Jơlan hơdră nao sem lăng anai pơphun mơ̆ng lơ 1-4/4, hơmâo lu sang bruă ba tuai hyu ngui, anom bruă tơlơi pơhing, sang bruă čih hră pơhing phrâo nao hrŏm wơ̆t hăng ƀing mơnuih rơgơi kơhnâo, mơnuih hmư̆ hing, ƀing pôr tơlơi pơhing brơi kơ mơnuih mơnam gah tuai hyu ngui amăng dêh čar hăng tač rơngiao ăt nao hrŏm mŏn. Grup hơmâo nao pơ anih či ĕp lăng, pơtong rơđah gơnam tuai čuă ngui hơmâo phara hơjăn amăng gru grua đưm, lŏn mơnai glai klô hăng kông ngăn gru grua hiam ƀơi Dak Lak, mơ̆ng anun kiăng pơtong rơđah rơnoh tuai hyu ngui, bơwih brơi kơ tuai hyu ngui mơak klă, jơlan glông nao rai hăng bruă či pơphun tour, khul grup tuai hyu ngui.

Lu tơlơi pơgôp hiăp lăi, kiăng dưi tŭ mă boh tơhnal hiam klă mơ̆ng anŏ gêh găl anun, Dak Lak kiăng čuk pơkra jơlan glông nao rai pơtruh djop anih hiam klă, lăi pơthâo anŏ hơmâo amăng kual hiư̆m pă tŭ yua, pơtrut pơsur bruă pôr pơthâo gơnam tam pơblih yua mrô, wai lăng bruă tuai čuă ngui. Ơi Trần Hữu Phước, khua kông ty THP Travel Tour & Caravan Center, ƀơi Quảng Trị brơi thâo:

“Ră anai, jơlan pơtruh nao rai plah wah kual Dap Kơdư hăng kual Tong krah laih anun djop tơring čar ter hang ia rơsĭ aka ƀu hiam đơi ôh. Kâo pơmin lĕ khom pơkă hnơ̆ng čuk pơkra jơlan hiam klă hloh. Tơdah pơkra jơlan anai djơ̆ lăp, lu grup Caravan pơtruh hăng Dak Lak, djop tơring čar amăng kual Dap Kơdư dưi pơtruh hiam hăng djop tơring čar ƀơi kual tong krah, wơ̆t hăngg nao truh pơ Đà Nẵng hăng Quảng Trị hai amra pơjing sa gơnam pơtruh nao rai hiam klă ba hyu tuai Caravan”.

Lu khua mua lăi lĕ, Dak Lak kiăng ba yua anŏ gêh găl prong pioh pơtrut tui bruă tuai čuă ngui phrâo, boh nik ñu gơnam tam hơmâo laih phara hơjăn, gơnam ƀong huă anih hyu ngui amăng mơmŏt mlam kiăng pơđĭ tui anŏ hor dŏ glăi, găn rơgao amăng plơi pla. Hrŏm hăng anun, Dak Lak kiăng kơtưn pơtruh nao rai bruă pôr pơthâo hăng hyu ĕp anih jak iâu, pơčrâo ba bruă tuai hyu ngui amăng dêh čar hăng truh pơ tač rơngiao, ngă anŏ pơsur kiăng tuai jar kmar rai ngui amăng tơring čar.

Tui hăng Gơnong bruă Gru grua, Pơrơguăt drơi jăn hăng Tuai čuă ngui Dak Lak, tơdơi kơ pok pơhư prong tui, anih anom pơđĭ kyar, bruă tuai čuă ngui amăng tơring čar amra gêh găl hloh, dưi pơtruh nao rai amăng lu anih kah hăng mơ̆ng glai klô čư̆ siăng trun nao pơ ia rơsĭ. Kơnong kơ klaoa blan tal I/2026, đơ đam tơring čar hơmâo čơkă năng ai 2,3 klăk wơt tuai hyu ngui, prăk pơhrui glăi 4.100 klai, ăt đĭ tui mơ̆n. Lê Phúc Long, Kơ-iăng khua Gơnong bruă gru grua, Pơrơguăt drơi jăn hăng Tuai čuă ngui Dak Lak brơi thâo, tơring čar hlăk anăp nao kơ bruă čơkă tuai hyu ngui jing bruă ngă bơwih ƀong huă phun, ba akŏ hlâo, kiăng akŏ pơjing anăn ‘Dak Lak-Glăi pơ kual kông ngăn gru đưm” jing anih hyu ngui pơhưč lu tuai rơnguai amăng dêh čar hăng mơ̆ng tač rơngiao.

“Jơnum tal anai amra djru anom bruă gru grua, pơrơguăt drơi jăn hăng tuai čuă ngui hơmâo lu bruă mă, lăi pơthâo mơ̆ng tơlơi phiăn pơkă kơ bruă mă, pơđĭ kyar pơkra ming gơnam sĭ mơdrô kơ tuai hyu ngui, anăp nao pôr tơlơi pơhing, hyu ĕp bruă mă kiăng ngă hiư̆m pă pơhưč tuai nao pơ Dak lak, hyu ngui amăng lŏn glai, đang  hmua, dŏ glăi amăng plơi pla ră anai ƀơi Dak Lak”.