Ƀơi kông ti TNHH tuh pơ alin man pơdong sang Thái Bình (anom bruă pơdong ƀơi Quy Nhơn) anih hơmâo mă yua giăm 30 boh rơdêh pơđuăi hăng apui lơtrik pơgiăng hyu tuai ƀơi Quy Nhơn, bruă pel ĕp, pơplih pơkra hơmâo pok pơhai ha amăng plĕ. Ơi Hồ Thanh Khiết, Khua kông ti brơi thâo, djop rơdêh lêng kơ hơmâo pel ĕp tong ten kiăng hmao tlôn ĕp ƀuh, pơkra hĭ, pơplông rơnuk rơnua hlâo kơ mă yua pơgiăng hyu tuai.

“Kông ti hơmâo 1 grup juăt pơkra ming phara kơplah wah bơnah pơkra hăng abih bang adơi ayong. Lơm rơdêh răm amra lăi pơthâo kiăng kông ti brơi grup anai pơkra hĭ mơtăm. Tơdơi pơkra ƀu dưi amra lui mă yua hăng ba nao rơdêh pơkŏn dong. Kiăng pơhlôm rơnuk rơnua, ta kiăng ĕp lăng apui pơčrang, phai lĕ dua anih yôm hloh kiăng pơhlôm rơnuk rơnua lơm mă yua”.

Ƀơi hơdôm anom bruă pơdŭ pơgiăng pơprong bruă ngă tui hơdră pel ĕp măi mok rơdêh pơđuăi hăng apui lơtrik ăt hơmâo ngă tui khut khăt. Ơi Lê Hùng Thịnh, kơ-iăng Khua kông ti pơčruih ngăn Sun Taxi ƀơi Bình Định brơi thâo, bruă ĕp lăng măi mok hơmâo ngă tui rĭm hrơi hăng bruă pơkra ming tui tơđar ăt djơ̆ tơlơi pơkă mơn.

“Amăng hơdôm hrơi pơgiăng hyu tuai, lơm ƀing adơi ayong nao mă yua, jao rơdêh lêng kơ hơmâo grup ĕp lăng măi mok. Hăng bruă pơkra ming tui tơđar, rơdêh lêng kơ hơmâo pel ĕp glăi phai, anih mơgăt hăng gơnam măi mok pơkŏn. Ƀơi anih pơkra ming mă bruă tơhrơi kah hăng mlăm kiăng hmao tlôn pơplih pơkra lơm răm rai kiăng pơhlôm mă yua rơdêh rơnuk rơnua”.

Hăng ƀing mơnuih mơgăt rơdêh, bruă pơhlôm rơnuk rơnua brơi kơ tuai lĕ tơlơi đing nao prong hloh. Ayong Phan Tấn Duy, mơnuih mơgăt rơdêh pơđuăi hăng apui lơtrik brơi thâo, hlâo tơbiă mơng anih mă tuai, pô mơgăt amra pel ĕp djop mơta hăng pơtă ƀing tuai ngă tui djơ̆ tơlơi pơkă pơhlôm rơnuk rơnua. Ayong Phan Tấn Duy brơi thâo:

“Hlâo kơ mă yua rơdêh, pô mơgăt amra pel ĕp glăi djop apui kơđen, tơkai rơdêh, pông rơdêh; tơdah pơhlôm klă kah mơng mă yua. Lơm đuăi nao rai lêng kơ pơtă ƀing tuai bak rek, dŏ hơđong ha anih laih dong ƀu dưi đĭ lu đơi kiăng pơhlôm rơnuk rơnua brơi kơ tuai”.

Ră anai, amăng tơring čar Gia Lai hơmâo 3 boh anom bruă yua rơdêh pơđuăi hăng apui lơtrik pơgiăng hyu tuai čuă ngui hăng abih tih 119 boh rơdêh. Tui pel ĕp mơng hơdôm anom bruă bơdjơ̆ nao, hơdôm anom bruă anai lêng hơmâo hră mă yua hăng rơdêh lêng pơhlôm djop tơlơi pơkă rơnuk rơnua. Bruă gơgrong pel ĕp, pơkra ming rơdêh ƀu djơ̆ kơnong pơgôp pơhlôm rơnuk rơnua brơi kơ tuai đôč ôh mơ̆ ăt hrưn đĭ klă dong amăng bruă bơwih bơwang, pơgôp ba glăi rup rap jê̆ giăm, ngă bruă klă amăng bơwih brơi tuai čuă ngui ƀơi plơi prong hang ia rơsĭ Quy Nhơn amăng bơyan čuă ngui pơ anăp./.