Mlăm ngui atông čing ring hơgor Ngŏ Dơnung ASIA thun 2025 hơmâo 3 grup jar kmar hăng 5 grup kơhnâo amăng čar ta nao jơnum, hơmâo: Lao, Kur, Malaysia; hơdôm boh tơring Lâm Đồng, Dak Lăk, Gia Lai, Quảng Ngãi, hăng Phú Thọ. Pơhiăp ƀơi mông ngă yang, ơi Đinh Văn Tuấn, Kơ-iăng khua jơnum min mơnuih ƀôn sang tơring čar Lâm Đồng pơsit anŏ yom hmư̆ ư hloh, anŏ bang hyu kơtang hloh hăng dưi pơtruh pran jua hăng yŭ jua čing. Mlăm ngui atông čing ring hơgor kual Ngŏ Dơnung ASIA thun 2025 ƀu kơnong jing anih či pơpŭ kơ gru yom mơ̆ng đưm đôč ôh, ăt jing anih pơƀut pơčeh phrâo, pơtruh mơnuih tơpuôl, kơtưn hrưn pơ anăp mơ̆ng gru grua Việt Nam amăng glông ia rô kual hăng jar kmar:“Mơng đưm truh hơne, čing hơgor ƀu kơnong jing goong brô̆ đôč ôh, ñu jing bơngăt jua, jing tơlơi pơhiăp mơ̆ng mơnuih Dap Kơdư hăng kual čư̆ siăng. Rim yŭ čing mơñi jing sa tơlơi ră ruai, rim yŭ čing jing jua suă pran, sa glông ia rô pơtruh rơnuk đưm, rơnuk anai hăng rơnuk tơdơi. Mlăm ngui atông čing ring hơgor kual Ngŏ Dơnung ASIA thun 2025 sit jing hrơi kiăng jua čing hrưn glông rơgao guai lŏn, truh pơ gơyut gơyâo amăng kual, pơjing rai yŭ jua čing hrŏm hang lu gru grua phara, pran jua gum pơgôp abih bang”.

Bruă Tha plơi ngă Yang ƀơi mlăm ngui lĕ lăi pơhmư̆ kơ yang rơbang tơlơi rơkâo brơi ană plơi rơnuk rơnua, tơphă tơphai, hơdip yâo mơak, bơyan pơdai jor kơtor lu, laih anun brơi hrơi ngui atông čing anai bă blai tơlơi khăp ƀu-eng. Ƀơi anih đĭ adoh suang, pơƀuh rai rup plơi đưm hơmâo sang Rung, tơpai čeh, tơpur pơtŏ apui jă bơbluk...ƀing grup atông čing atông rai yŭ čing mơñi tơ-oa, wưt hăng adai, pơƀuh rai tơlơi gum pơgôp, tơlơi hok mơak, hăng tơlơi hơdip rơnôm, kjăp phik.

Lâm Đồng pơbưp,hrăm nao rai, pơtô brơi tơlơi rơgơi atông čing, pơƀuh hyu rup gru grua, ană mơnuih Lâm Đồng hăng djŏp djuai ania, ƀing tuai amăng čar ta wơ̆t čar rơngiao. Amai K’Duýp, grup kơhnâo djuai ania K’ho, să Đinh Trang Thượng, tơring čar Lâm Đồng brơi thâo:“Ƀing gơmơi rai mơ̆ng Grup atông čing hăng rơbêh 40 čô, pran jua mơak mơai kiăng mut hrŏm, hrăm tui ƀing gŏp ta dong, kiăng ĕp ƀuh gru hiam mơ̆ng djuai ania phung wang pơkŏng dong. Pô ta pơư pơ-ang hloh kơ gru grua atông čing mơ̆ng plơi pla ta. Mơ̆ng bruă hrăm tui ƀing gơyut gơyâo, jing ba glăi tơlơi hiam phrâo mơn kơ grup čing ƀing gơmơi”.

Mlăm ngui atông čing ring hơgor Ngŏ Dơnung ASIA thun 2025, Khul mơnuih dưi ngă bruă rơgao hơnong pơkă - Anom bruă tơlơi dưi ngă rơgao hơnong pơkă Việt Nam brơi hră Pơsit tŭ yap 2 tơlơi dưi ngă rơgao hơnong Việt Nam kơ Jơnum min mơnuih ƀôn sang tơring čar Lâm Đồng, hơmâo: Tơlơi dưi ngă rơgao hnong “Anih atông čing pơlir gru grua adoh suang prong hloh” hăng tơlơi dưi ngă rơgao hnong “Gru rup pơhrup hiam anih anom gah rơngiao pơlir hăng atông čing pơtruh plơi pla, hơmâo lu mơnuih kơhnâo gru đưm, ƀing apăn bruă adoh suang, ngă sen hăng mơnuih ƀôn sang gum ngă lu hloh hăng anăn We are LamDong”.

Ƀrô tal anai, ƀơi Đà Lạt, Lâm Đồng ăt hơmâo ngă lu bruă pơhưč ƀing tuai kah hăng: buh eng ao mơñam mă, Jơnum ngui anŏ yom kơphê rŏng lŏn tơnah 2025 hăng lu anih či ĕp lăng, jơnum ră ruai, jơnum gru grua - tuai hyu ngui pơhưč pran jua, biă ñu mlăm adoh hăng Countdown čơkă thun phrâo. Hơdôm bruă anai ƀu kơnong pơpŭ gru grua, pơƀuh rup hiam amăng plơi pla đôč ôh ăt pơjing rai hrơi ngui ngor mơak mơai, kơdok kơdor hloh, pơhưč ană plơi hăng ƀing tuai nao ngui pơ Đà Lạt amăng hơdôm hrơi rơnuč thun./.