Mơ̆ng 6 mông tlam, pơ Plơi hơdip mlăm Čơ anet hơmâo lu mơnuih nao. Rơbêh kơ 60 kiot jing anih sĭ gơnam tŭi apui rơđah bơngač, sĭ tơket tơkeng gơnam ƀong huă, ia mơñum, gơnam jơman mơ̆ng plơi pla hăng gơnam djă pioh lăng lui. Amăng bơyan bơnga, blơi gơnam jai hrơi lu tui, mơnuih nao rai tơthul mơtăm yơh, ƀu kơnong ngă mơak kơ mơnuih ƀôn sang đôč ôh ăt djru bruă sĭ mơdrô, bơwih brơi čuă ngui lơ̆m mlăm pơ anai. Adơi Lê Trúc Thảo Nguyên, hok mơak lăi: “Kâo nao pơ sang čơ anet sĭ mơdrô mlăm pơ anai yua anai lĕ sang čơ blung a ƀơi phương Pleiku, pơ anai prong rơhaih biă mă, mơak biă mơn, hơdôm anih sĭ gơnam pơ anai hơmâo pơdă gơnam hiam hăng jơman”.

Ƀu kơnong ƀing hlăk ai đôč, lu sang anŏ ăt ruah anih anai ngă anih či nao ngui akŏ bơyan bơnga. Amai Võ Thị Thu Diễm, dŏ pơ phương Diên Hồng brơi thâo: “Kâo nao pơ Plơi hơdip mlăm Čơ anet lăng pơ anai mơak biă. Gơnam ƀong hơmâo lu, čơđai hor biă, ƀing čơđai hăng sang anŏ rai pơ anai ngui lu. Plơi hơdip mlăm hơmâo pơhrup hiam mơn”.

Phrâo ba ngă bruă đôč samơ̆ Plơi hơdip mlăm Čơ Anet jing tơlơi hmư̆ hing, bruă akŏ phun amăng đĭ kyar bơwih ƀong huă mlăm mơ̆ng Pleiku. Biă ñu amăng hơdôm hrơi akŏ thun phrâo, tuai nao ngui lu, sĭ mơdrô jing dik dak hloh mơn, djă ba tơlơi čang rơmang kơ sa thun bơwih ƀong tơphă ƀiă.

Ƀơi anih pơdă gơnam, amai Ksor H’Khal sĭ gơnam ƀong huă mơ̆ng djuai ania Jarai, kah hăng asơi brŏm, mơnŭ ŏm, bui ŏm, mơnong rơmô ŏm, hla plum hna trong phĭ. Amai Khal lăi: “Hăng ƀing tuai lu tui anai jing kâo mơak biă, yua ƀing tuai ñu hmư̆ hing mơnŏng ƀong huă jơman mơ̆ng plơi pla Gia Lai ăt kah hăng mơnŏng ƀong huă mơ̆ng Jarai hơbai gơmơi. Gơmơi pơư pơang biă mă, yua tơring čar djru pơƀuh gơnam hmư̆ hing mơ̆ng plơi pla, sui pơ anăp anai, arăng hmư̆ ư lu hloh”.

Plơi hơdip mlăm Čơ Anet hơmâo akŏ pơdong giăm čroh ia Hội Phú, anih hiam biă mă dŏ tong krah plơi prong Pleiku, laih dong jing anih hơmâo mơnuih ƀôn sang dŏ mơ̆ng đưm sô laih, gru grua hmư̆ hing hlâo kơ hrơi rơngai lŏn ia. Ơi Đặng Toàn Thắng, Khua Jơnum min mơnuih ƀôn sang phường Pleiku lăi: “Akŏ pơdong plơi bơwih ƀong mlăm, rơbat tơkai mut nao, či đĭ kyar čơkă tuai hyu ngui mlăm tui hăng tơlơi kiăng mơ̆ng Tơlơi pơtrun ping gah tơring čar Gia Lai hăng tơlơi pơtrun Ping gah phường Pleiku. Mơ̆ng anun pơjing anih anom, sa anih či nao ngui amăng dêh čar ta hăng ƀiing tuai amăng tơring čar Gia Lai lăi hrŏm amra hơmâo anih ngui ngor lơ̆m mlăm hăng phương Pleiku lăi hơjăn hăng kual amăng lăm plơi prong Pleiku (hơđăp) lăi hrŏm”.

Plơi hơdip mlăm Čơ Anet hơmâo lu mơnuih nao ngui truh krah mlăm mơtăm. Anai ƀu kơnong anih blơi gơnam, ngui ngor đôč ôh, ăt jing anih pơtruh plơi pla, pơƀuh gru hiam hăng pơtrut bơwih ƀong mơ̆ng plơi lŏn dap kơdư Pleiku. Amăng hrơi akŏ thun phrâo, bơyan phang truh, tơlơi hơdip phrâo ƀuăn hơmâo sa thun bơwih ƀong đĭ hloh./.