Amăng ayuh hyiăng rơ-ơ̆ rơ-ŏt, anih ia ling tơdjoh trun ƀơi kơčong čư̆ gah yŭ pơ-iă glăk pơčrang trun, jua čing hơgor bang tơ-ua mơng anih ngui pơdơi pran Hồ Gia Trang Lâm Hà, Lâm Đồng. Jum dar apui djuh, ƀing đah kơmơi djuai ania K’ho buh eng ao djuai ania pô, yak tơkai hơdai tơngan jum dar, atông čing hring hơgor. Jua čing hơgor hmư̆ tơ-ua kar hăng iâu glăi hơdôm tơlơi sô hơđăp mơng rơnuk ơi yă. Pô hyu čuă ngui Phạm Thị Vân, brơi thâo: lăng grup čing đah kơmơi atông, ƀuh hiam mơ-ak samơ̆ ăt pơdah pran kơtang dong:

“Grup atông čing yak rơbat mut hrŏm ngă kơ jua čing hơgor hmư̆ ăt mơ-ak mơn, hrŏm hăng tơlơi ayun suang dong amra ngă kơ mông atông čing ba glăi er atông phara ƀiă pơhmu hăng grup čing đah rơkơi; lăp djơ̆ hăng gru grua mă kơnung gah amĭ mơng djuai ania K’ho”.

Juăt ngui atông ƀơi anih čuă ngui ƀơi Lâm Hà lĕ grup atông čing đah kơmơi Bồ Liêng. Grup hơmâo rơbêh 20 čô ding kơna, amăng anun 6 čô đah kơmơi atông čing, dŏ glăi lĕ ƀing ayun suang. Rĭm čô mơnuih-mơng yak tơkai hơdai tơngan truh pơ dưm plă tơngan ƀơi tlôn čing-lêng kơ pơƀuh anŏ hiam. Ƀu djơ̆ kơnong lăng hiam ƀơi tơkai tơngan đôč ôh mơ̆ ăt hiam mơng hơdôm er atông čing hơgor. Amai K’Phèn, ding kơna amăng grup atông čing đah kơmơi Bồ Liêng, dŏ ƀơi să Đinh Văn Lâm Hà, tơring čar Lâm Đồng brơi thâo:

“Kâo hor biă mă čing hơgor mơng djuai ania pô, anai lĕ gru grua pioh glăi mơng ơi yă đưm hlâo adih. Tơlơi hor ñu đăm amăng kơtăk drah mơng hơbin ăt ƀu thâo lơi. Truh ră anai kâo pô ăt thâo atông lu tơlơi adôh mơng djuai ania K’ho gơmơi”.

Amăng grup čing Bồ Liêng, amai K’Phôn ăt lĕ sa čô mơnuih đok adôh tơlơi adôh đưm djuai ania K’ho mơ-ak hloh. Ñu brơi thâo:

“Lơm nao ngui atông ƀudah nao pơplông pơ hơpă grup čing hơgor gơmơi lêng kơ hơmâo lu mơnuih hor biă mă, tŭ mă tơlơi pơpŭ bơni mơng abih bang. Yua ƀing adơi amai atông čing rơguăt tơngan soh, jua atông pơmut hrŏm, thâo atông lu tơlơi adôh, hrŏm hăng buh eng ao hiam dong, tơlơi anai ngă ƀing mơnuih nao lăng, nao hmư̆ ƀuh phara, hiam dong. Pơ anăp anai, ƀing gơmơi amra pơtô glăi ƀing čơđai dong, blung hlâo ƀing čơđai amăng kơnung djuai, ƀing gơñu amra jing rơnuk tŏ tui atông čing. Kâo pô amra mut hrŏm bruă pơtô brơi ană tơčô, čang rơmang gru grua mơng ơi yă amra dŏ djă pioh na nao”.

Tha plơi, mơnuih kơhnâo kơhnăk K’Bes-mơnuih akŏ pơjing grup atông čing đah kơmơi Bồ Liêng sui 15 thun laih, ră anai ăt lêng kơ kiăo tui lăng bruă mă amăng grup. Amăng sui thun ñu hơmâo pơtô brơi rơbêh 200 čô mơnuih atông čing, tơlơi kơđŏm glăi lĕ ƀing čơđai đah kơmơi:

“Ră anai, kâo glăk tŏ tui pơtô atông čing brơi djop rơnuk. Thun hlâo kâo pơtô brơi ƀing čơkă glăk hrăm anih 5, anih 6, tơdơi anun lĕ ƀing hlăk ai mơng 30-40 thun. Tơdah pơhmutu djop rơnuk hrăm atông čing mơng hlăk ai čơđai, truh ƀing pơprong, grup đah kơmơi hrăm atông tañ ƀiă, tañ thâo atông lu tơlơi adôh hloh pơhmu hăng grup pơkŏn. Ƀing đah kơmơi hor hrăm atông čing biă, kâo aka ƀu ƀuh ƀô̆ ƀơi anih hrăm mơ̆ ƀing gơmơi dŏ tơguăn hlâo, djơ̆ mông biă, gir kơtir hrăm anun kâo hok mơ-ak biă. Đa kâo hơmâo pơtô pơhrua brơi dong kiăng ƀing čơđai thâo atông hơdôm tơlơi adôh tañ, ngă kâo hok mơ-ak biă”.

Amăng hrơi blan rơgao, Grup čing đah kơmơi Bồ Liêng hơmâo mut hrŏm amăng lu tơlơi ngui gru grua, hơdôm hrơi ngă yang, ngui ƀong tê̆t, hrơi ngui ngor pơprong mơng djuai ania Việt Nam. Ƀing gơñu ăt hơmâo hơdôm anih čuă ngui amăng ƀon lan “jak iâu” mut hrŏm bruă tuai čuă ngui amăng plơi pla. Mah pơ anih ngui hơpă tŭ mơn, ƀing gơñu ăt jê̆ giăm hăng pran pơpŭ kơ čing hơgor-gơnam pơ ala brơi tơlơi mơyang amăng tơlơi hơdip gru grua mơng djuai ania K’ho. Anŏ hiam mơng grup čing hơgor đah kơmơi Bồ Liêng rôk tui ia krông Dă Đờng pơgôp ngă pơhưč mơng gơnong bruă tuai čuă ngui Lâm Đồng. Ơi Nguyễn Văn Thạnh-Kơ-iăng Khua anom bruă bơwih bơwang djop mơta să Đinh Văn Lâm Hà, tơring čar Lâm Đồng brơi thâo:

“Ƀon lan hơmâo pơphun hơdôm tour čuă ngui gru grua, ƀing tuai hor ĕp lăng gru grua čing hơgor biă mă. Anai ăt lĕ bruă mă kiăng ƀon lan lăi pơthâo gru grua čing hơgor tơl tuai čuă ngui. Mơng anun, hơmâo dong bruă mă, ƀing kơhnâo kơhnăk hơmâo dong prăk pơhrui kiăng pơtrut pran pơlir hăng bruă djă pioh gru grua djuai ania”.

Grup čing Bồ Liêng ƀu djơ̆ kơnong ngă pơƀuh djop gru grua čing hơgor mơng djuai ania K’ho đôč ôh mơ̆ ăt glăk pơgôp djă pioh tŏ tui gru grua djuai ania, ngă atur brơi pơđĭ kyar bơwih ƀong huă, mơnuih mơnam jai hơđong kjăp ƀơi kual mơnuih djuai ania ƀiă Lâm Hà, Lâm Đồng. /.