Anai lĕ sa amăng hơdôm hơdră anăp nao hơdor glăi 120 thun akŏ pơdong tơring čar Dak Lak. Hơdră adoh suang anai pơdah ƀơi anih ngă tơrưng adoh suang gah yŭ phun kyâo krin anăn kyâo Long Não amăng đang sang djă pioh gru grua sang pơtao Bảo Đại juăt dŏ, ƀơi plơi prong Ƀuôn Ma Thuột.

Amăng hơdră pơdah tơlơi adoh suang pơhrôp tơlơi mơyang, hiam rô̆ lu ia iom apui pơčrang hăng jua adoh suang, jua mơñi lŏn mơnai glai klô čư̆ siăng, ƀing tuai nao ĕp lăng pơhưč pran jua biă mă, lăng gru eng ao đưm hiam mơ̆ng djuai ania Êđê, pơblih hrŏm ngă hơbô̆ phrâo lu djuai ania Êđê, Jarai, Bahnar…yua kơ pô pơjing eng ao yă Đặng Thị Minh Hạnh pô ngă. Hơdră adoh suang anai  dăp hơdră lu mơta, hiam klă, kơdrưh ang pơƀuh brơi djop mơta bruă mă rơngai mraih, rơwơi mơñam mrai đưm djop djuai ƀiă, wơ̆t hăng bruă krih ale, pơ-ô mơñam rêu rô bung bai, bruă man gŏ lŏn….Bruă mă anai, kiăng djru pôr pơthâo rup rap plơi prong Ƀuôn Ma Thuôt pơdrong sah, hing ang, hiam klă, dŏ hnơ̆ng kyâo glai, plơi pla đưm đă; anăp nao kơ bruă man pơdong, djru hrŏm bruă gum pơgôp djuai ania amăng đơ đam tơring čar Dak Lak.