3 blan akŏ thun, tuai mơ̆ng čar rơngiao rai ngui pơ Gia Lai hơmâo giăm 65.000 wơ̆t, đĭ 72%; tuai amăng čar ta hơmâo rơbêh 4,1 klăk wơ̆t, đĭ giăm 14%. Prăk pơhrui mơ̆ng bruă čơkă tuai 3 blan hơmâo năng ai 8.700 klai, đĭ 17% pơhmu hăng tơđar. Kơnong amăng blan 3, mrô tuai hăng prăk pơhrui glăi giăm ha mơkrah hăng rơbêh 2 klăk wơ̆t, prăk hơmâo giăm 4.000 klai.

Tơlơi hmư̆ ư hloh lĕ Rơwang pok pơphun Thun tuai čuă ngui dêh čar Gia Lai 2026 pơphun mơ̆ng lơ 23 truh 30 blan 3, hăng lu bruă prong kah hăng Jơnum čơkă tuai hyu ngui Gia Lai 2026, Jơnum pơtrut tuh pơ alin hăng čơkă ƀat tô tuai mơ̆ng jar kmar jưh ƀơi tơdrun kom păn Quy Nhơn. Amăng kŭi II thun 2026, tơring čar Gia Lai pơtrut pơhưč tuai čuă ngui hăng lu bruă kah hăng: Hrơi ngui gru grua djŏp djuai ania tơring čar tal V; Pơplông bơkjăp drơi jăn djŏp djuai ania ƀiă; Čuă ngui bơyan pơdơi prong “Gia Lai - Anih čuă ngui pơhưč biă”; hrŏm hăng jơlan hơdră pơƀuh hyu anih čuă ngui ƀơi čar rơngiao, hăng tơlơi čuă ngui hmư̆ hing “Atông čing rơnuč rơwang hrơi tơjuh -Hmư̆ hăng pel ĕp”. Hăng hơdôm bruă jơnum ngui anai, tơring čar Gia Lai čang rơmang pơkra anih čuă ngui pơhưč ƀing tuai amăng čar ta wơ̆t hăng ƀơi jar kmar./.