VOV4.Jarai - Amăng bruă mă hơkrŭ mơ̆ng pô, Khua mir sir Hồ Chí Minh hơmâo pioh glăi lu tơhnal lăp hơdor pioh kơ mơnuih ngă kông ñơn hăng hrơi jar kmar mă bruă lơ 1/5. Amăng bruă mă hyu ĕp jơlan pơklaih rơngai lŏn ia, lơ 1/5/1920, Nguyễn Ái Quốc hơmâo nao jơnum ngă lơphet Hrơi jar kmar mă bruă hrom hăng khul mơnuih ping gah Mơnuih mơnam Prang hăng pơđok tơlơi čih lăi pơthâo amăng mông jơnum, rơkâo brơi pơdơi mơtam mơ-it nao mơnuih nao kơtư̆ juă hơdôm dêh čar pơkŏn. Lơ 1/5/1924, tui hăng tơlơi jak iâu mơ̆ng khua git gai ping gah Moscow hăng Khul čih pioh ping gah Cộng sản jar kmar, Nguyễn Ái Quốc ngă hrom hăng đĭ pơhiăp amăng mông jơnum ngă lơphet hơdor glăi hrơi jar kmar mă bruă lơ 1/5.

Tơdơi hrơi Hơkrŭ Blan 8 truh kih, dêh čar ta rơngai, lơ 18/2/1946, Khua mir sir Hồ Chí Minh kĭ hră pơsit hrơi pơdơi Tê̆t, hrơi ngă lơphet, hrơi jơnum tơlơi đăo, amăng anun lăi: Lơ 1/5 lĕ sa amăng hơdôm hrơi sit nik, hăng kông ñơn, mơnuih mă bruă amăng dêh čar ta pơdơi ha hrơi ăt ƀong prăk apah mơn. Mơng hrơi anun, lơ 1/5 jing hrơi pơdơi sit nik rim thun mơng lŏn ia ta. Lơ 29/4/1946, Khua mir sir Hồ Chí Minh kĭ hră pơtrun mrô 56 pơsit kông ñơn dưi ƀong prăk blan mơng amăng hrơi pơdơi Jar kmar pioh kơ mơnuih mă bruă (lơ 1/5). Lơ 1/5/1946, tal blung a amăng dêh čar ta, Hrơi pioh kơ mơnuih bruă mă lơ 1/5 hơmâo pơphun jơnum prong ƀơi Hà Nội, hơmâo 200 rơbâo čô mơnuih mơnuih mă bruă.

Siu H’Mai - Nay Jek: Pơblang