Añăm tơpung kơtor (Trau pai) mơng djuai ania M’nông ƀơi Buôn Đôn hơmâo hơte hăng hơdôm añăm tam mơng glai rưng. Kiăng hơte añăm tơpung jơman, ƀu djơ̆ kơnong  bruă prap lui hơdôm gơnam hiam hơdjă đôč ôh mơ̆ wŏt mơnuih thâo hơte dong. Añăm tam yua hơmâo: rơbung mơsăm, rơsun, tơpung kơtor, tơpung braih hăng ngok hra, hạt nêm dong. Rơbung pơđăm brơi mơsăm, tơpung braih lĕ ƀu kơƀah ôh lơ̆m hơte añăm anai. Đah kơmơi M’nông tul braih jing tơpung hlâo kơ hơte añăm tơpung.

Blung hlâo, ƀing gơñu trăm braih amăng ia mơng 30 truh pơ ha mông. Lơ̆m braih lê̆ hlong hĭ brơi kơ khŏt ia, dưm nao amăng sung tul brơi pơsăn. Ră anai arăng juăt ba braih nao uă brơi kơ pơsăn jing tơpung, samơ̆ tul hăng tơngan kah mơng ƀâo hiam. Amai H’Nụ Budam, ƀuôn Ea Rông, să Krông Na, tơring glông Buôn Đôn, tơring čar Dak Lak brơi thâo, tơlơi yôm hloh lơ̆m hơte añăm tơpung lĕ lơ̆m tuh ia kuar na nao hŭi tơpung pơkôl hăng tŏ apui brơi gap ƀrô kiăng añăm tơsă jơman.

“Añăm tơpung jơman rah hăng anai lĕ añăm ƀong juăt yua amăng plơi pla ƀing gơmơi, anai lĕ añăm hơte hăng rơbung, kơtor, rơsun hơmâo prap lui hlâo. Añăm anai hơte hrŏm rơbung hăng tơpung kơtor, tơdơi anun ƀing gơmơi tul tơpung braih kiăng hơte hrŏm laih anun dưm ngok hra gap ƀrô ƀong, abih bang mơnuih amăng sang anŏ gơmơi, mơng thâo rơma truh pơ čơđai lêng kơ hor ƀong soh, anai lĕ añăm ƀong jơman amăng sang anŏ’’.

Lơm ƀong añăm ƀâo mơngưi hăng jơman biă mă. Añăm anai juăt ƀong pơ ala brơi asơi ƀudah ƀong hrŏm hăng asơi. Lu mơnuih hor biă mă yua ƀong mơmih mơng kơtor, mơsăm mơng rơbung hrŏm hăng asơi amuăn dong. Añăm anai ƀong ngă hiam amăng hlung pruăi yua anun ƀing tha rơma hăng čơđai lêng kơ hor soh.

Lu mơnuih djuai ania M’nông thâo hơte hăng lăng anai lĕ sa amăng hơdôm añăm ƀong jơman mơng djuai ania pô. Anai lĕ sa añăm ƀong ƀu kơƀah ôh amăng hơdôm hrơi ngui ngor, pơdô̆ rơkơi bơnai, mơyut jôk amăng plơi pla, hơmâo neh met wa hơte amăng hơdôm hrơi ngui ngor čơkă tuai mơng ataih nao lăng gru grua tơnă hơbai mơng djuai ania M’nông. Amai H’Nụ Budam, Buôn Ea Rong, să Krông Na, tơring glông Buôn Đôn, Dak Lak brơi thâo:

“Ƀơi anai ƀing gơmơi ƀong rĭm hrơi añăm tơpung anai ƀudah amăng hơdôm hrơi ngui ngor pơhmutu lĕ pơdô̆ rơkơi bơnai, buh kông, mơyut jôk, añăm tơpung lĕ ƀu kơƀah ôh hăng mơnuih djuai ania M’nông. Añăm tơpung anai ƀong rĭm hrơi amăng sang anŏ hăng juăt hơte pioh čơkă tuai rai ngui amăng plơi pla’’.

Ră anai, tơlơi hơdip kơ mơnuih djuai ania M’nông jơnap tui yơh samơ̆ añăm tơpung kơtor tui gru grua ƀu kơƀah ôh amăng mông ƀong huă rĭm hrơi. Sa añăm ƀong hơte huăi tơnap samơ̆ jơman ƀâo hiam, jê̆ giăm hăng ƀing hlơi hor añăm ƀong djuai ania M’nông ƀơi Buôn Đôn amra thâo dong gru grua mơng ană plơi pla ƀơi anai./.