Amăng sang phrâo man prong krên dên, rơbêh 1 klai prăk, ơi Dà Cắt Tư pơkra sa anih hiam biă, či pioh rup Wa Hồ, hră bơni djŏp tơlơi hrăm hră, mă bruă mơ̆ng sang anŏ ñu. Hip ñu pioh lu gơnam hăng hơdrôm hră, yom hloh lĕ hơdrôm hră tơlơi phiăn hăng gru grua djuai ania M’nông. Ơi Dà Cắt Tư khăp hloh lĕ hơdrôm hră “Čih ră ruai tơlơi hơdip mơda djuai ania M’nông” yua ñu hyu ĕp, čih pioh glăi amăng thun 2013, pơƀut lu mơta tơlơi kah hăng: Tơlơi adoh pơkhăp tơdăm dra, tơlơi adoh pơtưh tơdăm dra, tơlơi pơtưh, tơlơi akhan...Ñu lăi: “Mơ̆ng anet kâo hyu hrăm pơ anai pơ adih yơh. Truh kơ prong, kâo hrăm gưl prong pơ ƀôn prong Hồ Chí Minh. Yua hnun, kâo thâo hluh rơđah anŏ yom mơ̆ng tơlơi phiăn juăt mơ̆ng djua ania M’nông kah hăng Tòng, pơ̆t, ntòng, sơh hăng tơlơi pơtưh mơ̆ng djuai ania gơmơi. Tơdơi kơ hrăm giong, kâo glăi pơ plơi, hyu ĕp, čih pioh glăi tơlơi pơtưh mơ̆ng djuai ania gơmơi, čih amăng hơdrôm hră. Sang tơlơi pơplih prong hloh hăng kâo lĕ lơ̆m nao pơ Hà Nội hăng bưp Khua git gai Ping gah ơi Nguyễn Phú Trọng. Ñu pơtă ƀing hơmâo ană plơi đăo kơnang kiăng ba pơƀuh, bang hyu hloh pran jua djă pioh răk lui gru ama gru amĭ ta. Mơ̆ng anun yơh kâo gir hloh dong, pioh mông hyu čih, djă pioh hơdôm tơlơi pơtưh, tơlơi ră ruai, tơlơi akhan mơ̆ng djuai ania M’nông, čang rơmang pioh glăi kơ rơnuk tơdơi gơñu thâo, hơmâo hră či pơđok, čih hrăm tui”.

Pioh pran jua hăng bruă djă pioh, pơtrut tui anŏ yom gru grua đưm mơ̆ng djuai ania ñu, ơi Dà Cắt Tư hơmâo pơjing 2 grup čing ƀơi plơi Liêng Trang 1, plơi Dà Nhinh 1 hăng Dà Nhinh 2. Ră anai hơdôm grup čing hơmâo hrăm hăng hyu atông na nao, laih anun jai hrơi kjăp hloh; lu wơ̆t nao atông pơ plơi pla pơkŏn amăng tơring čar Lâm Đồng. Ayong Dà Cắt Ha Tiên, mơnuih amăng grup čing să Dam Rông 4, lăi:  “Ơi yă ta djă pioh, pơtô glăi gru grua yom biă mă yơh. Yua hnun ƀing gơmơi khŏm gir hrăm hăng djă pioh hŭi rơngiă hĭ gru ama grua amĭ. Grup čing gơmơi juăt nao pơplông hăng mă pri yom biă. Mơ̆ng anun gơmơi thâo hluh hloh kơ anŏ yom bruă djă pioh rak lui gru grua hiam mơ̆ng djŏp djuai ania Dap Kơdư kah hăng M’nông, K’ho”.

Kiăng djă pioh hăng pơtrut anŏ yom gru grua đưm djŏp djuai anai, phrâo rơgao, gong gai hơmâo prăp rơmet brơi nao 2 ring čing dong kơ hơdôm grup. Ơi Liêng Hót Ngát, mă bruă amăng Anom bruă gru grua să Dam Rông 3, tơring čar Lâm Đồng brơi thâo, pơ anăp, să amra akŏ pơjing lu dong grup čing ƀơi hơdôm boh plơi pla. Hăng mơnuih hor kơ bruă kah hăng ơi Dà Cắt Tư, anom bruă hơmâo ngă hră pơ-ar rơkâo Kơnuk kơna tŭ yap ñu jing nghệ nhân ưu tú. Ơi Liêng Hót Ngát brơi thâo: “Amăng să hui đôč mơ̆ng hơmâo mơnuih gir kơ bruă kah hăng ñu. Yua thâo pơhiăp tom, iâu pơthưr mơ̆ng ñu mơn, bruă atông čing mơ̆ng djuai ania M’nông, K’ho pơ anai hơmâo rŭ glăi, hơmâo atông na nao hăng kjăp tui ră anai”.

Thun anai ñu rơbêh 75 thun laih, ơi Dà Cắt Tư ƀơi să Dam Rông 4, tơring čar Lâm Đồng ăt dŏ djă pioh tơlơi adoh, jua čing, tơlơi akhan či djă pioh bơngăt jua mơ̆ng djuai ania pô. Mơ̆ng hơdrôm hră sit tơngan ñu čih pơkra truh kơ grup čing yua ñu pơjing, pơtô brơi, jing bruă tŏ tui kjăp phik amăng gru grua djŏp rơnuk. Yua gir kơ bruă hăng tơlơi thâo rơgơi kah hăng Dà Cắt Tư mơn, gru grua djuai ania M’nông ƀu kơnong hơmâo djă pioh đôč ôh ăt hơmâo tơlơi hơdip phrâo, bang hyu amăng tơlơi hơdip rơnuk phrâo./.