Amăng hrơi mông dik dak mơng tơlơi adôh suang hăng atông gông brô̆ tui gru grua Lao, mơnuih ƀôn sang hăng tuai čuă ngui dưi nao lăng hơdôm tơlơi ngui anun lĕ atông čing hơgor, atông đing trơng, đing poh hăng tơlơi suang Lăm vông, pơƀuh hơdôm eng ao djuai ania pô hăng anăn “Hương sắc cao nguyên”. Hơdôm tơlơi ayun suang anun lĕ Bơnga hiam Chăm pa, Sao Ken Fai, Sa La Vắn, I Kơng Đươn Đao…jak iâu tuai čuă ngui mut hrŏm hăng tơdăm dra Lao.

Hrŏm hăng anun lĕ mông rơsăi ia yôm phăn kiăng rơgao hĭ bơyan không phang, iâu hơjan pruih brơi djop mơta ria mơnong bluh đĭ. Anai ăt lĕ sa tơlơi ngă yang pơdah tơlơi pơpŭ mơng mơnuih Lao, čang rơmang amra rao rơgoh hơdôm tơlơi sat răm hăng čơkă mă tơlơi hiam klă, yâo mơ-ak amăng thun phrâo.

Nao pơ Dak Lak čuă ngui amăng bơyan ngă lơphet anai, ayong Đỗ Hoàng Việt, dŏ ƀơi tơring čar Phú Yên brơi thâo:

“Hrơi anai ƀing gơmơi hok mơ-ak biă mă lơm mut hrŏm jơlan hơdră ngui rơsăi ia mơng mơnuih djuai ania Lao dŏ hơdip ƀơi Ƀuôn Đôn, tơring čar Dak Lak. Kâo ƀuh ƀơi Dak Lak hiam biă mă, anai lĕ sa amăng hơdôm anih čuă ngui pơhưč lu mơnuih, sit biă ñu lĕ tuai mơng kual ter hang ia rơsĭ anun lĕ Phú Yên, Bình Định.

Ngui rơsăi ia hăng čuă lăng gru grua Lao lĕ sa amăng hơdôm bruă mă gru grua pơphun ƀơi Dak Lak ƀrô tal hơdor glăi 50 thun rơngai lŏn ia. Yă Nguyễn Lê Thanh Thảo, ding kơna khul pơphun brơi thâo:

“Ƀing gơmơi ruah hơdôm tơlơi ngui ngor mơ-ak, yôm hloh kiăng lăi pơthâo brơi mơnuih ƀôn sang Dak Lak hăng tuai čuă ngui. Anai ăt lĕ sa amăng hơdôm bruă mă mơ̆ mơnuih ƀôn sang hăng tuai čuă ngui dưi mut hrŏm hăng ngui hrŏm, ƀu djơ̆ kơnong nao lăng đôč ôh mơ̆ ăt dưi mut hrŏm amăng hơdôm tơlơi ngui anun, mơng anun ba glăi tơlơi hok mơ-ak hăng tơlơi kơđŏm glăi phrâo amăng bruă tuai čuă ngui ƀơi Dak Lak”.

Lu tơlơi ngui tui gru grua hơmâo pơphun tong krah plơi prong Buôn Ma Thuột hăng hơdôm boh tơring glông ƀơi Dak Lak. Gru grua djuai ania Thái, Lao hơmâo mơnuih djuai ania anun lăi pơthâo brơi tuai čuă ngui hơdôm añăm ƀong, tơlơi ayun suang, tơlơi adôh hăng tơlơi ngui ngor. Bruă pơdă prưng hơdôm gơnam OCOP; tour Rafting čeo song nan găn rơgao drai ia, tour đĭ rơdêh găn rơgao glai rưng, ia krông čroh hnoh; hrơi ngui đĭ blum prong ăt hơmâo hơdôm kual, anih čuă ngui pơphun prong biă mă.

Ƀơi Dak Lak thun anai ăt hơmâo tơlơi pơplih prong hăng jơlan hơdră ngui gru grua, adôh suang hăng tơring čar Mondulkiri (Kur) hăng jơlan hơdră ngui adôh suang Dak Lak-Phú Yên pơlir hăng ngui aka ngừ ia rơsĭ, pơhưč tơlơi mut hrŏm mơng mơnuih ƀôn sang hăng tuai čuă ngui. Ơi Đỗ Hoàng Việt, dŏ ƀơi tơring čar Phú Yên brơi thâo:

“Pơ anăp 2 boh tơring čar pơmut hrŏm yua anun ƀing gơmơi ăt kiăng hyu čuă lăng hơdôm tơlơi phrâo. Ƀing gơmơi ăt nao pơ Buôn Ma Thuột lu wŏt laih samơ̆ tal anai ƀing gơmơi nao hăng pran jua phara hăng ƀing gơmơi ƀuh hơmâo tơlơi phrâo samơ̆ ăt jê̆ giăm mơn”./.