Ƀơi kual gah yŭ tơring čar Dak Lak, jơlan hơdră adoh suang pơdah ƀơi lan sang gru grua -čơkă tuai tơring čar, hơmâo dăp tui klâo črăn: Tơlơi đăo kơnang hrơi mơak prong, Dak Lak-hơdôm tơlơi adoh pơ-ư ang hăng Kiăng hrưn đĭ nao ataih hloh.

Hăng tơlơi adoh suang pơƀut lu mơta, pơdah thâo mông mơak hrơi ruah khua dêh čar, bơni hơ-ơč tơlơi gơgrong ba mơ̆ng ping gah, khua mua pơ ala mơnuih ƀôn sang dêh čar hăng boh tŭ yua kơ tal ruah khua. Gru grua kual Dap Kơdư dưi pơƀuh brơi rơđah hloh amăng hơdôm mơta tơlơi adoh, suang djă pioh jua mơñi mơ̆ng čing hơgor, rup rap plơi pla, čư̆ siăng hăng anŏ kiăng pơđĭ kyar amăng kual lŏn.

Amăng mông anun mơ̆n, pơ kual gah ngŏ tơring čar lĕ, hơmâo jơlan hơdră adoh suang pơphun ƀơi tơdrŏn lăk Phú Yên, phường Tuy Hòa, ngă kơ hrơi mông mlam mơak biă mă brơi mơnuih ƀôn sang nao ĕp lăng, pơtong rơđah tơlơi gum pơgôp djuai ania, gum pran hrŏm man pơdong tơring čar Dak Lak jai hrơi pơđĭ kyar.