Anai lĕ, plơi tal 4 ƀơi tơring čar dưi pơsit ƀôn lan čơkă tuai hyu ngui. Mơ̆ng rơnuč thun 2023, tui hăng Hră pơtrun mrô 2433 mơ̆ng Jơnum min mơnuih ƀôn sang tơring čar Dak Lak, Ƀuôn Tơ̆ng Jŭ dưi djru prăk kăk, gơnam yua, gông brô̆ pioh bơwih brơi bruă tuai nao ngui; kơnuk kơna djru blơi măi komputer, kơƀang grê hăng čih pôr pơthâo amăng plang tơlơi pơhing điện tử pioh pơđĭ kyar bruă tuai hyu ngui amăng plơi pla, kiang ngă giong djop.

Tui hăng Gơnong bruă Gru grua Pơrơguăt drơi jăn hăng Tuai čuă ngui Dak Lak, Ƀuôn Tơ̆ng Jŭ lĕ sa amăng 4 boh plơi dưi pơsit plơi hiam, djă pioh gru grua hơđăp djuai ania, čơkă tuai mut nao ĕp lăng, dŏ glăi, ngui ngor ƀong mơñum, hrŏm hăng 3 boh plơi pơkŏn amăng tơring čar anun lĕ Ƀuôn Tuôr gah plơi prong Ƀuôn Ma Thuôt, Ƀuon Kly A amăng plơi prong Ƀuôn Hô hăng Ƀuôn Jun tơring glông Lak. Anai lĕ bruă mă hiam mơ̆ng anom bruă tuai čuă ngui, anăp nao hơdor glăi 120 thun hrơi akŏ pơdong tơring čar Dak Lak. Tui anun yơh, truh ră anai tơring čar Dak Lak hơmâo laih 7 boh plơi ngă anih čơkă tuai nao ngui hăng pơphun bơwih brơi kơ tuai hyu ngui dŏ glăi.