Mơguah bơyan phang, lơ̆m pơ-iă pơčrang trun ƀơi adring sang, ăt jing mông ơi Siu Nhuel (ƀơi ƀon Rơniu, să Ia Tul, tơring čar Gia Lai) mơñam rơ-i. Hơdôm ƀĕ đing pơ-o ñu krih, tơluah lơluih, rơmuăn biă. Hơdôm čơnăo phun huai ăt hơmâo ñu tơluah hiam bơblao mơn. Ngă djom, tong ten biă, anun jing rơ-i čơngua ñu mơñam ƀu kơnong kjăp đôč ôh ăt hơmâo bơnga hiam, tơnap kah hăng bơnga kơtôl, bơnga pơtruai. Ơi Siu Nhuel hok mơak ră ruai: “Mơ̆ng anun lơ̆m kâo dŏ tơdăm laih kâo hor mơñam. Kâo lăng ƀing met, ƀing wa mơñam kâo hor, anun jing kâo hrăm. Ta ngă bruă anai khŏm gir kah mơ̆ng dưi, hrăm mơ̆ng pô anai aset, pô adih aset, ƀuh anŏ hơget ñu hiam lĕ ta hrăm, sui sui jing juăt mơn. Kâo thâo mơñam djŏp laih gơnam, mơ̆ng amuñ truh pơ tơnap. Rim gơnam ñu hơmâo mă yua phara mơn, hmutu rơ-i lĕ ta pioh pơdai, lai kơtor, bơ čơngua ta tơpơi, hơdơi braih, đa ta pioh asơi pơđih. Bơ sêng lĕ ta pioh ƀhu pơdai, rơtă ta...Rơnuk anai aset laih mơnuih thâo mơñam, anun kâo gir ngă yơh, kâo hor, kâo pơ-ư biă, kâo pơmin ngă tui anai lĕ ta dưi djă lui gru ama grua amĭ ta kơ rơnuk tơdơi ñu thâo”.

Ăt hơmâo tơlơi hor mơñam rơ-i čơngua mơn, ơi Rmah Tung, să Đức Cơ, tơring čar Gia Lai ăt thâo mơñam rơ-i, rêu rô tơnap, kah rô dua tal. Tơlơi ñu bơngơ̆t biă ră anai lĕ bruă anai jai hui laih mơnuih thâo: “Kâo hrăm mơñam mơ̆ng met kâo, met ñu pơtô brơi ten biă, anun kâo thâo mơñam djŏp gơnam yơh. Kâo thâo mơñam rơ-i, rêu rô tơnap kah hăng rô dua tal, rơngiă lu mông, yua ta ngă lu tal, anun jing ñu pơmă hloh kơ gơnam pơkŏn mơn. Rơnuk anai, amăng anun dŏ aset đôč mơnuih thâo mơñam, ƀing anong wa ăt tha tui baih, anun kâo kiăng ƀing čơđai gir djă lui gru ama grua amĭ ta”.

Ƀu kơnong rơgơi mơñam đôč ôh, lu đah rơkơi Jarai ăt thâo trah rup pơsat - sa gru grua hiam amăng tơlơi huă pơthi, huă lui gui rong. Hơdôm pok rup trah anai ñu hơmâo anŏ yom gah gru grua, bơngăt jua, pơƀuh glăi tơlơi hơdip mơda ơi yă ta đưm mơ̆ng rim tơhnal, kru ta trah, khoer: “Bruă trah rup pơsat anai jing tơlơi phiăn Jarai ta mơ̆ng đưm đă ră hlâo laih, jing gru ama grua amĭ anun jing gơmơi khŏm djă pioh, kâo thâo pơkra jing kâo pơtô glăi kơ plơi pla, ană tơčô mô yâo. Rup pơsat anai ñu hơmâo lu mơta mơn kah hăng ama kuai ană nao pơ hmua, rup đah bơnai pi ană, rup arăng čok hia. Amăng anun rup ama kuai ană, amĭ glăk pơmem ană yơh ñu tơnap hloh, yua dah ta trah nao trah rai, lu tal kah mơ̆ng ƀă, mơ̆ng hiam...Abih bang rup trah ñu hơmâo boh pia phara mơn, pơƀuh glăi tơlơi phiăn huă lui gui rong, tơlơi hơdip amĭ ama ơi yă ta đưm. Amăng plơi gơmơi dŏ ƀiă laih mơnuih thâo trah rup, ƀing tha lĕ ƀu anăm trah dong tah. Jing mơak mơn amăng sang anŏ gơmơi han tâo, ană bă kâo ñu hor, kâo pơtô lĕ gơñu hrăm tui mơn”.

Amăng tơlơi hơdip pơplih phrâo, mơnuih tui hăng ơi Siu Nhuel, ơi Rmah Tung hăng ơi Kpă Huăt ăt dŏ kret kruai djă lui gru ama grua amĭ hăng pran jua hor, gir laih anun pơ-ơ pơ-ang lăng kơdrưh biă mă. Gơñu ƀu kơnong pơkra gơnam yua ƀudah pơkra rai anŏ hiam đôč ôh, ăt djru djă pioh gru ama grua amĭ kjăp tui thun blan./.