui ngor hiam kơ hlăk ai, ăt djă pioh gru grua đưm klă mơn”.

Rim wơ̆t ngui ngor ngă yang, dua amĭ ană yă H’Brơi nao adoh suang dong yơh. Amăng jua čing mơñi tơ-oa, amĭ ñu adoh tơlơi adoh đưm mơak, rơnguă, ngă hyŭ pran jua. Bơ ană dra ñu suang kiăo tui tơlơi adoh lăng mơak biă mă.

Hơdôm thun giăm anai, khul adoh suang să Nâm Nung hơmâo lu wơ̆t laih nao jơnum ngui hrŏm amăng đơ đam dêh čar ta hăng hơmâo mă lu pri yom. Laih anun yă H’Brơi, amai H’Như glăk tŏ tui pran jua hor kơtang biă, djă pioh gru grua djuai ania M’nông kơ rơnuk hlăk ai. Yă H’Thương Knul, Kơ-iăng khua anom bruă gru grua - mơnuih mơnam Khul khua pơ ala mơnuih ƀôn sang să Nâm Nung brơi thâo: “Yă H’Brơi jing khua khul atông čing - adoh tơlơi M’nông, ană ñu lĕ wai lăng khul suang. Amăng lu thun rơgao, dua amĭ ană ñu gir djă pioh hăng pơtô glăi gru grua hiam kơ rơnuk hlăk ai. Amăng hơdôm thun rơgao, khul mơnuih kơhnâo gru đưm yua yă H’Brơi nao pơƀuh ƀô̆ gum pơplông lu laih, adoh suang lu mơn amăng tơring čar wơ̆t hăng tơring čar pơkŏn. Kơnong ƀơi mông jơnum ngui gru grua đưm pơphun ƀơi Quảng Trị thun 2024 laih rơgao, khul hơmâo mă 9 pri, amăng anun hơmâo 4 pri A hrŏm hăng lu pri B hăng pri C”.

Mơ̆ng sang dŏ anet đôč ƀơi ƀon Ja Rah, mơnuih kơhnâo gru đưm H’Brơi glăk tŏ tui gru grua mơ̆ng sang anŏ ñu hăng hơdôm bruă mă tŭ yua kơ plơi pla. Tơdah rơnuk ơi yă pơgôp pran jua ngă hơkrŭ lŏn ia, jing hlăk ai rơnuk anai gum djă pioh, pơtrut tui gru ama grua amĭ. Mơ̆ng tơlơi adoh pơngui mơ̆ng yă, mơ̆ng amĭ, truh kơ tơlơi ayun suang mơ̆ng ană dra, gru grua djuai ania M’nông ăt dŏ hơnong đôč, găn rơgao djŏp rơnuk, kiăng jua čing, tơlơi adoh ăt mơñi mơak na nao amăng plơi pla./.