Mơ̆ng mơguah mơtăm, lu mơnuih pơƀut pơ lan sang Gru plơi ƀon Jarah, să Nâm Nung, tơring čar Lâm Đồng či mut hrŏm tơlơi ngă yang Tăm Ƀlang M’prang ƀon. Amăng hrơi mông dik dak ok or jua čing, eng ao jŭ mriah hiam, mơnuih ƀôn sang hok mơak suang tui jua čing “Čơkă tuai”. Sa čô tơdăm djuai ania M’nông lăi pơthâo mă pô ñu: “Anăn kâo Y’ Bằng, hrơi anai kâo kiăo tui grup plơi Jarah pơphun ngă yang “Tăm Ƀlang M’prang ƀon” ƀơi ƀon Jarah kiăng angin rơnang phang mơak, hiam drơi jăn pran jua huăi hơmâo klin kheng, ană plơi pla hơdip rơnôm, yâo mơak, ba glăi bơyan pơdai jor kơtor lu, hnun kah neh met wa mơ̆ng hok mơak, djă pioh gru ama grua amĭ mơ̆ng rơnuk anai truh rơnuk adih, gru grua hiam mơ̆ng đưm anai ƀu dưi lui ôh”.

Ƀơi anăp lan sang gru grua ƀon Jarah lĕ gong hơdrai ngă yang djuai ania M’nông hơmâo pơhrup hiam biă. Pơ anai, hơdôm mơta gơnam ngă yang hơmâo neh met wa prăp lui djŏp laih. Gơnam ngă yang hơmâo 3 čeh tơpai, sa boh akŏ bui, hlin, hơdăng klon amăng kơpaih, sa kơkul mrai kô̆ pik drah mơnŭ, rup kơbao, rơmô, bê, mơnŭ, pơdai kơtor hăng gơnam ƀong mơ̆ng djuai ania Mnông. Laih anun gơnam ƀu dưi kơƀah anun lĕ phun Ƀlang či bư̆ păng war plơi. Amăng mông ngă yang, arăng phai tui anai: “Ơ yang čư̆, yang ia, ia glai…hrơi anai pơ anai ană plơi iâu gih glăi lăng tơlơi ngă yang bư̆ war plơi, rơkâo yang lăng ba phun pla čăt hiam. Gơmơi iâu yang glăi ngui, lăng ba tơlơi hơdip ană plơi pla, kiăng hiam drơi jăn pran jua, huăi djơ̆ djuam duam ruă. Pơ anai, gơmơi ngă yang iâu gih glăi pơ anai mơñum tơpai huă asơi, ƀong mơnŏng bui hăng ană plơi pla”.

Tơdơi kơ phai giong, pô phai iâu Tha plơi djă đing tơpai, lăi pơthâo pơphun laih tơlơi ngă yang “Tăm ƀlang mprang ƀon”. Ƀing atông čing hăng suang jum dar mơak bia.

Pô phai ƀơi hrơi ngă yang yom anai lĕ yă H’Đêm, mơnuih rơgơi mơbruă ƀơi ƀon Jarah, să Nâm Nung. Ñu brơi thâo “Ngă yang Tăm ƀlang Mprang ƀon” hơmâo pơphun tơdơi kơ puih bơyan. Tơlơi ngă yang anai ñu hơmâo 3 tal, blung a ngă yang ơi yă, giong anun ngă yang pơdai kơtor, ngă yang suaih pral hăng tuč rơnuč ñu lĕ ngă yang Tăm Ƀlang mprang ƀon. Phai giong, tha plơi ngă yang “akă mrai ƀơi tơngan” kiăng hiam drơi jăn pran jua kơ mơnuih amăng plơi hăng ƀing tuai nao ngui. Tơdơi kơ pla phun ƀlang ƀơi anăp sang jơnum plơi ƀon Jarah, yă H’Đêm lăi: “Amăng hrơi ngă yang Tăm ƀlan mprang ƀon, kâo pơ ala brơi neh met wa amăng plơi rơkâo yang pap brơi tơlơi soh neh met wa hăng rơkâo yang lăng ba ană plơi rơnuk rơnua yâo mơak”.

Mơnuih kơhnâo gru đưm Y Xuyên, tha plơi ƀon Jarah, brơi thâo: anai lĕ tơlơi nă yang mơ̆ng đưm sô laih mơ̆ng djuai ania M’nông, pơƀuh tơlơi hok mơak tơdơi kơ puih bơyan pơdai kơtor hơmâo ƀong hơmâo huă, čang rơmang thun phrâo hiam hloh, tơphă tơphai hloh. Tha plơi Y Xuyên pơ-ư pơ-ang: Ngă yang Tăm ƀlang mprang ƀon phrâo hơmâo gru grua bơrơguăt drơi jăn hăng tuai čuă ngui tŭ yap jing Gru hiam gah bơngăt jua dêh čar: “Tơlơi yom biă ñu mơ̆ng tơlơi ngă yang “tăm ƀlang mprang ƀon” lĕ pơgang ba, ƀu brơi arăng pơčut pơčao, ngă rung răng plơi pla hăng čang rơmang ană tơčô mô yâo huăi djơ̆ djuam duam ruă, neh met wa hiam drơi jăn, hơdip yâo mơak; ngă hmua huăi hơmâo čim brim tơkuih prô̆ nao ƀong, huăi hơmâo arăng phă prai, ngă sat. Anai jing gru grua hiam mơ̆ng djuai ania M’nông gơmơi”.

Tơlơi ngă yang Tăm ƀlang mprang ƀon mơ̆ng djuai ania M’nông ƀơi kual ngă hơkrŭ Nâm Nung, tơring čar Lâm Đồng pơjưh glăi amăng jua čing hơgor mơñi tơ-oa hăng tơlơi hok mơak mơ̆ng plơi pla. Mơ̆ng tơlơi ngă yang truh hrơi ngui mơak, abih bang pơƀuh tơlơi kiăng hơmâo sa thun phrâo angin rơnang phang mơak, pơdai jor kơtor lu, plơi pla rơnuk rơnua, hiam drơi jăn pran jua, hơdip rơnôm, thâo gum pơgôp laih anun gum djă pioh, pơtrut tui gru grua yom mơ̆ng ơi yă đưm./.