Tui phiăn juăt mơng djuai ania Jarai, tơdơi kơ djai, bơngăt atâo ăt dŏ wir jum dar mơn, kơplah wah mơnuih djai hăng mơnuih dŏ hơdip ăt hơmâo tơlơi tô nao rai. Yua anun, rĭm hrơi ƀing dŏ hơdip ăt nao čuă pơsat atâo, rơmet pơagaih hăng ba nao asơi huă añăm ƀong brơi kơ atâo. Tơdơi kơ sui hrơi, bruă anai amra pơđut hĭ tơdơi kơ arăng pơphun ngă yang pơthi. Kiăng kơ pơhrô̆p jing atâo hlŭ amăng hrơi ngă yang pơthi, kiăng hrŭp hăng bơngăt atâo, arăng mă hlŭ jŭ ƀlip pik đơr hơr drơi jăn. Pik brơi kơ sat hloh lăng kar hăng atâo jing klă yơh. Amăng hrơi ngă yang pơthi khŏm hơmâo atâo hlŭ yơh. Amai Siu Thỏi, djuai ania Jarai, dŏ amăng să Ia Mơ Nông, tơring glông Chư Pah, tơring čar Gia Lai brơi thâo:

“Tui tơlơi phiăn mơng djuai ania Jarai lơm ngă yang pơthi khŏm hơmâo atâo hlŭ. Arăng pik hlŭ đơr hơr drơi jăn jing atâo hlŭ yơh”.

Mơnuih djuai ania Jarai pơmĭn ƀing Bram lĕ ƀing bơngăt atâo giăm mơnuih, wai pơgang brơi mơnuih djai mơng ƀing atâo sat pơkŏn, ƀudah anai lĕ pơ ala brơi ƀing mơnuih rơngiă pot glăi pơƀuh amăng tơlơi hơdip, ngui ngor hrŏm ană plơi pla jum dar pơsat. Amai Rơ Châm H’Xuyết, djuai ania Jarai, dŏ amăng să Ia Mơ Nông, tơring glông Chư Pah, tơring čar Gia Lai brơi thâo:

“Arăng juăt pik hlŭ đơr hơr drơi jăn amăng hrơi ngă yang pơthi. Lơm ngă atâo hlŭ arăng juăt hơgŏm ƀô̆ mơta, anăn apăn. Ƀô̆ mơta pik jing atâo hlŭ ƀudah arăng klum miu pơkra mơng phun pơtơi kiăng kơ gôm hĭ ƀô̆ mơta mơnuih ngă atâo hlŭ. Atâo hlŭ pơ ala brơi mơnuih rơngiă hăng mơnuih dŏ hơdip.

Mơnuih arăng ruah ngă Bram lĕ ƀing mơnuih añrăng găng, arăng đăo gơnang. Bruă pik hlŭ kiăng pơhlôm hiưm pă anăm brơi arăng thâo krăn ƀing gơñu, tơdah arăng thâo krăn, pô ngă Bram anai aka ƀu ngă pơgiong bruă jao hăng atâo amra mă.

Amai Rơ Châm Hà, djuai ania Jarai, mơnuih ƀôn sang să Ia Mơ Nông, tơring glông Chư Pah, tơring čar Gia Lai brơi thâo:

“Atâo hlŭ juăt pơƀuh amăng hrơi ngă yang pơthi mơ̆ hrơi pơkŏn ăt ƀu ƀuh lơi. Kơnong ƀing đah rơkơi kah dưi ngă atâo hlŭ mơ̆ ƀu brơi đah kơmơi ngă atâo hlŭ. Juăt hơmâo ƀing pơprong hăng ƀing čơđai ngă atâo hlŭ, tui tơlơi rơkâo, bruă ruah mơnuih ăt tui hluai pô pơsat mơn. Đưm hlâo adih mơnuih ngă atâo hlŭ kiăng khŏm mơn. Mơnuih ngă atâo hlŭ juăt lĕ mơnuih hơmâo bơnai djai laih ƀudah aka ƀu dô̆ bơnai”.

Ƀing ngă Bram arăng pơpŭ biă mă, kiăng hơmâo grup čing hơgor nao čơkă mơng anih pik hlŭ ba nao truh pơsat. Tơdơi kơ ngă atâo hlŭ ƀơi pơsat, ƀing Bram ăt pot glăi hơdip tui hơđăp mơn. Ƀing mơnuih ngă Bram hrŏm hăng ană plơi pla mơñum ƀong, adôh suang, bơră ruai ngui mơ-ak hrŏm. Amai H’Uyên Niê, kơ-iăng khua khul đah kơmơi să Ia Mơ Nông brơi thâo:

“Bram juăt pơƀuh amăng hrơi ngă yang pơthi mơ̆ hrơi pơkŏn ƀu ƀuh ôh. Bram pơ ala brơi ƀing bơngăt kơ mơnuih rơngiă, arăng nao mơñum ƀong hrŏm, ngui ngor hrŏm amăng hrơi ngă yang tơ̆i pơsat anai. Yua tơdơi kơ hrơi anun, arăng ƀu dưi ba nao asơi añăm pơsat atâo dong tah. Bram lĕ ƀing mơnuih dŏ hơdip samơ̆ pơ ala brơi bơngăt atâo. Atâo hlŭ dưi ngui hrŏm, rơbat jum dar pơsat kiăng kơ ngui hrŏm hăng neh met wa kơnung djuai adơi amai, sang anŏ amăng hrơi rơnuč hlâo kơ glăi pơ ơi yă hlao”.

Mơnuih djuai ania Jarai pơmĭn mơnuih rơngiă hăng mơnuih dŏ hơdip ăt tô nao rai mơn. Bruă pơhrô̆p jing atâo hlŭ amăng hrơi ngă yang pơthi, kiăng pơdah pran hơdor, tơlơi pơpŭ mơng mơnuih dŏ hơdip hăng atâo. Arăng čang rơmang bơngăt atâo dưi wai pơgang, pơpŭ brơi mơnuih dŏ hơdip suaih pral, ană plơi pla hơmâo tơlơi hơdip rơnuk rơnua, trơi pơđao, yâo mơ-ak./.