Rơbêh kơ 15 thun hơtuk rơyă tơnă hơbai ƀơi Sang ƀong huă hmư̆ ư ƀơi Quy Nhơn, ayong Huỳnh Tấn Dũng, sang sĭ gơnam ƀong “Rừng nướng” phường Quy Nhơn hur har pran jua hăng gơnam ƀong huă Dap Kơdư. Ayong Dũng brơi thâo: Tuai čuă ngui nao pơ Quy Nhơn, Gia Lai hor či ƀong biă gơnam mơ̆ng dap kơdư, kah hăng be, rơmô ŏm amăng đing ƀudah mơnŭ, bui brông ŏm ƀơi hơdăng: “Pô kâo ăt kiăng pơkra jơman tui mơnŏng ƀong huă hmư̆ ư mơ̆ng plơi pla hăng hơdôm tơlơi hơmâo hơđăp laih. Kâo pơkra añăm ƀong kiăng ayong amai adơi thâo, anun lĕ pơkra jơman hloh, pơƀut hrŏm lu mơta djuai añăm ƀong, hra ngôt, hla ƀâo hiam hơmâo hơđăp amăng plơi pla wơ̆t hăng ƀơi Việt Nam ta, kiăng ƀing tuai lơ̆m rai ngui pơ Việt Nam ăt kah hăng rai ngui pơ Gia Lai, rai pơ plơi prong ia rơsĭ anai, hơmâo ƀong djơ̆ anŏ jơman Việt Nam jê̆ giăm mơ̆ng ƀing ta”.

Arŏng ia rơsĭ arăng iâu Bọ biển hơ-ŏt kơhul ia pơ-iă hăng drah Bọ biển, akan jing ŏm ƀơi hơdăng, lẩu hơdang prong, ačung ia rơsĭ ŏm hăng phomai, akan dìa biển nấu mẳn...jing hơdôm mơta añăm ƀong ƀâo mơnâo ia rơsĭ, hơmâo ƀing rơgơi tơnă hơbai añăm mơ̆ng sang mơdrô ƀong huă hmư̆ ư ƀơi Quy Nhơn pơmut amăng hră gơnam pŭ kơ tuai Thun čuă ngui Dêh čar - Gia Lai 2026. Nao ngui pơ Quy Nhơn hăng hyu sem lăng djŏp anih anom amăng thun čuă ngui Dêh čar 2026, ayong Trần Nhật Đông, tuai mơ̆ng ƀôn prong Hồ Chí Minh lăi: “Mơnŏng ƀong huă pơ Quy Nhơn hơmâo lu biă, rơngiao kơ akan hơdang ia rơsĭ, jing hơmâo ƀong mơn añăm mơ̆ng glai rưng Dap Kơdư dong kah hăng djŏp mơta añăm ŏm. Anŏ ƀăt jơman ñu djơ̆ mơn hăng kual Kơdư, wơ̆t hăng gah Dơnung. Kâo ƀong mưn ñu kar hăng dŏ pơ sang mơn”.

Yă Nguyễn Thị Kim Chung, Kơ-iăng khua Gơnong bruă gru grua bơrơguăt drơi jăn hăng Tuai čuă ngui tơring čar Gia Lai pôr pơthâo, amăng hrơi mông Gia Lai jing anih čuă ngui yom amăng Thun čuă ngui dêh čar 2026, bruă bơwih bơwang tơnă asơi hơbai añăm glăk pơplih rơđah laih. hơdôm boh sang sĭ gơnam ƀong huă thâo hluh tui, gơgrong hloh amăng bruă sĭ mơdrô, anăp nao akŏ pơjing rup hyu ngui jê̆ giăm, thâo rơgơi: “Amăng rơwang hrơi tơjuh thun čuă ngui dêh čar, hơdôm anom bruă sĭ mơdrô ƀơi tơring čar hơmâo ngă klă tui bruă bơwih bơwang, ăt kah hăng anih anom, sang dŏ, mơnuih mă bruă či čơkă tuai. Hơdôm anom bruă ăt pơkra rai lu gơnam, biă ñu gơnam ƀong huă, añăm jơman hmư̆ ư  mơ̆ng tơring. Pôr pơthâo kơ thun čuă ngui dêh čar kơtang hloh dong, kiăng ƀing tuai thâo djŏp tơlơi ngui hơmâo amăng thun čuă ngui dêh čar”./.