Yă Lơmu K’Poh djuai ania K’Ho Čil thun anai 70 thun laih, dŏ ƀơi plơi Srê Đăng, să Tân Hội, tơring čar Lâm Đồng brơi thâo, ngă yang pơ anăn, ƀhet tơngia kơ čơđai nge arăng phrâo tơkeng rai, jing tơlơi phiăn juăt gru grua đưm phara biă mă. Anai lĕ mông kiăng sang anŏ pơphun tơlơi ngă yang mơak, lăi pơthâo hăng phung wang, plơi pla thâo sang anŏ hơmâo ding kơna phrâo sa čô ană nge dơ̆ng.

 “Tơdơi kơ hrơi blan pi kian gleh glar, ruă reng, truh hrơi pô amĭ anun đih apui tơkeng rai ană nge, drơi jăn amĭ ăt găng añrăng, pơdơi pơdă ƀiă hrơi, sang anŏ ngă yang ƀhet tơngia hăng pơ anăn kơ čơđai nge tui tơlơi phiăn đưm djuai ania gơmơi. Kiăng kơ tơdơi anai, ană nge truh prô̆ tơdăm prăm dra ƀa tơsâo hiam drơi jăn, jing mơnuih tŭ yua, hmư̆ hiăp amĭ, gưt hiăp ơi yă”.

Lơ̆m ană nge phrâo tơkeng rai năng ai ñu sa wơ̆t hrơi tơjuh, sang anŏ ngă yang ƀhet tơngia yơh. Tơdah sang anŏ kơƀah aka ƀu hơmâo mơnŭ gai tơpai mơñum pioh ngă yang lĕ, gơñu ngă mă anet čuh mơnŭ, tơpai hueč kiăng iâu anăn čơđai nge. Hlâo kơ ngă yang, sang anŏ nao iâu pô rêu yang (pô iâu lăi), mơnuih arăng đăo kơnang ƀudah ƀing anong wa ñu amăng kơnung djuai rai ngă yang iâu brơi anăn, pơ anăn kơ ană nge. Ơi Liêng Hot Ha Kliêng, djuai ania K’Ho Čil dŏ ƀơi plơi Srê Đăng, să Tân Hội, tơring čar Lâm Đồng brơi thâo, ngă yang hơmâo gơnam ba pơyơr, pioh čuh ngă yang ƀhet tơngia kơ ană nge tui tơlơi phiăn djuai ania K’Ho, ăt tui hluai sang anŏ gêh găl, hơmâo gơnam či ngă yang mơ̆n.

 “Hơmâo bui, mơnŭ čuh bui, mơnŭ; kiăng kơ ană nge huăi dju djuăm duăm ruă, huăi sư̆ rơbư̆ amăng tơlơi hơdip dĭ da gla kơñ, ngă bruă rơnuk rơnua mơak klă tơphă tơphai. Giong anun, mơnuih amăng sang anŏ iâu pô tha hloh ah nao plă tơngan ƀơi tơthơi ană nge hăng pơpŭ kơ čơđai nge anun rơnuk rơnua, hiam drơi jăn huăi rơhung atâo ngă sat, pơrung pơrăng djuai ania. Tơdơi anai, laih đĭ prong rơmŏng plin hơmâo pran jua hiam, muih hơdip tơpă, djru man pơdong plơi pla; anun yơh boh yom phun kơ tơlơi ngă yang pơ anăn kơ ană nge gah djuai ania K’Ho ƀing ta”.

 Ngă yang ƀhet tơngia djuai ania K’Ho Čil yom pơphăn biă mă, pơdah rai tơlơi pơtruh brơi, tŏ tui mơ̆ng kơnung djuai hăng plơi pla anih dŏ hơdip mơda. Yua kơ anun,  hlâo kơ pơ anăn ăt tơña hơduah ƀing mơnuih thâo tơlơi phiăn đưm, găn rơgao lu bruă ngă phun đưm đă djuai ania, amăng phung wang añang kor, ƀing tha rơma mơnuih arăng đăo kơnang kiăng ĕp anăn djơ̆ găl. Hăng djuai ania K’Ho Čil ƀơi Tân Hội, sit pơ anăn kơ ană nge đah kơmơi lĕ amra iâu K’Jiêng, K’Ba; tơdah đah rơkơi hă pơ anăn Ha Liang, Ha Kră, Ha Ôñ….Ơi Liêng Hot Ha Kliêng brơi thâo dơ̆ng, anun lĕ hơdôm anăn juăt pơ anăn lir hơbit hăng ƀing mơnuih ba gru hiam hmư̆ hing amăng kơnung djuai đưm đă adih mơ̆ng djuai ania, lơ̆m lăi nao, bâo djơ̆ anăn, djuai ania K’Ho pơ-ư ang biă mă.

“Tui hăng tơlơi phiăn juăt djuai ania ƀing gơmơi, pioh iâu anăn kơ ană nge khom ruah mă anăn ƀing đah rơkơi hơmâo pran jua thâo khăp kơ plơi pla, ala ƀôn, hơmâo pran jua akŏ pơdong plơi pla phrâo či pơ anăn. Hlơi pô ñu đah rơkơi ƀu tơpă, ngă bruă sat, arăng bĕ hĭ anăn ƀing gơñu. Đah kơmơi lĕ hlơi pô ñu hơdip hiam klă mă anăn či hla tui iâu anăn kơ ană bă. Kah hăng yă K’Huê̆, K‘Ba, đah rơkơi ơi Ha Liang, Ha Kră…anun lĕ hơdôm anăn pioh kơ sang anŏ ruah mă či iâu anăn kơ ană nge gơñu, yua ƀing anun lĕ mơnuih hing ang hiam klă tơpă hnơ̆ng, thâo khăp pap, thâo djru tơdruă man pơdong hăng wai pơgang plơi pla ƀôn lan”.

Ta dưi lăi, tơlơi ngă yang ƀhet tơngia ƀudah pơ anăn ană nge mơ̆ng djuai ania K’Ho Čil ƀơi Lâm Đồng ƀu kơnong tơlơi ngă yang gru grua đưm tŭ kơ hơmâo ôh, dŏ jing sa tơlơi đăo kơnang bơngăt jua pơtă pơtăn djop hnơr ƀing čơđai rơnuk tơdơi brơi thâo pơpŭ kơ phun akha sang anŏ kơnung djuai, plơi pla, djă pioh tơlơi phiăn juăt hiam klă đưm, gru ama grua amĭ hiam mơak mơ̆ng ơi yă pioh glăi. Kơnang mơ̆ng anăn, tơlơi khăp pơpŭ pơyom mơ̆ng sang anŏ, tơlơi đăo kơnang čang rơmang hơmâo tơlơi hơdip rơnuk rơnua, hiam drơi jăn, thâo gưt hiăp, thâo pơpŭ hơdor tơngia laih anun thâo gum pơgôp, hơmâo mơ-it nao kơ pô čơđai nge anun. Amăng tơlơi hơdip phrâo mơak rơnuk anai, tơlơi ngă yang ƀhet tơngia ăt dŏ djă pioh na nao mơ̆n, ngă anŏ gơgrong yom, pơtruh nao rai mơ̆ng tơlơi đưm laih rơgao pơ klôn adih hlong djă pioh truh ră anai hăng pơlar tui anŏ hiam kơñ pơgi ni anăp, rông pioh tơlơi đăo bơngăt jua hăng gru grua hiam djuai ania K’Ho Čil.