Kơnong hăng sa gơnam pioh ƀoh tơma, sa črăn kyâu khăng dlông sa bơnah tơngan pioh trah ƀoh pơkra, tơdơi kơ pơñen lăng phun kơ phê, pô thâo trah rŭp Y Ser Bkrông, ƀơi ƀuôn Tơng Jŭ, să Ea Kao, plơi prong Buôn Ma Thuột hmâo pơjing laih tơlơi pơmin pơkra rŭp. Ƀu kiăng rŭp kač hơget ôh, ñu hluai tui tơlơi găn rơgao sui thun mơng pô tañ mơtăm trah trel pơjing rŭp ƀơi phun kơ phê. Rŭp trah jing hĭ tơdơi kơ trah ƀoh mơng ñu. Pơkra rah, ayong Y Ser Bkrông lăi pơthâo rah:

 “Anai lĕ rŭp đah kơmơi nao sŏ ia. Anai lĕ hơdră trah rŭp mơng mơnuih Dăp Kơdư, kâo kiăng pơdah glăi tơlơi hơdip mơda sit nik mơng plơi pla đưm. Kâo lăng phun kơ phê hiưm hơpă, laih anun kah mơng pơmin truh kơ bruă trah pơkra rŭp hơget, mơng phun kơ phê kâo amra pơmin nao truh rup đah rơkơi djă gă ƀudah pô đah kơmơi glăk mơnơi ƀudah pô đah kơmơi gui rêu nao hmua, tui hluai kơ phun than kơ phê”.

Amăng mông pơplông pơkra rŭp mơng phun kơ phê dưi pơphun amăng rơwang Jơnum ngui kơ phê ƀơi plơi prong Buôn Ma Thuột tal 8 phrâo rơgao, hmâo 53 čô mơnuih thâo trah rŭp mơng hơdôm bôh tơring glông, plơi prong amăng tơring čar Dak Lak hăng hơdôm bôh tơring čar hăng hơdôm bôh tơring čar Dăp Kơdư gum hrom. Hăng anăn ñu “Bôh thâo đưm, hơdră pơkra, dlai tlô, ană mơnuih Dăp Kơdư” lu mơnuih thâo trah rŭp mă yua bôh thâo trah rŭp đưm kiăng pơkra rŭp. Hơdôm  mơta rŭp juăt ƀuh kah hăng: Jơnum ngui, mơñum tơpai čeh, atông čing hơgor, top pơdai, ƀă ană, čuă hmua dưi hmâo ƀing trah rŭp pơjing.

Pô thâo trah rŭp Y Dhok Adrơng, ƀơi să Čư̆ Suê, tơring glông Čư̆ Mgar, tơring čar Dak Lak lăi pơthâo: Anô̆ pha mơng rŭp trah Dăp Kơdư lăi hrom hăng djuai ania Êđê lăi ha jăn juăt mă yua djop djuai kyâu khăng, kơjăp kah hăng kyâu kre, čik, ... pioh trah rŭp. Hăng phun kơ phê lĕ khom ruah mă hơdôm phun ñu tha, pioh ñu thu krô kah mơng dưi trah pơkra rŭp.

 “Phun anai ră anai trah rŭp amĭ ƀă ană. Yua kơ đưm hlâo lom dô̆ anet rim wot nao pơ̆ hmua amĭ juăt ƀă ba ană. Hăng bruă trah rŭp lĕ phun kyâu hnal prong amra amuñ pơkra hloh hăng pơjing rŭp hloh. Bơ̆ hăng kyâu kơ phê lĕ tơnap hloh, kâo khom ngă hiưm hơpă pioh dưi djă pioh ară kyâu anai, trah ăt tơnap mơn, khom mă yua pơkĕ nao hrom hăng djop mơta măi kah mơng dưi pơkra”.

Kơnong amăng 3 hrơi, ƀing trah rŭp pơkra giong 48 mơta rŭp trah hăng lu gru trah djă jă tơlơi hơdip mơda gơnam tam hăng pran jua mơng mơnuih ƀôn sang Dăp Kơdư. Hơdôm rŭp trah giong dưi hmâo grŭp pơphun bruă pơplông mă yua pơdă prưng amăng kual tuai čuă ngui dlai tlô Kŏ Tam kiăng lăi pơthâo truh mơnuih ƀôn sang hăng tuai hyu čuă ngui.

Dưi ƀơi anăp lăng ƀuh, lăng tui lom pô trah rŭp trah pơjing rŭp mơng phun kơ phê amăng hơdôm hrơi jơnum ngui, ayong Nghiêm Bá Nam, tuai hyu čuă ngui mơng Hà Nội lăi pơthâo: anai lĕ tal blung a ñu lăng ƀuh ƀơi mơta pô mơnuih trah rŭp mơng kyâu kơ phê. Ñu lăng ƀuh hling hlang biă yua kơ hơdôm črăn kyâu pơmin glom lui laih, samơ̆ hluai tui tơngan ƀing trah rŭp laih anun gơnam yua trah trel rŭp ƀu yôm ôh samơ̆ pung kơ dưi pơjing rai hơdôm mơta rŭp hmâo nua yôm.

 “Mơng hơdôm gơnam mă phun kơ phê glom lui laih lĕ, ƀing thâo trah rŭp glăk dăp kơdră hơdôm gơnam hăng tơlơi ƀăt bruă mơng mơnuih trah rŭp kiăng pơdah ƀơi rŭp trah mơng gơñu, klă hiam ƀiă. Ƀing trah rŭp amra pơjing rai gơnam lăng ñem klă biă hăng hmâo anô̆ yôm gah bôh thâo, mưn ƀuh kah hăng pô amra mă yua abih hơdôm gơnam mơng phun kơ phê”.

Hăng djop djuai ania ƀiă hơđăp ƀơi Dăp Kơdư, trah rŭp jing sa hơdră pha ra hmâo mơng đưm laih. Dong mơng črăn kyâu, rơgao kơ tơngan thâo trah mơng ƀing ƀat bruă, dưi ba hơdôm gru rŭp phrâo, bă tơlơi klă hiam hăng hmâo bơngat jua biă. Ƀu djơ̆ kơnong kơ trah hăng kyâu prong sui thun ôh mơ̆, ră anai hơdôm rŭp trah ƀơi hơdôm phun kơ phê tha, ba truh hơdôm nua yôm phrâo, pha ra ha jăn kơ phun kơ phê./.