Ƀơi ƀuôn Ea Mao, să Tân Tiến (Dak Lăk), yă Hliêt, djuai ania Jeh-Triêng (78 thun) thâo rơngaih mơñam mơ̆ng hrơi ñu phrâo dŏ rơkơi. Mơnuih kơhnăk bruă mơñam mrai yă Hliêt brơi thâo, tơhmua đah bơnai yơh pô pơtô brơi ñu mơñam: “Đưm adih, yua tơhmua kâo pơtô brơi tong ten, tơdah ta ƀu mơñam klă, ƀu hiam, ngă trung, tơsut mrai lĕ ñu mă gai taih ƀơi tơngan hlao...Tơdah kâo pơhrua mrai ƀu djơ̆, ƀu tui gru, ƀu djơ̆ bơnga thơ ñu hơañah hĭ tơngan kâo mơtăm yơh”.

Sit anŏ pơtô djơ anun yơh mơ̆ng hơmâo mơnuih mơñam mrai kjăp tơngan tui anai. Tui hăng tơlơi phiăn mơñam mrai mơ̆ng djuai ania Jeh-Triêng, sa blah eng ao juăt hơmâo mơ̆ng 4 truh kơ 6 gru bơnga phara, kah hăng rup ană mơnuih, čim brim, pơtŭ, hla, bơnga...Yă Hliêt brơi thâo, kiăng mơñam giong ha blah abăn, rơngiă mơ̆ng 7 truh kơ 10 hrơi mơtăm, kiăng pô mơñam gir, rơguăt tơngan, hor kơ bruă mơñam kah mơ̆ng dưi; amăng anun, tơnap hloh lĕ bruă jruk bơnga, tơdah ta jruk, klôk bơnga soh ha arăt mrai đôč, ta khŏm ruh hĭ, ngă glăi dong.

Gir hăng bruă mơñam mrai, đa ñu mơñam či sĭ, đa mơñam či brơi kơ arăng. Hăng yă Hliêt, tơlơi yom hloh ƀu djơ̆ sĭ hơdôm prăk ôh, yom lĕ ană tơčô, kơnung djuai amai adơi amăng plơi ăt kiăng na nao đôč eng ao đưm. Ñu dŏ mơñam na nao lĕ yua ƀu-eng kơ ană tơčô, ană plơi, laih dong yua hor kơ bruă mơñam mrai mơ̆ng djuai ania ñu mơn.

Bơ pơ să Đăk Tô, tơring čar Quảng Ngãi, amai Y Trường, djuai ania Jeh-Triêng ăt glăk rŭ pơjing glăi mơn bruă mơñam mrai. Ñu hơmâo tơkeng rai amăng sang anŏ thâo mơñam mrai, hơmâo ƀing yă, ƀing amĭ pơtô glăi. Samơ̆, ñu dŏ rơkơi plơi ataih, amĭ ñu hai lui mơn bruă mơñam mrai, ƀrư̆ ƀrư̆ wơr tui laih. Tơlơi anun ngă kơ ñu ƀu mơak ôh. Ñu glăi črông lăng hăng amĭ ñu, dua amĭ ană ñu mơñam glăi, hơdor glăi bruă đưm mơ̆ ñu hor.

Tui hăng amai Y Trường, tơlơi phara mơ̆ng eng ao Jeh-Triêng lĕ gru bơnga hăng ia iŏm hrĕ mrai. Bơnga juăt kiăo tui plơi pla, lŏn ia anih ta hơdip. Amai Y Trường brơi thâo, eng ao mơñam rơnuk anai hơmâo thim hrĕ mơtah, kơñĭ, samơ̆ jŭ hăng mriah yơh phun ñu: “Hăng gru bơnga djuai ania gơmơi lĕ pơ ala brơi anih dŏ, lŏn tơnah mơ̆ gơmơi glăk hơdip; plơi ta dŏ tơdah hơmâo čư̆ anet čư̆ prong čư̆ đĭ trun lĕ bơnga ñu phara mơn”.

Bruă mơñam eng ao mơ̆ng djuai ania Jeh-Triêng glăk hơmâo pơjing glăi, yua hơmâo internet, plang ngui facebook, zalo...eng ao mơñam hơmâo lu mơnuih thâo. Tơlơi mơ̆ ƀing đah kơmơi Jeh-Triêng kiăng hloh lĕ ƀu kơnong sĭ kloh gơnam đôč ôh, ăt kiăng hơmâo lu hlăk ai rơnuk tơdơi anai thâo mơñam, hrăm tui, răk lui bruă mơ̆ng yă mơ̆ng amĭ ta. Ơi A Mrông, dŏ pơ să Tân Tiến, tơring čar Dak Lăk ăt čang rơmang hơmâo anih kiăng ƀing apăn bruă mơñam mrai rŭ pơjing glăi hăng pơtô kơ ƀing čơđai mơñam: “Tơdơi kơ mă yua Sang gru grua plơi pla să, čang rơmang ƀing apăn bruă mơñam mrai hơmâo anih či mơñam, kơteh, hăng anih prong rơhaih, mơñam mơak hloh...djă pioh bruă mơ̆ng ơi yă ta đưm, brơi ană tơčô ñu hrăm, hla tui”.

Jua không prư̆ mơñam mrai hrơi anai ăt hmư̆ na nao mơn amăng sang, amăng plơi pla djuai ania Jeh-Triêng. Jua mơñi anun ƀu kơnong mơñam rai eng ao, abăn khăn đôč ôh, ăt djă pioh, bong glăi tơlơi hơdor glăi rơnuk đưm mơ̆ng plơi pla, bong glăi bơngăt jua gru grua djuai ania amăng tơlơi hơdip jai hrơi pơplih tui./.