Mơng lan sang Đình Lạc Sơn, jua čing hmư̆ bang mơng mơguah sing bring, kar hăng tơlơi jak iâu, iâu neh met wa nao ngă yang yôm hloh tơdơi kơ hrơi ƀong tê̆t. Mơnuih tha rơma, ƀing čơđai buh sum ao hiam pơtum pơƀuh, prap yak nao hrơi mông pok blung sa thun bơwih ƀong phrâo.

Tui phiăn juăt mơng mơnuih djuai ania Mường, gong drai hơmâo pơdong mơng lơ 27 blan 12, kơđŏm glăi hrơi mông pơdơi ƀong tê̆t. Lơm ruh pơtrun gong drai ăt lĕ hrơi mông pơđut hĭ hơdôm hrơi ngui bơyan bơnga, neh met wa pơwot glăi ngă đang hmua. Ngă yang ruh pơtrun yôm phăn biă mă kiăng pơdah bơyan ngă hmua phrâo, hơkrŭ pran đăo gơnang brơi sa thun bơwih ƀong gêh gal.

Mơnuih kơhnâo kơhnăk Bùi Văn Thành, pơphun ngă yang ƀơi Đình Lạc Sơn brơi thâo, tơlơi ngă yang ruh pơtrun gong kiăng kơwưh đĭ tơlơi rơnuk rơnua hăng trơi pơđao.

“Rơkâo plơi pla hơmâo tơlơi rơnuk rơnua, lŏn ia rơngai, mơnuih ƀôn sang yâo mơ-ak. Mơnuih djuai ania Mường amăng plơi akŏ thun phrâo ngă yang ruh hĭ gong drai, pơphun ngă hmua, hmua pơdai ia ngă pơdai, hăng kơčong čư̆ pla kơtor, pla hơbơi plum brơi kơ hiam, huăi ƀuh hlăt mŏt, pơdai huăi ƀuh arŏng aroač ƀong, kơtor huăi ƀuh čim brim phă, hơbơi plum huăi ƀuh hlăt ƀong; hăng brơi ană mơnuih ƀôn sang djuai ania Mường suaih pral, tơdăm dra dưi pơyai brơi rơkơi bơnai, ană plơi pla hơdip hơđong”.

Ƀơi phường Tân Lập ră anai hơmâo 7 boh plơi pla lu djuai mơng djuai ania Mường rai dŏ mơng kual kơdư. Mơng lơ 7 truh pơ lơ 10 blan 1, rĭm boh sang anŏ pơphun ngă yang ruh pơtrun gong drai, ba glăi hrơi ngă yang, ngui ngor gru grua plơi pla tŏ tui na nao amăng hơdôm hrơi akŏ thun phrâo.

Yă Bùi Thị Hợi, dŏ amăng ƀut plơi 2B, phường Tân Lập brơi thâo, neh met wa prap lui tơlơi ngă yang mơng hơdôm hrơi hlâo anun, hăng čang rơmang djă pioh gru grua brơi rơnuk tơdơi dong.

“Lơm ƀing ta ngă tui anun, ƀing ta amra pơƀuh brơi ană tơčô thâo gru grua mơng djuai ania Mường hiưm pă kiăng ană tơčô thâo rơđah, kiăng tơdơi anai ƀing gơñu ăt pơtô glăi rơnuk tơdơi dong”.

Tơdơi kơ mông ngă yang lĕ mông ngui dik dak mơ-ak. Anun ngui glŏm boh, sa tơlơi ngui đưm mơng djuai ania Mường pơhưč lu mơnuih mut hrŏm. Arăng glŏm đĭ hrŏm hăng tơlơi ur mơ-ak pơdah tơlơi čang rơmang čeh čar, trơi pơđao. Ngui dui hrĕ, đĭ gong pik ia mơmuă, ataih un lŏn, mă bip…ngă kơ anih ngui ngor amăng plơi pla jai dik dak mơ-ak.

Hơdôm thun giăm anai, tơlơi ngui ngor ăt hơmâo tơlơi mut hrŏm mơng tuai ataih giăm, amăng anun hơmâo tuai mơng tač rơngiao. Ơi Mark Schmidt, tuai čuă ngui mơng Canada lăi pơthâo lơm tal blung a nao lăng ngă yang:

“Kâo hok mơ-ak biă hăng hăng pơ-ư ang lơm mut hrŏm hrơi ngă yang anai. Anai lĕ bruă mă yôm biă kiăng pơlir ană plơi pla, sang anŏ hăng dêh čar. Tơlơi ngă yang anai pơpŭ kơ gru grua đưm hlâo, tơlơi hơdip ră anai hăng anăp nao kơñ pơgi hiam klă. Kâo čang rơmang yua kơ hơmâo tơlơi pơdrong asah amăng lŏn ia hăng tơlơi yâo mơ-ak mơng mơnuih ƀôn sang. Anai lĕ sa tơlơi hok mơ-ak biă mă, hăng kâo čang rơmang ƀing gơmơi dưi mut hrŏm hơdôm tơlơi ngă yang tui anai lu ƀiă dong”.

Tơlơi ngă yang ruh pơtrun gong drai mơng djuai ania Mường ƀơi Dak Lak tŏ tui sui thun laih, kiăng djă pioh gru grua mơng mơnuih mơnam amăng plơi pla phrâo. Tơlơi ngă yang ruh hĭ gong drai pơđut hĭ hơdôm hrơi ngui bơyan bơnga, pok rai bơyan tơjuh pla phrâo hăng tơlơi đăo gơnang, gir run hăng čang rơmang sa thun bơwih ƀong gêh gal, tơlơi hơdip trơi pơđao./.