Tơdơi kơ 3 hrơi pơphun dik dak, jơnum ngui pơhưč rơbêh 800 čô mơnuih kơhnâo kơhnăk, mơnuih ƀôn sang rai mơng 26 boh să, phường amăng tơring čar Dak Lak, pơ ala brơi 9 djuai ania anun lĕ Êđê, M’nông, Jarai, Bahnar, Sêdang, Bru Vân Kiều, Mường, Tày, Nùng. Hơdôm grup nao ngui hrŏm amăng 5 boh tơhnal: ngui atông čing, pĕ gông brô̆ djuai ania, adôh tơlơi adôh đưm, ayun suang hăng hơdôm tơlơi ngă yang sô hơđăp, hăng rơbêh 100 tơlơi ngui adôh suang yôm phar amăng ƀon lan. Hơmâo lu tơlơi ngă yang mơng djop djuai ania hơmâo hơkrŭ glăi anun lĕ ngă yang đĭ dŏ sang phrâo, hrơi tuh ƀuai, ngă yang truh prong giong mơnuih, ngă yang ruh hĭ gong drai, ngă yang plơi pla…hrŏm hăng hơdôm tơlơi atông čing, gông brô̆ djuai ania, tơlơi ayun suang hơmâo pơphun pơčeh phrâo, mơ-ak hloh.

Pơđut mông jơnum ngui, khul pơphun hơmâo jao 8 pri grup ngui adôh suang brơi hơdôm boh ƀon lan hơmâo tơlơi ngui adôh suang mơ-ak hloh, jao hră pơpŭ brơi 37 tơlơi ngui adôh suang mơ-ak hloh. Ƀing kơnhâo kơhnăk mơng să Liên Sơn Lăk mă pri prong hloh amăng djop grup amăng tal jơnum ngui anai.