Mơnuih kơhnâo Y Kŭt Niê pơlir hăng tơlơi adôh đưm laih dong gông brô̆ djuai ania mơng 18 thun. Ñu brơi thâo: Hlâo adih ƀu hơmâo hơdrôm hră čih pioh ƀudah anih pơtô hrăm kar ră anai, ƀing gơñu kơnong kiăo tui kru ƀing tha plơi, ƀing kơhnâo kơhnăk tha rơma, hmư̆ ƀing gơñu adôh, atông čing laih anun hrăm tui ƀơƀrư̆.

"Kâo thâo adôh tơlơi adôh đưm hăng pĕ gông brô̆ mơng 18 thun. Hlâo adih, kâo juăt hmư̆ ƀing kơhnâo kơhnăk ngui atông anun kiăo tui hrăm. Ƀơƀrư̆, kâo hrăm tui ƀing gơñu hăng pơphun pơtô glăi ƀing ană tơčô amăng plơi pla. Thun 2007, kâo hơmâo nao pơtô brơi ƀing čơđai ƀơi Sang hră kơnuk kơna čem rông ba. Kơnong tơdơi kơ 3 blan hrăm, ƀing čơđai thâo atông čing abih. Tơdơi anun, kâo tŏ tui mut hrŏm Jơnum ngui adôh suang ƀơi Đồng Mô, Sơn Tây, Hà Nội hăng pơlir hrŏm grup čing hơgor truh thun 2019”.

Ƀơƀrư̆ tŏ tui, hơdôm yŭ adôh Êđê, jua čing hơgor hăng er mơñi bang mơng đĭng năm jing ha bơnah ƀu kơƀah ôh amăng tơlơi hơdip mơng ơi Y Kŭt Niê. Ƀu djơ kơnong rơguăt atông čing, ñu ăt dưi pơkra rai gông brô̆ djuai ania. Tơlơi yôm ƀiă dong lĕ mơnuih kơhnâo Y Kŭt Niê ƀu djă pioh anŏ yôm anun brơi kơ hơjan ñu pô. Hăng ñu, bruă pơtô brơi rơnuk tơdơi lĕ tơlơi glăm ba mơng ƀing nao hlâo.

“Kiăng dưi pơkra rai sa boh đĭng năm, juăt rơngiă giăm ha mơkrah blan. Tơdah hơmâo lu bruă phara, năng ai ñu kiăng giăm ha blan kah mơng pơgiong. Tui kâo pơmĭn, ƀing mơnuih nao hlâo kiăng hơmâo tơlơi glăm ba pơtô glăi rơnuk ană tơčô, kiăng huăi ngă rơngiă hĭ gru grua yôm phara mơng djuai ania. Bơ ƀing hlăk ai, kiăng gơgrong tŭ mă, ngui atông hrŏm ƀing tha rơma kiăng kơ hrăm tui hăng tơngan rơguăt ƀiă dong lơm djă đing hơgor”.

Mơnuih kơhnâo Y Kŭt Niê lêng hơmâo neh met wa pơpŭ biă mă yua tơlơi ba gru hăng tơlơi glăm ba. Ñu ăt gir kơtir djă pioh hăng ngă lar hyu gru grua djuai ania, mơng bruă pơkra, ayŭp đĭng năm, atông čing truh pơ mut hrŏm hơdôm bruă hrŏm amăng plơi pla, pơtô brơi rơnuk hlăk ai amăng kual. Ayong Y Tía Niê, dŏ amăng ƀuôn Ea Mlay, să M’Drak, tơring čar Dak Lak, ñu lĕ sa čô ding kơna amăng grup atông čing mơng mơnuih kơhnâo Y Kŭt Niê pơtô glăi; ñu lăi:

“Mơnuih kơhnâo Y Kŭt Niê lĕ sa amăng ƀing mơnuih ba gru amăng plơi pla. Lơm tơlơi phăn, gru grua yôm phara mơng djuai ania pô glăk rơngiă tui ƀơƀrư̆, ñu ăt lêng kơ gir run djă pioh hăng ngă lar hyu, mơng bruă ayŭp đĭng năm, atông čing truh pơ bruă mut hrŏm tơlơi ngui ngor amăng plơi pla. Sit biă ñu, ñu lêng kơ abih pran jua pơtô glăi rơnuk hlăk ai, čang rơmang ƀing čơđai tañ hluh, hor hăng tŏ tui gru grua mơng djuai ania pô”.

Hăng pran gir run abih pran jua hăng pran hor hăng gru grua djuai ania, mơnuih kơhnâo hơmâo hăng glăk pơgôp yôm phiăn amăng bruă djă pioh, tŏ tui hơdôm anŏ yôm gru grua djuai ania Êđê. Hơdôm bruă mă kret kruai anun ƀu djơ̆ kơnong djă pioh jua čing, tơlơi adôh brơi rơnuk tơdơi đôč ôh mơ̆ ăt tŏ tui djă pioh brơi rơnuk tơdơi dong./.