Tơdơi kơ pơmut hrŏm, tơring čar dak Lak hơmâo kual bơwih brơi tuai čuă ngui yôm phara-anih kual Dap kơdư pơbưp hăng ia rơsĭ. Amăng anun, kual Dap kơdư lĕ pơ ala brơi pran kơtang kơtang, pơtum pơƀut djop mơta gru grua mơng djop djuai ania, kual ter hang ia rơsĭ gah Ngŏ lĕ kual dik dak, pơmut hrŏm mơng ia rơsĭ. Sit biă ñu, mơng Dap kơdư trun nao pơ ia rơsĭ ƀơi tơring čar Dak Lak lêng kơ ƀuh čư̆ apui kơdir-lŏn drơ̆t baza yôm phara, tơkuh nao rai gru grua čing hơgor hăng adôh Bài Chòi Dơnung tong krah. Amăng hrơi blan rơgao, ƀơi Dak Lak hơmâo pơphun lu bruă bơwih brơi tuai čuă ngui anun lĕ: pơphun grup famtrip ĕp lăng bruă čuă ngui hrŏm hăng ba hyu tuai, mă tơlơi pơhing, KOLs, KOCs; jơnum lăng glăi boh than ba glăi mơng bruă čuă ngui “Dak Lak-Glăi pơ kual gru grua”, pơphun jơnum sang čơ sĭ mơdrô-tuai čuă ngui, OCOP hăng gơnong yôm ƀon lan; ngui pĕ gông brô̆-DJ-ngă sen djru brơi tuai čuă ngui…

Ơi Lê Phúc Long, kơ-iăng Khua gơnong bruă gru grua, bơrơguăt drơi jăn hăng tuai čuă ngui Dak Lak brơi thâo:

“Tuai čuă ngui rai kual Yŭ Dak Lak amra dưi hmư̆, ĕp lăng gru grua čing hơgor hăng ƀing gơmơi amra hơmâo hơdôm bruă bơwih brơi tuai ĕp lăng anun lĕ pơkra čing, atông čing, tul čing dong. Bơ hăng kual Ngŏ hơmâo Bài Chòi, ƀing gơmơi dưi pơjing hơdôm tour Bài Chòi. Kar hăng ƀing ta amra brơi tuai čuă ngui pel lăng, dưi adôh, buh eng ao gru grua; mă yua hơdôm gơnam tam, hơdôm gông brô̆ gru grua mơng djuai ania, mơng anun amra pơhưč tuai čuă ngui.”

Amăng rơwang hrơi tơjuh blung a pơphun hơdôm bruă tuai čuă ngui tơring čar Dak Lak thun 2026, mơnuih ƀôn sang hăng tuai čuă ngui dưi mut hrŏm jơlan hơdră adôh suang mơ-ak. Ơi Cao Hữu Nhạc dŏ amăng phường Tuy Hòa, tơring čar Dak Lak pơdah pran đăo gơnang kơ bruă pơđĭ kyar tuai čuă ngui amăng ƀon lan.

“Hok mơ-ak biă mă hơdôm bruă ngui adôh suang hơmâo pơphun mơng kual Dap kơdư truh pơ hang ia rơsĭ, tơlơi anai brơi ƀuh lơm pơmut hrŏm ăt hơmâo tơlơi gal phara mơn. Anai lĕ kiăng pok rai, tơkuh kơplah wah djop kual mơ̆ yôm hloh lĕ tơkuh nao rai kơplah wah kual Dap kơdư hăng hang ia rơsĭ, amra jing tơlơi gal kiăng pơđĭ kyar tuai čuă ngui.”

Tui gơnong bruă gru grua, bơrơguăt drơi jăn hăng tuai čuă ngui tơring čar Dak Lak, tơdơi kơ pok prong kual pơđĭ kyar, tuai čuă ngui amăng ƀon lan hơmâo lu tơlơi gal kiăng pơjing hơdôm gơnam pơlir kơplah wah kual Dap kơdư hăng hang ia rơsĭ. Anai lĕ atur yôm phăn kiăng hơmâo djop gơnam anih ĕp lăng, hrưn đĭ pran bơkơtưn mơng anih čua wngui. Thun 2025, Dak Lak hơmâo čơkă rơbêh 7,3 klăk tuai čuă ngui, đĭ rơbêh 31% pơhmu tui tơđar thun hlâo. Kơnong rơwang tal I/2026, đơ đam tơring čar čơkă giăm 2,3 klăk tuai čuă ngui, pơhrui truh rơbêh 4.100 klai prăk, tŏ tui rơnoh pơđĭ kyar klă hloh.

Tơring čar anăp nao ba bruă tuai čuă ngui jing gơnong bruă bơwih ƀong akŏ phun, ƀơƀrư̆ pơjing anăn păn ‘Dak Lak-Glăi pơ kual gru grua” jing anih pơhưč tuai čuă ngui amăng lŏn ia hăng tač rơngiao. Mơng jua čing hmư̆ bang tơ-ua mơng kual Dap kơdư truh pơ adôh Bài Chòi dik dak ƀơi kual hang ia rơsĭ, rup rap Dak Lak pơƀuh rai djop mơta, mơ-ak klă hăng pơhưč lu mơnuih. Yua mơng bruă tơkuh nao rai anun glăk jing anih pơhưč phara, jak iâu tuai nao ĕp lăng hăng amra ƀuh sa kual lŏn hơmâo lu gru grua yôm phara, bă blai pran hơdip./.