Gah yŭ phun kyâo pơging tơ-ui amăng lan sang jơnum plơi pla ƀuôn Ky, phường Thành Nhất, tơring čar Dak Lăk, hmư̆ ring rai ur rek rek. Mơ̆ng mơguah mơtăm, mơnuih amăng plơi nao pơtum hơñum mơtăm či ngă yang adai hơduah ia hơjan. Đa prăp lui gơnam ngă yang, đa kih rơmet anih či ngă yang, đa hrăm atông čing, suang. Ayong Y Zoang Hđơk, mơnuih pơ ƀuôn Ky brơi thâo, hlâo kơ anun hơdôm hrơi, ƀing tha hăng ƀing tơdăm prăp lui laih gơnam či ngă yang, pơdong tông, hăng pơhrup, pơkra rup či ngă yang: “Nao ngă yang yua plơi pla ta pơphun ngă, jing abih bang gum ngă yơh, prăp rơmet djŏp đah mơ̆ng ngă yang mơak mơai”.

Truh mông laih, bruă prăp rơmet giong baih neh met wa amăng plơi buh eng ao mơñam, dŏ hơñum ƀơi anăp lan sang jơnum plơi. Jua čing hơgor mơñi mơak dik dak, tơlơi ngă yang pơphun laih. Ngă yang ñu 2 tal: iâu ia hơjan hăng ngă yang phrâo kông hiam drơi jăn kơ tha plơi. Pô phai ngă yang, iâu yang glăi lăng, glăi ngui tom, ƀong mơñum, ngă brơi hơjan klă angin rơnang, pơdai jor kơtor lu.

Tha plơi Y Bang Byă, mơnuih hơmâo pô phai phrâo kông brơi thâo, ngă yang suaih pral ƀu dưi rơngiă ôh amăng tơlơi ngă yang mơ̆ng djuai ania Êđê, ngă yang kiăng pô phao hăng ƀing nao ngui tom hiam drơi jăn pran jua, tơphă tơpai, bưng bôt: “Hrơi anai jing hrơi ngă yan iâu ia hơjan, ăt jing hrơi ngă yang phrâo kông kiăng hiam drơi kơ tha plơi. Anun jing tơlơi bưng bôt, tơphă tơphai kơ pô kâo, čang rơmang hiam drơi jăn na nao hnun kah thun dơi mơ̆ng ngă yang prong hloh, djru brơi neh met wa dong”.

Ngă yang giong, hơdôm bruă tơjŭ pla, đom bua lua pơnah hơmâo pơƀuh, pơhrup glăi. Pơhrup ngă "ia hơjan" hơmâo pơƀuh hlao amăng hrơi ngui anai kah hăng mơit tơlơi čang rơmang bơyan tơjŭ pla phrâo angin rơnang phang mơak, pơdai kơtor hơmâo lu.

Ngă yang giong, jing abih bang ngui ngor adoh suang, ƀong huă, mơñum tơpai čeh yơh. Hrơi ngui mơak biă mă, abih bang jê̆ giăm, thâo pơpŭ biă mă. Amai H Zê Na Byă, mơnuih amăng plơi lăi: “Hrơi anai jing hrơi mơak biă, yom biă mơn. Amăng hrơi mông mơak mơai, hơmâo lăng arăng suang, hmư̆ arăng atông čing. Amăng rơnuk phrâo hơmâo lu boh thâo ia rơgơi, hơmâo tơlơi adoh, yŭ er phara, jing gru grua djuai ania Êđê ăt khŏm djă pioh răk lui kơ rơnuk kar hăng kâo anai wơ̆t hăng adơi đeh tơdơi dong”.

Amăng hrơi mông mơak mơai, ik jua čin djring jua hơgor, ƀing tuai amăg čar ta wơ̆t hăng čar rơngiao ăt ngui hrŏm suang tom jua čing, mơñum ia tơpai čeh ƀâo bơngưi. Tơlơi ngă yang ƀu djơ̆ ngă yang kơ ană plơi dong tah, jing anih neh met wa hăng ƀing tuai thâo hluh dlăm hloh tơlơi hơdip gru grua djuai ania Êđê.

Ơi Antonie, mơ̆ng čar Prang, weh nao lăng ngă yang hơduah ia hơjan ƀơi ƀuôn Ky amăng tal anai. Jua čing, eng ao hiam đưm laih anun tơlơi thâo ngui, jê̆ giăm mơ̆ng ană plơi pla jing ngă ñu lăng mơak phara: “Kâo pơmin anai lĕ tơlơi ngă yang mơak, yom biă mă, hiam biă mă. Kâo hmư̆ lu laih tơlơi adoh mơak, tơlơi ayun suang hiam, neh met wa buh eng ao mơñam hiam phara. Kâo pơmin djuai ania Êđê ƀơi anai hơdip hiam biă. Kâo hor biă kơ tơlơi ngui anai”.

Giăm ha pluh thun rơgao, ngă yang hơduah ia hơjan hơmâo ngă laih anun ngă rim thun laih ƀơi ƀuôn Ky lơ̆m rơnuč blan klâo ƀudah blan pă. Amăng tơlơi hơdip rơnuk phrâo, kiăng dưi djă pioh na nao tơlơi ngă yang anai khŏm hơmâo tơlơi gir run mơ̆ng abih bang ană plơi hăng gong gai.

Pơjưh hĭ tơlơi ngui ngor amăng jua čing mơñi tơ-ua, hăng tơpai čeh jơman, ƀâo mơnâo glai rưng, tơlơi ngă yang ia hơjan ƀơi ƀuôn Ky ƀu kơnong kiăng yang pap brơi angin rơnang phang mơak đôč ôh, ăt kiăng hơdor glăi gru grua phun mơ̆ng djuai ania Êđê. Amăng tơlơi hơdip rơnuk anai, jua čing ƀơi ƀuôn Ky ƀu kơnong iâu ia hơjan đôč ăt iâu glăi tơlơi lăp hơdor rơnuk đưm mơ̆ng plơi pla./.