Hăng tơlơi pơsit “Bơyan pơdơi prong čuă ngui đang glai-Lu tơlơi mơ-ak”, jơlan hơdră pơhưč tuai čuă ngui amra hơmâo hơdôm tour tuai čuă ngui plơi pla, gru grua, đang glai; Rafting čeo song nan, đĭ rơdêh đuăi amăng glai rưng, čroh hnoh. Hrŏm hăng anun, amra hơmâo lu bruă mă anun lĕ ngui atông čing hơgor, adôh suang, bơrơguăt drơi jăn, ngui rôk jơlan glông hăng hrơi tơnă hơbai.

Amăng jơlan hơdră pơhưč tuai čuă ngui anai, hơdôm anom bơwih ƀong sĭ mơdrô amra hrŏ trun nua mơng 15-100% wĕ mut nao ngui, 5-20% gơnam ƀong huă hăng anih jưh tuai, ƀơk brơi hơdôm tour hyu ngui, ƀơk prăk tui hră duh prăk brơi tuai hyu čuă ngui tui grup, ƀong huă soh sel ƀudah pơgiăng tuai mơng tơdron rơdêh por lơm tuai mă yua tơlơi bơwih bơwang ƀơi anih anom. Anai lĕ bruă yôm phăn mut hrŏm jơlan hơdră pơhưč tuai čuă ngui “Việt Nam-Nao kiăng khăp” anăp nao hơnong pơkă pơđĭ kyar bơwih ƀong huă mơng tơring čar Dak Lak thun 2025 đĭ truh 8% pơ glông.