Kiăng kơ prap lui hrơi ngă yang yôm phăn anai, mơnuih amăng ƀuôn H’ring krong ha mlăm. Mơng pin ia akŏ plơi truh pơ hơdôm boh apur amăng sang glông lêng kơ rơmet pơagaih. Gong drai pơdong tong krah lan sang kar hăng tơlơi jak iâu yang rơbang glăi ngui ngor hrŏm. Ƀơi anih ƀong huă, hơdôm gơnam ƀing jơman hloh mơng đang hmua glai rưng hơmâo pŭ đĭ; mơng asơi brong rơmuăn ƀâo hiam, tơpai čeh, truh pơ akan, mơnong brong hăng añăm kuih dong. Anai ƀu djơ̆ kơnong lĕ gơnam ƀong huă đôč ôh mơ̆ hăng lĕ ia hâ̆u ia hang, tơlơi ba glăi mơng đang hmua tơdơi kơ ha thun mă bruă glêh glar. Bơră ruai lăi nao hrơi ngă yang anai, amai H’Luyết, ƀuôn H’ring, să Čư̆ M’gar ol kơdol brơi thâo:

“Bơyan pơhrui thun anai ăt hơmâo hmăi, sĭ hơmâo nua dong yua anun neh met wa amăng plơi pla hlơi hlơi lêng kơ hok mơ-ak. Bruă pơphun čơkă ngă yang huă asơi hle pơphun dik dak mơ-ak. Hluai tui tơlơi ngă yang anai, ană bă ăt dưi hmư̆ ƀing ơi yă amĭ ama bơră ruai glăi tơlơi phiăn sô hơđăp mơng ơi yă, mơng anun jai khăp hăng pơ-ang gru grua hiam klă mơng djuai ania ta”.

Ƀu djơ̆ kơnong lĕ bơyan pơpŭ bơni, ngă yang huă asơi hle ăt lĕ anih ngă kjăp tui pran gum pơgôp, anih hơdôm tơlơi găn rơgao amăng ngă hmua hơmâo lăi pơthâo rơnuk tơdơi. Lăi nao nao dơlăm ƀiă gru grua ngă yang anai, ơi Joang Chả, khua git gai Ping gah ƀuôn H’ring brơi thâo:

“Mơnuih djuai ania Sêdang hơmâo tơlơi ngă yang huă asơi hle pơphun rĭm thun. Tơdơi kơ ha thun mă bruă glêh glar, truh bơyan pơhrui hăng yuă hơpă giong, neh met wa amra yua pơdai phrâo ba nao tăp hăng pơphun ngă yang huă asơi hle. Tơlơi ngă yang kiăng rơwưh đĭ yang rơbang pơgang brơi thun phrâo hơjan rơnang angĭn mơ-ak, tơlơi hơdip tơpă, bơwih ƀong đĭ tui”.

Hrŏm hăng neh met wa ƀơi anai, tơlơi ngă yang huă asơi hle ƀơi ƀuôn H’ring pơhưč lu tuai. Amăng jua čing hơdor bang tơ-ua amăng glai čư̆, amai Lê Thị Long, tuai čuă ngui mơng ƀôn prong Hồ Chí Minh hok mơ-ak brơi thâo anai lĕ tal 2 ñu nao lăng tơlơi ngă yang anai.

“Tal 2 kâo rai lăng tơlơi ngă yang. Ngă yang huă asơi hle kâo ƀuh jing gru grua yôm phara mơng djuai ania Sêdang ƀơi anai hăng neh met wa ƀơi anai hơdip jê̆ giăm, rơhmač. Rơngiao kơ tơlơi ngui atông čing, kâo ăt dưi ƀong gơnam ƀong jơman mơng mơnuih djuai ania. Kâo pơpŭ kơ neh met wa ƀơi anai suaih pral, mơ-ak mơ-ai, bơyan tơdơi pơhrui glăi hơmâo hmăi dong”.

Tơlơi ngă yang huă asơi hle thun 2026 ƀơi ƀuôn H’ring yôm phăn biă mă hăng gong gah laih dong mơnuih ƀôn sang. Anai lĕ bruă gru grua pơprong blung a hơmâo pơphun tơdơi kơ pơmut hrŏm, dưm dăp glăi anih anom mă bruă gưl să. Hăng tơlơi hok mơ-ak hrŏm mơng neh met wa, ơi Nguyễn Tuấn Anh, kơ-iăng khua Jơnum min mơnuih ƀôn sang să Čư̆ M’gar brơi thâo:

“Tơdơi kơ pơmut hrŏm, gong gai ƀon lan ba tơbiă bruă djă pioh, tŏ tui gru grua djop djuai ania lĕ bruă yôm phăn. Hok mơ-ak lơm djop boh tơhnal kah hăng bruă pơphun ngă yang lêng yua mơnuih ƀôn sang amăng plơi pla ngă. Gong gai ƀon lan hăng gưl Ping gah djru brơi ha bơnah prăk kak hăng sa, dua boh tơhnal kiăng hloh, bơ neh met wa lêng gơgrong ngă tui. Hlaui tui tơlơi ngă yang anai, pran gum pơgôp, pơlir amăng plơi pla djuai ania Sêdang  kah hăng kơplah wah djop djuai ania dŏ hơdip amăng plơi pla ieo gah hơmâo kơtưn kjăp”.

Tơlơi ngă yang huă asơi hle pơđut hĭ hăng pran jua hur har, jing hrĕ tô nao rai mơnuih mơnam kjăp phik amăng hơdôm hrơi akŏ thun. Hơdôm kơčok tơpai hăng tơlơi ayun suang dik dak kar hăng tơlơi pơsit tong brơi pran kơtang mơng gru grua djuai ania Sêdang ƀơi kual čư̆ siăng Dak Lak. Tơbiă mơng ƀuôn H’ring, tơlơi pơƀuh glăi sa bơyan pơdai jor kơtor mơboh pran khăp pap amra tŏ tui na nao hrŏm hăng jua čing hơgor ƀơi kual čư̆ siăng./.