Hrŏm hăng pơđĭ kyar bruă ngă hmua mă yua boh thâo phrâo, djuai ania K’ho ƀơi tơring kual Lạc Dương ĕp prăk lu tui hăng bruă pơphun ngui ngor atông čing, tơkŏng rơyă tơpai čeh, tơnă asơi hơbai añăm bơwih brơi ƀing tuai hyu ngui. Mơnuih kơhnăk Kră Jan K’Mơ, dŏ ƀơi ƀut plơi Đăng Ja Rít, tơring kual Lạc Dương brơi thâo: rơngiao kơ pơhrui prăk mơ̆ng añăm pơtăm, bơnga, kơphê...anih ngui ngor atông čing ring hơgor pơ sang anŏ ñu bơwih brơi hơdôm rơbâo wơ̆t čô tuai, ba glăi prăk rơbêh 100 klăk.

“Blung a kâo aka ƀu thâo ngă bruă bơwih brơi tuai hyu ngui ôh, aka ƀu pơmin nao ôh bruă djă pioh hăng pơtrut tui gru grua mơ̆ng djuai ania pô, samơ̆ mơ̆ng hrơi lŏn ia ta jai đĭ kyar, gơmơi pơmin nao laih bruă djă pioh, răk lui čing, goong, sang glông...hăng djŏp djuai goong brô̆ đưm đah mơ̆ng čơkă tuai rai ngui pơ plơi yŭ tơkai čư̆ Langbiang anai, bơwih brơi tuai čuă ngui gơmơi amra tŭi apui tơlŭi, atông čing, pĕ goong, adoh suang brơi tuai hmư̆, kiăng abih bang ngui mơ-ak, jê̆ giăm. Prăk mơ̆ng bruă anai kâo pơpha kơ grup atông čing, ƀing suang, dŏ rơbêh lĕ kâo pioh ngă bruă bơwih brơi tuai dong....Bơ hơdôm boh sang anŏ pơkŏn hơmâo prăk mơ̆ng bruă atông čing bơwih brơi tuai lu hloh kơ sang anŏ gơmơi”.

Ƀu kơnong sang anŏ ơi Kră Jañ K’Mơ đôč ôh, lu neh met wa djuai ania K’ho pơ anai thâo pơtrut tui gru grua hiam mơ̆ng djuai ania gơñu pơhưč tuai nao ngui. Rơngiao kơ atông čing, neh met wa ăt mơñam mrai, tơkŏng tơpai čeh, hơbai añăm pơtăm đah mơ̆ng bơwih brơi klă hloh kơ ƀing tuai. Amai Dàgout Groel, dŏ ƀơi tơring kual Lạc Dương brơi thâo, hrơi hơmâo tuai nao ngui, sang anŏ ñu hơmâo rơbêh 2 klăk prăk mơ̆ng bruă sĭ tơpai čeh. Amai Dàgout Groel hok mơ-ak lăi:“Lơ̆m hơmâo wan lĕ gơmơi tơkŏng rơyă tơpai čeh hăng ngă asơi brŏm đing bơwih brơi tuai rai ngui, yua anai lĕ bruă juăt ngă laih mơ̆ng sang anŏ ƀu dưi lui ôh...ta khŏm ngă klă tui. Hrơi ƀơi thơ hơmâo lu tuai lĕ sang anŏ gơmơi hơmâo năng ai 2 truh 2,3 klăk, tơdah hui tuai lĕ gơmơi sĭ kơ hơdôm anih ngă bruă tuai hyu ngui giăm plơi pla, ƀudah hơdôm boh sang anŏ kiăng blơi, ăt ba glăi mơ̆ng 1,5 truh 2 klăk mơn rim hrơi”.

Anŏ yôm gru grua hiam đưm hlâo mơ̆ng djuai ania, mơnuih ƀôn sang djuai ania K’ho ƀơi tơring kual Lạc Dương pơđĭ kyar bruă bơwih brơi tuai, djru pơplih tơlơi hơdip mơda. Ơi Lơ Mu Ha Pier, Kơ-iăng khua Jơnum min djŏp djuai ania mơnuih mơnam Việt Nam tơring kual Lạc Dương pơsit: bruă ba gru atông čing bơwih brơi ƀing tuai ƀu kơnong pơđĭ tui prăk pơhrui đôč ôh mơ̆, ăt djă pioh gru grua ngui ngor atông čing ring hơgor kual Dap Kơdư.

“Jing sa čô mơnuih ană plơi kơnang pơ kual mơnuih djuai ƀiă, kâo mơ-ak biă lơ̆m ƀuh neh met wa kual Dap Kơdư ƀing ta thâo djă pioh, pơtrut tui gru grua hiam mơ̆ng ơi yă ta kah hăng: čing hơgor, mơñam mrai, tơkŏng rơyă tơpai čeh...bơwih brơi kơ ƀing tuai mơ̆ng dêh čar wơ̆t hăng mơ̆ng čar rơngiao dong lơ̆m nao ngui pơ tơkai čư̆ Langbiang anai, ngui ngor mơ-ak hrŏm gru grua boh thâo hiam đưm hlâo, mơ̆ng anun amra pơƀuh hyu gru grua hiam pơ anai hăng djŏp tuai rơnguai mơ̆ng ataih, tơlơi kâo kiăng lĕ neh met wa djuai ƀiă ƀơi Lâm Đồng lăi hrŏm hăng neh met wa dŏ pơ tơkai čư̆ Lang Biang anai pơtrut tui gru grua hiam anun”.

Ră anai, tơring kual Lạc Dương, tơring glông Lạc Dương, tơring čar Lâm Đồng hơmâo 11 anih ngui ngor atông čing mơ̆ng hơdôm boh sang anŏ hăng 4 anih sĭ mơdrô bơwih brơi tuai hyu ngui. Rim thun, gong gai hăng anom apăn bruă pok anih hrăm atông čing kiăng djă pioh, pơtrut tui gru grua hiam mơ̆ng đưm. Mơ̆ng anun djru neh met wa pơđĭ kyar bơwih ƀong hăng bruă bơwih brơi tuai hyu ngui. Thun hlâo, tơring glông Lạc Dương hơmâo čơkă rơbêh 2,5 klăk wơ̆t čô tuai hyu ngui. Hăng tơlơi bơwih ƀong anai, pơ anăp dong, tơlơi hơdip mơnuih djuai ania K’ho ƀơi tơkai čư̆ Lang Biang, tơring kual Lạc Dương, tơring glông Lạc Dương anai amra đĭ kyar hloh./.