Ơi Saadi H.M Salama, Khua anih jưh pơ ala kơnuk kơna lŏn ia Palestin ƀơi Việt Nam, Khua grup pơtom hiăp dêh čar tač rơngiao ƀơi Việt Nam nao jơnum hrŏm ĕp lăng tơlơi atông čing kual Đông Nam Á thun 2025 yua tơring čar Lâm Đồng pơphun ƀơi plơi prong phun Đà Lạt rơnuč blan 12/2025 lăi:

“Lơ̆m jua čing tơ-ua đĭ, ƀing ta hmư̆ kah hăng jua ia rô amăng čroh hnoh, jua angin pưh amăng glai klô kmrơ̆ng thông, mut tơma hrŏm jua bơtơpư̆ amăng tơlơi hơdip ană mơnuih, pơjing rai anŏ hiam mut tơma dơlăm amăng pran jua adih, jing pran kơtang hăng yom pơphăn biă mă. Jua čing hơgor ƀu kơnong jua mơñi adoh suang đôč ôh, jing jua mơñi amăng bơngăt jua phun djuai ania đưm, mơ̆ng ană plơi pla hăng mơ̆ng pran jua ƀu dưi pơrai ôh”.

Tŏ tui hăng lu bruă mă, ƀrô bơyan têt ngă yang thun phrâo Bính Ngọ 2026 thun anai, tơring čar Lâm Đồng ăt pơphun lu tơlơi jơnum ngui ngor mơak gru grua. Tơlơi yom phara ñu lĕ thun blung a “glăi hrŏm sa boh sang” bruă ngă hơgĕt ăt hơmâo djop djuai ania mơ̆ng lu tơring “Lŏn glai rơbâo rơbăn bơnga Đà Lạt”, nao pơ anih “Lŏn glai hing ang Dak Nông” truh pơ “Ia rơsĭ  jơngeh Bình Thuận”. Amăng jua jĭng čêng ƀudah čing hơgor ik ăk, kơdok kơdor, ƀing mơnuih kơhnăk djuai ania K’Ho, Bơnông, Čăm, Mạ....tơring čar Lâm Đồng hrŏm hơbit kiăo tui jua čing ayun suang, pơdah tơlơi kơdưt kơdăt suang atông čing, lăi pơthâo brơi anŏ hiam amăng gru grua djuai ania pô kơ gơyut gơyâo, mơnuih ƀôn sang hăng tuai rơnguai lăng. Mơnuih kơhnăk gru đưm Ka Yuip ( Ka Duýt), dŏ ƀơi să Đinh Trang Thượng, kah pơphă tui anai:

“Ƀing gơmơi djuai ania K’Ho, hrơi anai mơak biă dưi rai ngui hrŏm Hrơi mơak prong atông čing hơgor hăng khul atông čing djuai ania adơi ayong pơkŏn. Rai pơ Hrơi mơak anai, ƀing kiăng bưp nao rai hrăm tui tơlơi tom găn rơgao, thâo thăi amăng bruă djă pioh gru grua hiam djuai ania pô, amăng anun anŏ hiam gru grua adoh suang hăng atông čing yơh gơgrong phun. Truh pơ anai, tơlơi mơ̆ gơmơi ƀuh, ƀu djơ̆ kơnong tơlơi mơak đôč ôh, jing yom hloh hrăm tui bruă djă pioh gru grua djuai ania ƀiă lăi hrŏm hăng bruă djă pioh čing hơgor kông ngăn yom phara biă mă kơ djuai ania pô”.

Ƀu kơnong dŏ glăi dơ̆ tơlơi thâo hluh pioh wai pơgang đôč ôh, lu mơnuih kơhnăk gru đưm ƀơi tơring čar Lâm Đồng hơmâo ba yua gru grua hiam adoh suang, čing hơgor pioh čơkă tuai hyu ngui amăng plơi pla, kiăng djă pioh rah gru grua đưm, laih anun pơsir bruă mă kơ mơnuih ƀôn sang amăng plơi pla. Gong gai kơnuk kơna tơring čar ngă tui hơdai gum lu bruă mă, jơlan hơdră, akŏ bruă, boh nik ñu Jơlan hơdră mơ̆ng dêh čar pơkă djru pơđĭ kyar bruă čơkă tuai hyu ngui amăng plơi pla.

Mơ̆ng hơdră bruă anai, tal blung tơring čar Lâm Đồng hơmâo akŏ pơjing rai lu mơta gơnam sĭ mơdrô djă hnơ̆ng gru grua hơjăn, lir hơbit hăng bruă ngă hmua, akŏ pơjing plơi pla ngă bruă pơkra ming gơnam sĭ mơdrô laih anun pơdah thâo gơnam gru grua tơlơi hơdip mơda rim hrơi. Mơnuih kơhnăk Y Breng, ƀon Phai Kon, phường Đông Gia Nghĩa, tơring čar Lâm Đòng brơi thâo:

“Tơdah lui hĭ gru ama grua amĭ djuai ania ta či rơngiă mơtam yua kơ anun khom djă pioh glăi. Hlơi kiăng hrăm bruă ngă anun, hơgĕt kâo thâo amra pơtô brơi mơtam, kơñ pơgi tha rơma ƀudah duăm ruă hiư̆m lĕ hlơi dŏ djă pioh brơi. Ăt khom hrăm tui ƀơƀrư̆ yơh lah brơi gơñu djă pioh kah hăng čing, hŭi kơñ pơgi ni anăp rơngiă hĭ gru grua djuai ania ta. Ră anai, lu View jing anih lăng hiam, hmua đang mơak Farm arăng jak iâu gơmơi nao atông čing gơmơi ăt nao na nao đôč. Tal blung a khom mă prăk ta pô yơh apah kơ ƀing adơi ayong atông čing, sit truh pơ anih đang hmua jing anih ngui ngor ƀơi Farm, ƀing nga View anun arăng tla glăi prăk kơ ta. Ƀơi anŏ sa wơ̆t hrơi tơjuh, ƀơi anŏ sa dua hrơi arăng brơi yơh prăk kơ ta ƀing atông čing”.

Ƀơi tơring čar Lâm Đồng, hơdôm anih ngui ngor atông čing, djă pioh gru grua hiam ăt jing anih pơhưč ƀing tuai nao ngui lu, či ĕp lăng. Ƀơi jơlan Huỳnh Tấn Phát, phường Mũi Né, hơmâo sang djă pioh gru đưm Mũi Né yua kơ pô hơduah ĕp hăng djă pioh Nguyễn Ngọc Ẩn pô git gai. Sang djă pioh gơnam gru grua đưm yua mơnuih ƀôn sang ngă pô anai,  hơmâo djă pioh truh 50.000 mơta gơnam gru đưm hin biă mă yơh thâo ƀuh glăi dơ̆ng. Amăng dua thun mă bruă, sang bruă anai hơmâo čơkă truh 100.000 wơ̆t tuai mut ĕp, lu biă mă ñu ƀing čơđai sang hră, tơdăm dra čơđai sang hră gưl prong mut ĕp kơsem min. Rơbêh 40 thun tong ten hăng bruă mă hyu hơduah ĕp ba glăi pơdă, djă pioh gơnam gru đưm, ơi Nguyễn Ngọc Ẩn ƀu kơnong hyu ĕp djă pioh đôč ôh, ñu dŏ thâo phun tơdŭ ră ruai glăi gru grua phun hơmâo mơ̆ng gơnam djă pioh anun, brơi ƀing tuai thâo hăng tơlơi ñu hor biă mă:

“Anai lĕ, sa ring čing hăng boh pơtâo hiam hloh ƀơi Việt Nam hăng ƀơi rŏng lŏn tơnah. Gơmơi čơkă jum lu mơnuih rơgơi kơhnâo nai tha prin, ƀing nai prin tha GS, TS amăng dêh čar hăng mơ̆ng tač rơngiao mut rai lăng hăng kơsem min djop mơta gơnam gru đưm pơdă pioh anun, jing gơnam gru grua djuai ania Čăm hăng lu adơi ayong djuai ania pơkŏn. Kâo atông lăng brơi kơ ƀing adơi ayong anun hmư̆, gơñu lăi čing anun sui hăng anai rơgao 3000 thun laih, mơ̆ng đưm đă biă mă. Gơmơi lăi pơthâo ring čing pơtâo anai, ĕp ƀuh pơ Di Linh tơring čar Lâm Đồng ƀing ta”.

Tui hăng ƀing khua mua lu sang bruă, ƀing mơnuih kơsem min gru grua đưm, tơdơi kơ pơmut glăi, tơring čar Lâm Đồng hlăk dŏ djă pioh, ngă pô anŏ gêh găl hin biă arăng hơmâo, yua pơtum lu anih hiam, glai klô čư̆ čan, ia ia rơsĭ laih anun mơta gru grua hiam mơ̆ng đưm. Anai lĕ anŏ gêh găl, pran kơtang pơhưč prong biă mă kiăng tơring čar anai pơđĭ kyar bruă čơkă tuai hyu ngui hơđong kơjăp mơ̆ng anŏ hiam, dơlăm lơ̆m gru grua-anih hơdôm rơnoh yom gru grua đưm hlăk dŏ djă pioh hăng tŏ tui pơlar lu, tŏ tui kơ dĭ da gla kơñ. Nai pơtô sang hră gưl prong Đà Lạt, Nguyễn Thị Hà Giang, lăi lĕ:

“Lâm Đồng hơmâo lu anih hiam, glai klô pioh pơhưč tuai hyu ngui. Hrŏm hăng anun, anŏ lăp đing na mơ̆ng Lâm Đồng lĕ, khul plơi pla mơnuih ƀôn sang lu hơbô̆, lu mơta anŏ hiam amăng gru grua pioh pơđĭ kyar tuai čuă ngui hyu ĕp lăng gru grua đưm. Anai jing anŏ gêh găl prong mơ̆ ƀu djơ̆ lăi anih pơpă hai lêng kơ hơmâo soh ôh. Hăng kual lŏn mơ̆ hơmâo lu anŏ gêh găl yang brơi lŏn mơnai glai klô čư̆ siăng hăng gru grua mơ̆ng đưm ba glăi jing anŏ kơtang, ngă lu mơta bơwih brơi kơ tuai hyu ngui hăng pơhưč pran jua ƀing tuai rai pơ anai”.

Hrŏm hăng tơlơi gir run pơsir bruă mă djă pioh pơgang ba gru grua hiam mơ̆ng đưm thun 2025, anom bruă čơkă tuai tơring čar Lâm Đồng hơmâo čơkă rơbêh 20, 7 klăk wơ̆t tuai nao ngui, prăk pơhrui glăi truh 56.800 klai, đĭ tui lu mơta anŏ hơmâo. Kơjăp pran jua hrưn đĭ pơ anăp adih, truh thun 2026, tơring čar Lâm Đồng gir run kiăng čơkă truh 25,8 klăk wơ̆t tuai nao ngui.

Lơ̆m jua čing dŏ tơ-ua đĭ, lơ̆m lu tơlơi ră ruai kơtuai akhan phun ñu hơmâo gru grua hiam, tơring čar Lâm Đồng ƀu kơnong jing anih nao đôč ôh, dŏ jing anih pioh kơ ƀing tuai hyu sem lăng, pơđing hmư̆ hăng djă pioh lu mơta rơnoh yôm phun dŏ hnơ̆ng gru grua amăng lŏn glai čư̆ siăng. Mơ̆ng gru grua hiam truh pơ bruă hyu ĕp lăng, bruă pơgang pioh truh kơ bruă pơđĭ kyar, anŏ hiam amăng gru gruạing hĭ phun pơjing rai pran kơtang djru bruă čơkă tuai hyu ngui ƀơi tơring čar Lâm Đồng pơđĭ kyar hơđong kơjăp.