Mơguah lơ 12/3, ƀơi tơring kual Liên Sơn, tơring glông Lak, tơring čar Dak Lak pơphun ngui čeo song nan amăng dơnao ia Lak tal 3, thun 2023. Anai lĕ sa amăng hơdôm tơlơi ngui amăng jơnum ngui kơphê Buôn Ma Thuột tal 8, thun 2023 glăk pơphun ƀơi Dak Lak.

Tal ngui čeo song nan anai hơmâo 5 grup nao pơplông hăng 86 čô mơnuih mơng hơdôm boh să, tơring kual hăng hơdôm anih bơwih brơi tuai čuă ngui amăng tơring glông Lak. Ƀing nao nao čeo song amăng 3 črăn: čeo song 4 čô mơnuih, 3 čô mơnuih hăng čeo song 2 čô. Taih hloh lĕ 300 met, pơđut tal pơplông, khul pơphun hơmâo jao 3 pri prong hloh, 3 pri tal 2 hăng 3 pri tal tlâo hăng 6 pri pơsur pran jua amăng hơdôm tơlơi pơplông, tơring glông Liên Sơn mă pri prong hloh amăng abih bang grup nao pơplông.

Tui khul pơphun, tal čeo song anai tŏ tui pơđŏm tơlơi pơplih phrâo amăng bruă djă pioh, lăi pơthâo gru grua sui mơng đưm hlâo hăng hiam klă mơng djop djuai ania ƀơi anai. Hrŏm hăng tal čeo song, hơdôm hrơi laih rơgaoamăng tơring glông Lak ăt pơphun lu tơlơi ngui ngor tui gru grua anun lĕ: ngă yang pin ia, pơpŭ tơlơi suaih pral, ngă yang song nan, ngui adôh suang, atông čing hơgor hăng pơdă prưng gơnam tui gru grua… 

Ƀơi Anom Jơnum ngui Bản Đôn, să Krông Na, tơring glông Buôn Đôn (Daklak), pơphun Jơnum ngui rơman Buôn Đôn. Tơlơi jơnum pha ra anai hmâo ngă pơhư̆č hơdôm rơbâo čô mơnuih ƀôn sang plơi pla hrom hăng tuai amăng lŏn ia ta hăng mơng dêh čar tač rơngiao gum hrom. Nao pơhmư̆ mông Jơnum ngui rơman Buôn Đôn thun anai hmâo 7 drơi rơman rông mơng hơdôm mơnuih rai mơng hơdôm anom bơwih ƀong, sang anô̆ ƀơi tơring glông Buôn Đôn.

Phara hăng hơdôm tal jơnum ngui hlâo adih, Jơnum ngui rơman Buôn Đôn thun anai ƀu hmâo hơdôm bruă mă kah hăng: Pơplông đuăi rơman, rơman đă bôh lông, đĭ rơman găn ia krông Srêpôk; pơ ala nao kơ anun lĕ hơdôm hơdră tuai čuă lăng klă hloh hăng rơman glăk dưi hmâo hơdôm sang bruă wai lăng tuai čuă ngui ƀơi rŏng lŏn tơnah kah hăng: Pơplông pơhrôp brơi kơ rơman, Rơman gum hrom čơkă tuai hmâo bơdjơ̆ nao klă hloh, mông ƀong mơñum kơ rơman, čơphin rŭp hrom hăng tuai. Pơđut bruă pơplông, rơman Khăm Sing mơng wông rơman Y Wưn Byă thâo hloh hmâo mă pri mrô sa pơplông pơhrôp kơ rơman. Rơngiao kơ anun, Grŭp pơphun hmâo bơkơtuai lu pri pơkon kơ hơdôm wông rơman hăng rơman gum hrom jơnum ngui rơman.        

Ƀơi anih bơwih brơi tuai čuă ngui Ko Tam, plơi prong Buôn Ma Thuột, Khul pơphun jơnum ngui kơphê Buôn Ma Thuột pơphun hrơi ngui pơkra gơnam hiam mơng phun kơphê. Tal pơplông pơkra gơnam hiam mơng phun kơphê pơhưč 53 čô mơnuih mơng hơdôm boh tơring glông, plơi prong amăng tơring čar Dak Lak hăng hơdôm boh tơring čar Dak Nông, Gia Lai, Kon Tum hăng Lâm Đồng mut hrŏm.

Amăng 3 hrơi laih rơgao, ƀing mơnuih rơgơi kơhnâo hơmâo pioh lu hrơi mông hăng abih pran jua kiăng pơkra pơjing lu gơnam hăng tui tơlơi hơdip mơda mơng djop djuai ania kual Dap kơdư, bruă wai pơgang ayuh hyiăng, pơgang hlô mơnong yôm, pran hrưn đĭ, ba glăi tơlơi yôm mơng kơphê hăng gơnam hiam mă yua amăng tơlơi hơdip mơda. Pơđut tal pơplông, khul pơphun jao 1 pri prong hloh, 2 pri tal 2, 3 pri tal 3, 5 pri pơsur pran brơi 11 čô mơnuih, jao pri brơi anom bruă gum djru brơi 15 gơnam, jao hră pơpŭ bơni brơi ƀing nao pơplông.