Ƀuôn Kli A, phường Đạt Hiếu, plơi prong Buôn Hồ, ataih mơ̆ng plơi prong Buôn Ma Thuột rơbêh 40km. Ƀuôn ră anai hơmâo 276 boh sang anŏ, lêng kơ djuai ania Êđê, dŏ djă pioh lu gru hiam kah hăng čing hơgor, goong brô̆, tơlơi ngă yang hăng bruă pơkra gơnam tui đưm. Mơ̆ng thun 2023, ƀuôn Kli A hơmâo plơi prong Buôn Hồ tuh pơ alin man pơdong anih pơdă gru grua, sang glông, pơkra glăi pin ia.

Thun 2024, Jơnum min mơnuih ƀôn sang tơring čar Dak Lăk hơmâo ruah ƀuôn Kli A hăng 4 boh sang anŏ amăng plơi či gum djru hăng ngă giong bruă tuh pơ alin đĭ kyar tuai hyu čuă ngui. Tui hăng jơlan ngă bruă, ƀuôn Kli A amra pơkra gơnam bơwih brơi tuai čuă ngui kah hăng hyu čuă ngui, sem lăng tơlơi hơdip mơda, mă bruă, pơkra gơnam mơ̆ng neh met wa djuai ania Êđê; sem lăng gru grua atông čing, adoh akhan, ƀong huă, ngui ngor, pơbưp mơnuih mơnam; nao čuă lăng anih anom glai klô hăng pơtruh hăng hơdôm anih hơmâo nao čuă ngui./.