Mơnuih djuai ania Jarai pơmin pơdai braih yua Yang brơi kơ ană mơnuih. Yang yơh prong hloh, ta ƀu thâo ƀuh ñu ôh, samơ̆ ñu dŏ ƀơi djŏp anih. Mơnuih djuai ania Jarai ngă pơdai tơjŭ arăng ƀu yuă, ƀu prah hăng măi ôh, arăng hơpuă hăng tơngan. Yua dah gơñu lăi bruă yuă, hơprah pơdai lĕ ngă pơdai ruă, jing Yang ñu ruă mơn. Amai H’Uyên Niê, Kơ-iăng khua đah kơmơi să Ia Mơ Nông, tơring glông Čư̆ Păh, tơring čar Gia Lai brơi thâo:“Tui hăng tơlơi phiăn Jarai lĕ đah kơmơi khŏm thâo tăp pơdai, hyu sem djuh sô̆ ia, mơñam mrai. Khŏm thâo ngă bruă anun kah mơ̆ng dưi dŏ rơkơi. Ƀing đah kơmơi yơh pô bơwih bơwang, bơ đah rơkơi ñu ngă bruă kơtrâ̆o ƀiă”.

Kiăng hơmâo asar braih, lơ̆m djuai ania Yuan ñu mă rơsung wơ̆t pơdar, rơsung tăp pơdai, hơmâo rơ-i, čơngua, hăng djuai ania Jarai kiăng hơmâo rơsung hlâo hăng čơngua đôč yơh. Anai jing gơnam juăt ƀuh, juăt hơmâo ƀing đah kơmơi mă yua laih. Yua hnun mơn, lơ̆m đah kơmơi Jarai dŏ rơkơi, trun dŏ hơjăn, rơsung hlâo ăt jing pơnŭ pơnang amăng sang anŏ pơpha brơi kơ đah kơmơi mơn. amai Rơ Châm H’Xuyết brơi thâo:“Tăp pơdai hơmâo mơ̆ng đưm hlâo laih, ƀing đah kơmơi đôč juăt tăp, anet prong lêng kơ thâo tăp pơdai adơi braih soh. Ta kiăng tăp pơdai lĕ khŏm hơmâo rơsung hơmâo hlâo. Ƀing dra khŏm rơguăt tơngan. Tăp pơdai ta yua rơsung anet prong tui hluai kơ sang anŏ gơñu pơkra mơn”.

Rơsung tăp pơdai hơmâo pơkra mơ̆ng kyâo prong, khoer dlăm biă. Hlâo hai pơkra mơ̆ng kyâo glông tơpă, tong krah lăp tơngan ta apăn, gah anăp prong ƀiă, gah tlôn anet ƀiă. Ta kiăng tăp tañ, arăng tăp dua čô, dua ƀĕ hlâo, ha čô yong ha čô tăp, yong đĭ yong trun hnun yơh. Amai Siu Thỏi dŏ ƀơi să Ia Mơ Nông, tơring glông Čư̆ Păh, Gia Lai brơi thâo:“Tăp tañ ta kiăng 2 čô. Rơsung ta ruah rơsung prong, kjăp, hlâo hai tui anun mơn. Tăp 10kg pơdai sui 2 mông. Ƀing đah rơkơi ăt thâo tăp pơdai mơn samơ̆ ƀu thâo tơpoi, hơdoi braih tui hăng ƀing đah kơmơi ôh”.

Lơ̆m tăp pơdai, arăng pioh pơdai amăng rơsung, mă hlâo akŏ anet tăp tơpok hĭ kơđuh pơdai, ta lăi hơkam, tơdơi kơ anun pơdar akŏ prong či tăp kiăng braih kô̆ pôh. Arăng yong đĭ plĕ trun hlâo djơ̆ lăp biă, kiăng kơđuh pơdai ñu tơpok mơ̆ huăi ngă săn braih, braih ñu kô̆ hiam biă. Amai Rơ Châm Hà, dŏ ƀơi să Ia Mơ Nông, tơring glông Čư̆ Păh, tơring čar Gia Lai brơi thâo:“Blung a ta tăp kiăng tơkloh hơkam, tal dua ta hơdoi hĭ hơkam, pơdai aka ƀu tơpok, tal 3 ta tăp kiăng hơmâo braih. Juăt ñu hơmâo 2 čô gum tăp kiăng tañ. Ha čô djă sa ƀĕ hlâo, tui hluai kơ pran ta mơn. Ƀing tha juăt mă hlâo anet, ƀing čơđai ƀiă mă hlâo prong. Ha wơ̆t tăp ta dưi tăp 3 -4 kg pơdai".

Tơdơi kơ tăp pơdai giong, ƀing đah kơmơi ñu tơpoi hơdoi pơdai yơh. Gơñu ƀu kiăng mă rơ-i ƀrơn či lai pơdai ôh, gơñu mă čơngua či hơdoi. Amai Rơ Châm H’Xuyên ƀơi să Ia Mơ Nông, tơring glông Čư̆ Păh, tơring čar Gia Lai brơi thâo:“Ƀing đah kơmơi prôk tơgŭ mơ̆ng 4 mông mơguah či tăp pơdai. Tăp giong lĕ tơpoi hơdoi braih giong anun tăp glăi ha wơ̆t dong. Tal dua kah mơ̆ng hơmâo braih, hơdoi dua wơ̆t mơn”.

Rơnuk anai hơmâo măi mok baih huăi glêh đơi dong tah. Samơ̆, truh hrơi ngui ngor ngă yang, ƀudah čơkă tuai, hơdôm boh plơi hmư̆ dong yơh jua tăp pơdai, mut hrŏm hăng jua čing mơak biă. Jua mơñi anai pơjing rai sa anih gru grua ia iŏm hiam kual Dap Kơdư./.