Ơi Đinh Quốc Tuấn, Khua anom bruă djuai ania tơring čar Kon Tum lăi, hrŏm hăng bruă pok pơhai tơlơi bơwih ƀong huă-mơnuih mơnam amăng kual djuai ƀiă, bruă mă djă pioh gru grua hiam hăng pơđĭ tui rơnoh gru grua đưm hiam klă amăng tơring čar, amăng anun tơlơi pơhing lăi nao kơ anih pioh atông čing ring hơgor lăp đing nao biă mă, pok pơhai lu bruă mă tŭ yua sit nik. Truh ră anai, hơmâo 2.500 ring čing dưi hơmâo djop plơi pla djuai ƀiă dŏ djă pioh hăng atông na nao sit hơmâo mông jơngum mơak, ngui ngor ngă yang amăng plơi pla ƀudah hyu pơdah amăng plơi prong kiăng pơlar tui, djă pioh gru grua hiam đưm anun kơ djuai ania; boh nik ñu hơmâo lu grup atông čing, pơphun lu bruă ngui ngor gru grua yôm amăng tơring čar djă pioh tơlơi mơak klă bơngăt jua, pơdah amăng mông jơnum bruă kơđi čar, tơlơi pơtum bruă mơnuih mơnam amăng tơring čar. Anai yơh mông gêh găl pioh kơ ƀing atông čing, ƀing suang arap pơdah tơlơi mơak, tơlơi hiam mơ̆ng gru grua đưm djop djuai ania, kiăng djop gưl rơnuk čơđai thâo hăng djă pioh rơnoh yôm mơ̆ng bruă atông čing suang arap, gơñu gơgrong ba, glăm ba bruă djă pioh hăng pơlar tui rơnoh yôm gru grua anun.

Ngă hrŏm amăng “Mlam atông čing suang arap djop djuai ania ƀiă tơring čar Kon Tum” hơmâo 170 čô mơnuih kơhnăk bruă čing hơgor amăng 8 grup. Amăng anun 7 grup mơ̆ng 7 djuai ania ƀơi tơring čar, hơmâo: Sedang, Bahnar, Jeh-Triêng, Jarai, Brâu, Rơmâm hăng Hrê.

Amăng mlăm mơak, ƀing kơhnâo kơhnăk atông čing suang arap pioh lu mông ngui ngor, hrăm nao rai tơdruă tơlơi thâo, gru grua hiam đưm mơ̆ng djuai ania pô hăng 245 čô mơnuih hơmâo anăn nao jơnum ngui hrŏm, pơhmư̆ jơnum ruah khua pơ ala djop djuai ania ƀiă tơring čar Kon Tum tal IV. Mơnuih kơhnăk ƀudah mơnuih gru ơi Ri Ang, djuai ania Sedang (Hơdang), plơi Kon Wơ̆ng Kia, tơring kual Măng Đen, tơring glông Kon Plong brơi thâo:

“Grup atông čing ƀing gơmơi lĕ 17 čô rai hrŏm, pơdah atông čing suang arap čơkă mơak Jơnum prong ruah khua pơ ala kơ djuai ania ƀiă. Hơdră ƀing gơmơi pơdah lĕ, atông čing, suang arap tui tơlơi phiăn plơi pla pơblih phrâo. Kâo hok mơak biă mă dưi raih pơdah, hơmâo ngui hrŏm, hrăm tui ƀing adơi ayong djuai ania pơkŏn amăng tơring čar Kon Tum. Kâo mơak lăp pơ-ư ang biă mă”.

Hơdôm tơlơi atông čing ayun suang amăng mlam anun, kah hăng: Atông čing, suang arap “Mơak hrơi jơngum ngui” mơ̆ng ƀing thâo atông čing suang arap djuai ania Bahnar, tơring glông Đak Hà: atông čing bơni tơlơi adoh “Hơdor tơngia kơ Ping gah, Wa Hồ”, djuai ania Jeh Triêng, tơring glông Đak Glei; atông čing Đing Bu jing gông kram, jua mơñi pioh pơgang hmua, wai pơdai, mơ̆ng juai ania Brâu, tơring glông Ngọc Hồi; Mơak jơnum plơi, djuai ania Bahnar, plơi prong Kon Tum…..hơmâo pơhưč lu mơnuih đing nao amăng mlam atông čing suang arap jua mơñi phun akha-Gum pơgôp djop djuai ania tơring čar Kon Tum. Mơnuih kơhnâo kơhnăk adoh suang Phạm Văn Hân, Khua anom bruă gru grua-adoh suang tơring čar Kon Tum, brơi thâo, anai lĕ hơdôm hơdră pĕ gông atông čing, ayun suang hiam mơak biă mă, jing gơnam gru grua yôm bơngăt jua mơ̆ng 7 djuai ania ƀơi tơring čar Kon Tum dŏ djă pioh:

“Hơdôm hơdră pơdah pơƀuh lăng hiam, hmư̆ mơak hloh, pơ ala brơi anŏ hiam ia rơgơi gru grua bơngăt jua mơ̆ng đưm djop djuai ania. Kah hăng tơlơi adoh pơngui ană, laih anun atông čing suang arap, čơkă tuai ƀudah hơdôm hơdră adoh suang ngă suh (sôr) mơak amăng mông ngui ngor rim djuai ania. Mlam adoh suang atông čing ring hơgor anun pơdah rai tơlơi gum pơgôp djop djuai ania tơring čar Kon Tum”.

Mơnuih kơhnâo kơhnăk gru đưm A thut dŏ ƀơi să Mường Hong, tơring glông Sa Thầy pơdah pran jua hok mơak lơ̆m ƀuh lu hơdră ngui ngor atông čing hiam mơak tloh noh amăng mlam pơdah atông čing ayun suang. Ñu ƀuh mơak hloh lĕ, lơ̆m khul adoh suang mơ̆ng djop grup mơnuih kơhnâo kơhnăk, mơnuih thâo ayun suang jing hlăk ai tơdăm ngek dra muai, wơ̆t čơđai muai pơdah hrŏm lu mơta gông brô̆, čing hơgor, đing ayup. Tơlơi anun brơi ƀuh, hrăm tui tơdruă djop rơnuk pioh ngă tui hơdră adoh suang gru grua mơ̆ng djuai ania ƀiă dŏ djă pioh hăng pơlar tui amăng tơring čar, djru hrŏm pơđĭ tui rơnoh yôm gru grua hiam đưm, anŏ ngă mơak amăng bơngăt jua ană mơnuih mơ̆ng djop plơi pla tơring čar Kon Tum.

Mlam ngui ngor anun ăt mông gêh găl pioh bưp nao rai, jĕ giăm, hrăm tơdruă, ngă kjăp tui tơlơi gum pơgôp djuai ania, plơi pla, laih dơ̆ng pơđĭ tui pran jua pơ-ư ang djuai ania hăng tơlơi thâo hluh pơgang pioh, lăng yôm rơnoh gru grua hiam mơ̆ng djop djuai ania.