Pra yang ơi pơtao Hùng hơmâo man pơdong hăng kơčong čư̆, amăng ƀut plơi 6, să giăm guai Dak Buk So, tơring glông Tuy Đức, tơring čar Dak Nông. Hlâo kơ hrơi huă pơsat, neh met wa hơmâo đing nao rơmet pơagaih jum dar pra yang: pik vôi ƀơi pơnăng, kih rơmet lan sang, dưm dăp glăi kơƀang grê ƀơi anih čơkă tuai phrâo man pơdong. Ơi Chử Anh Chương, ding kơna Khul wai lăng pra yang brơi thâo, lơ 10/3 tui blan di lĕ hrơi ngui ngor prong ƀơi kual giăm guai anai hăng ƀing mơnuih ataih mơng plơi pla Phú Thọ:

“Abih bang mơnuih lêng kơ anăp nao plơi pla ơi yă amĭ ama, hăng tơlơi pơmĭn: “Mah hyu dŏ pơpă tŭ mơn, kiăng hơdor hrơi huă pơsat lơ 10 blan 3”, Neh met wa hlơi hlơi lêng kơ pơmĭn tui anun. Ƀing gơmơi man pơdong pra yang anai kiăng rĭm bơyan huă pơsat lơ 10/3 amăng ngă yang, bơ truh rơnuč thun pơphun bưp ƀô̆ mơta ƀing mơnuih mơng Phú Thọ, pơlăi nao rai tơlơi găn rơgao bơwih ƀong huă, ngă đang hmua, rông hlô mơnong ƀudah sĭ mlia”.

Pra yang ơi pơtao Hùng ƀơi ƀut plơi 6, să Dak Buk So hơmâo man pơdong amăng lŏn mơnai prong giăm 2.000 met karê. Amăng anun, pra yang hơmâo man pơdong tui sang ơi pơtao đưm hlâo adih rơhaih giăm 40 met karê. Pra yang hơmâo man pơdong 7 tal, hăng lan sang prong jum dar. Tong krah dưm pra yang hơmâo lu gơnam juăt yua mơng ơi pơtao Hùng. Rơngiao pra yang, neh met wa ăt man pơdong sang čơkă tuai, anih ngui bơrơguăt drơi jăn, anih ngui adôh suang…

Ơi Nguyễn Xuân Phúc, dŏ amăng ƀut plơi 8, să Dak Buk So, tơring glông Tuy Đức brơi thâo, mơng hrơi pok pra yang (2018), pra yang jing anih ngă yang anăp nao plơi pla ơi yă amĭ ama, djă pioh hăng tŏ tui gru grua:

“Rai pơ anai jing ataih mơng plơi pla, neh met wa akŏ pơjing khul mơnuih Phú Thọ, laih anun pơgôp prăk kak blơi lŏn hăng man pơdong pra yang pioh hơdor kơ ơi pơtao Hùng hăng lĕ anih jơnum ngui mơnuih mơnam. Ƀing gơmơi djă pioh gru gru ngă hơkrŭ mơng ơi yă, pơtô brơi ană tơčô thâo anăp nao plơi pla ơi yă amĭ ama, hơmâo pran gơgrong hăng lŏn ia ơi yă, gir run pơjing plơi pla tal dua jai hrơi pơdrong asah”.

Ƀơi kual giăm guai Dak Buk So, tong krah tơring glông Tuy Đức, pra yang ơi pơtao Hùng lĕ anih pơbưp, pơlir mơnuih mơnam. Amai Thị Chí (djuai ania M’nông) dŏ amăng ƀon Bu Ndrung, să Dak Buk So brơi thâo, ñu tui đăo khŏp, samơ̆ rĭm bơyang huă pơsat ơi pơtao, ñu lêng kơ nao tŭi ñang pioh hơdor kơ ơi pơtao Hùng ƀơi pra yang hăng bưp abih bang mơnuih ƀơi anai.

“Hơdôm hrơi ƀong tết, hrơi huă pơsat ơi pơtao Hùng Vương, kâo lêng kơ rai tŭi ñang pioh hơdor kơ ƀing ơi pơtao Hùng. Yua hơmâo pra yang, kâo hăng neh met wa amăng plơi pladưi pơlir hơbit, pơbưp ngui gru grua, adôh suang, bơrơguăt drơi jăn hăng neh met wa mơng tơring čar Phú Thọ rai hơdip bơwih ƀong ƀơi anai hăng neh met wa mơng pơkŏn dong, Abih bang hơdip mơ-ak hrŏm”.

Ơi Ngô Văn Thương, Khua jơnum min mơnuih ƀôn sang să Dak Buk So brơi thâo, mơng hrơi hơmâo pra yang, hrơi huă pơsat ơi pơtao Hùng jing hrơi ngui ngor mơ-ak ƀơi kual giăm guai anai:

“Ƀrô hrơi huă pơsat ơi pơtao Hùng, lu neh met wa amăng tơring čar, tơring glông, să hăng gưl Ping gah, gong gai ƀon lan lêng kơ rai tŭi ñang ƀing ơi pơtao Hùng. Anai lĕ gru grua hiam mơng mơnuih ƀôn sang ƀơi anai, sit biă ñu lĕ neh met wa mơng Phú Thọ rai hơdip ƀơi anai. Ƀing gơmơi lĕ să giăm guai, hơmâo lu djuai ania dŏ hơdip hrŏm, mơng anun pơgôp pơjing pran gum pơgôp djop djuai”.

Bruă man pơdong pra yang ơi pơtao Hùng mơng neh met wa ataih mơng plơi pla ơi yă amĭ ama ƀơi Dak Buk So ƀu djơ̆ kơnong kiăng djă pioh tơlơi ngă yang đôč ôh mơ̆ ăt tŏ tui gru grua ngă hơkrŭ, ngă kjăp tui pran gum pơgôp kơplah wah djop djuai ania ƀơi kual giăm guai Dap kơdư. Pra yang jing anih pơdah pran khăp “mơñum ia hơdor kơ pô klơi” hăng pơgôp djă pioh, tŏ tui hơdôm tơlơi yôm mơng gru grua djuai ania Việt Nam amăng djop rơnuk./.