Tang liang (đa hơmâo anih iâu teng leng) lĕ phun kyâo čăt pơ đang hmua, jum dar glai rưng. Tang liang lĕ phun kyâo pơprong, hla hăng bơnga ñu lăng kar hăng phun sầu đâu ƀudah phun xoan, ƀong hla ñu phĭ. Amăng bơyan bơnga, phun tang liang bluh hla mơda hăng bluh bơnga, anai lĕ bơyan neh met wa djuai ania Jarai ƀơi Gia Lai nao pĕ wok hla hăng bơnga kiăng kơ luk ƀong. Tang liang lu mơnuih aka ƀu thâo krăn samơ̆ ƀong ăt jơman mơn.

Añăm tang liang phĭ, samơ̆ tơdơi kơ mơmah ƀong ia phĭ anun ñu jing mơmih-anai lĕ gơnam hlơi ƀong sa wŏt amra hơdor na nao. Ayong Hiao Dương, dŏ ƀơi ƀut plơi 7, să Phú Thiện, tơring čar Gia Lai brơi thâo:

“Añăm tang arăng juăt pĕ ƀong mơng blan 1 truh pơ blan 3, lơm anai phun glăk bluh hla mơda hăng bluh bơnga, bâo hiam, anai lĕ bơyan ƀong jơman hloh. Tơdah kiăng ƀong ăt dŏ tơguăn truh bơyan mơn, nao pơ hmua kah hơmâo. Wŏt bơnga hăng hla lêng kơ phĭ soh, samơ̆ tơdah dưi ƀong phĭ hăng thâo pơkra ăt huăi phĭ hăng jơman biă mă”.

Añăm tang liang ta pơkra ñu ăt amuñ đôč. Hla hăng bơnga tang liang arăng juăt hu ƀơi apui, laih dong pao brơi pơsăn kiăng ñu tơbiă ia bâo mơnâo. Tơdơi anun, arăng juăt tul hăng pơhăng hra. 

Añăm tang liang juăt pơluk hrŏm hăng mơnong om, akan krô ƀudah arăng tul hrŏm pơhăng hra, juăt luk ƀong hrŏm hăng asơi. Samơ̆ jơman hloh ăt lĕ luk hrŏm mơnong om ƀudah akan om. Mơnong phrâo om giong, dŏ ƀâo hiam, arăng đek hĭ đơđet luk hrŏm hăng tang liang. Djop gơnam pơluk hrŏm jing sa añăm ƀong jơman biă mă.

Sit biă ñu, kiăng kơ ƀong jơman hloh, neh met wa hơmâo pơluk hrŏm dŏm sao kiăng ƀong ñu mơsăm ƀiă. Ia mơsăm mơng dŏm sao mut hrŏm hăng ia phĭ, pơhăng laih dong hra mơsin ngă añăm ƀong anai jai jơman tui. Tang liang phĭ ngă ƀlĕ ia mơbah, tơdơi kơ ƀong ñu mơmih, ƀâo hiam, ngă ta mơhao ƀong dong.

Tui yă Siu H’Kyut, dŏ amăng plơi Tel A, să Phú Thiện, tơring čar Gia Lai, añăm ƀong anai juăt biă mă hăng mơnuih djuai ania Jarai mơng đưm đă truh ră anai. Mah tơlơi hơdip đĭ đăi ƀiă, ră anai mơnuih ƀôn sang ăt ƀu wơr ôh añăm phĭ anai, arăng juăt lăi ƀong phĭ kah kriang:

“Hơdor glăi đưm hlâo adih tơlơi hơdip tơnap tap, anun ƀong jing juăt yơh, huăi phĭ dong tah. Añăm tang liang răng anai ăt hơmâo wŏt yuăn amăng plơi pla ƀong. Mơnuih Jarai bai gơmơi juăt lăi ƀong phĭ kah kriang, ƀong pơhăng alah. Yua anun añăm tang liang mah phĭ samơ̆ ăt jơman”.

Ră anai, tơlơi hơdip pơplih tui yơh, hơmâo lu añăm ƀong hơmâo arăng tơnă hơbai jơman hloh. Samơ̆, hăng lu gơnam ƀong anun, tang liang ăt lĕ añăm ƀong ƀu kơƀah ôh mơng djuai ania Jarai. Sit biă ñu tơdơi kơ hơdôm hrơi ƀong tê̆t, lơm ƀing ta ƀong lu mơnong, akan, anun tang liang jing añăm ƀong lu mơnuih hor. Sa jam tang liang pơluk hrŏm hăng mơnong om ƀudah akan om ƀu djơ̆ kơnong ba glăi gơnam ƀong ngă djôl amăng hrơi jăn đôč ôh mơ̆ ăt pơhlôm brơi tơlơi suaih pral dong.

Bơ hăng ƀing mơnuih hơdip ataih mơng plơi pla, truh bơyan tang liang bluh hla mơda, ƀing gơñu ăt hơdor glăi plơi pla. Amai Ksor H’Ry, dŏ amăng ƀôn Chơ Ma, să Ia Pa, tơring čar Gia Lai brơi thâo:

“Mơng anet kâo juăt ƀong tang liang phĭ laih. Ră anai hyu mă bruă pơ ataih ăt hơdor glăi mơn, yua anun truh bơyan tang liang bluh hla mơda hăng bluh bơnga, amĭ ama nao wok pơ hmua mơ-it rai kơ kâo. Ƀong tang liang ngă hơdor glăi plơi pla, jai hning rơngô̆t kơ sang anŏ”.

Tang liang ƀu djơ̆ kơnong lĕ añăm ƀong mơng glai rưng đôč ôh. Anai lĕ añăm ƀong amăng bơyan bơnga ƀơi kual Dap kơdư, anai lĕ gơnam pơlir kơplah wah ană mơnuih hăng glai rưng, anai lĕ gru grua hiam amăng mơnong ƀong huă mơng djuai ania Jarai. Amăng tơlơi hơdip phrâo ră anai, lơm gru grua sô hơđăp glăk ƀơƀrư̆ rơngiă tui, hơdôm añăm ƀong anun lĕ tang liang ăt ngă ta hơdor glăi ơi yă amĭ ama, hơdor glăi plơi pla, hơdôm hrơi nao pơ hmua, hơdôm hrơi pơtum jơngum jum dar apur./.