Mông hrăm hră rơnuč rơwang hrơi tơjuh, lan sang hră gưl sa Tô Hiệu, phường Ea Kao, tơring čar Dak Lak dik dăk jua tơlơi ngui ngor pơhrôp glăi gru grua hiam đưm djuai ƀiă. Ƀing čơđai sang hră nao kač rup, trơ̆i pơar, bơnal kiăng pơtlep jing rup anŏ kiăng pơhmutu. Ƀơi hla pơar ƀrư̆ jing rup sang gru đưm, jing bơnga arăng mơñam amăng eng ao, abăn, rup plơi pla, tơlơi dŏ dong ƀong huă rim hrơi. Rup sang dlông, gru đưm djuai ania Êđê, gông brô̆, đing ayup dưi pơƀuh hăng gơnam ƀing čơđai pơkra ming, wơ̆t hăng tơlơi čih lăi pơthâo, pơblang brơi ƀuh ƀơi anăp lan sang hră. Amôn H Trâm Niê, čơđai sang hră anih 5E lăi:

“Kâo hor biă mă bruă mă STEM mơ̆ng anih ba pơdă yua kơ ñu lăi pơthâo gru grua hiam djuai ania Êđê. Kâo pơ-ư ang biă mă kơ gru grua hiam djuai ania ta pô, čang rơmang tơdơi adih sang hră ăt pơphun na nao tơlơi ngui ngor bruă ngă djơh hăng anai, kiăng thâo lu hloh amăng gru grua djuai ania pô”.

Dik dăk mơak klă, rơyuh teng leng mah hăng lu tơlơi tơña pơdjơ̆ nao gru grua hiam djop djuai ania kah hăng Êđê, Bơnông. Amôn Đinh Diệp Anh, čơđai sang hră anih 3A brơi thâo: tơlơi lăi glăi brơi ƀuh prăp lui tơlơi thâo kơ čơđai sang hră thâo hluh ten sang gru đưm Êđê, sang dlông, tơlơi ngă yang, čing hơgor…

“Kâo mơak biă mă, kâo dưi thâo lu hloh kơ gru grua djuai ania Êđê kah hăng sang dlông, čing hơgor, eng ao hăng tơlơi ngă yang ngui ngor gru grua đưm yom biă mă mơ̆ng djuai ania Êđê”.Tơlơi hơ̆k mơak mơ̆ng ƀing čơđai muai truh kơ ƀing amĭ ama čơđai sang hră. Ayong Lê Đình Nam, hơmâo ană ñu dŏ hrăm amăng sang hră gưl sa Tô Hiệu lăi lĕ, hăng hơdră hrăm laih anun găn rơgao djơh hăng anai hơmâo pơblih klă amăng tơlơi pơmin ƀing čơđai.

“Ƀing ană amôn hor biă mă hăng prăp lui mut hrŏm hrơi mơak STEM, glăi mơ̆ng sang hră ñu ră ruai brơi amĭ ama thâo, hrơi kač rup hơgĕt, suang tơlơi ayun suang hơgĕt hăng ƀing nai pơtô, ñu kiăng biă mă, ƀu pit đih ôh sit hơdor glăi, anun yơh amĭ ama ăt ƀuh mơak hrŏm mơ̆n hăng ană bă”.

Tui hăng nai Đoàn Thị Tuyết Yến, Khua sang hră gưl sa Tô Hiệu, sang hră hơmâo giăm 1.200 čô čơđai sang hră, amăng anun lu čơđai sang hră djuai ƀiă, bruă ngă anai hiam mơak biă mă pioh kơ čơđai sang hră ngui ngor hrŏm, hrăm tơdruă, tơña nao rai, pơhrua tui tơlơi thâo hluh hăng pơpŭ djă pioh rơnoh yom gru grua hiam đưm djuai ania.

“Anai lĕ ƀu kơnong bruă ngă hrăm gah rơngiao đôč ôh, dŏ jing anih ngui ngor mơak pioh kơ ƀing čơđai găn rơgao thâo pơčeh phrâo, ba yua boh thâo ia rơgơi STEM hơmâo hrăm laih, pơjing rai gơnam yua, rup rap gru grua Êđê, kiăng djă pioh hăng ngă bang bơngač gru hiam plơi pla”.

Ƀơi Dak Lak, lu sang hră kơnuk kơna hơmâo pơphun jơlan hơdră hrăm găn rơgao sit nik gah rơngiao mông hrăm hăng lu jơlan hơdră phara. Lơ̆m thâo pơčeh phrâo, hơduah ĕp hăng kah pơpha nao rai, ƀing čơđai thâo hluh laih anun pơ-ư ang bruă gơñu ngă, thâo kiăng djă pioh, pơlar tui gru grua hiam plơi pla. Hơdôm anah asar pơjeh anun jing atur kơ gru grua hiam kiăng djă pioh, tŏ tui bang bơngač lu amăng plơi pla ala ƀôn.