VOV4.Jarai - Tlam lơ 26/4, Grup khua mơng Jơnum min djŏp djuai ania mơnuih mơnam Việt Nam yua yă Trương Thị Ngọc Ánh - Kơ-iăng khua Jơnum min djŏp djuai ania mơnuih mơnam Việt Nam ngă Khua grup nao pel ĕp, krăp lăng bruă prăp lui ruah Khua pơ ala mơnuih ƀon sang dêh čar tal 15 hăng Khua Jơnum min pơ ala mơnuih ƀon sang djŏp gưl, rơwang thun 2021-2026 ƀơi tơring čar Bạc Liêu. Yap truh ră anai, Jơnum min ruah khua djŏp gưl amăng tơring čar hơmâo pơsit hăng lăi pơthâo anih plĕ hră, hră čih anăn hơdôm anom bruă, mrô khua hơmâo ruah ƀơi rim anom bruă. Truh ră anai, mrô mơnuih nao plĕ hră amăng tơring čar hơmâo kơđŏm pơsit rơbêh 611.700 čô mơnuih, abih bang kual plĕ hră ruah khua pơ ala mơnuih ƀon sang dêh čar tal 15 hăng khua jơnum min pơ ala mơnuih ƀon sang djŏp gưl rơwang thun 2021-2026 lĕ 551 boh anih...Pơhiăp ƀơi mông ngă bruă, yă Trương Thị Ngọc Ánh - Kơ-iăng khua Jơnum min djŏp djuai ania mơnuih mơnam Việt Nam git gai: Mơng hrơi anai truh hrơi ruah khua, tơring čar Bạc Liêu pơƀut hyu pơtô pơblang kiăng mơnuih ƀon sang thâo hluh dlăm hloh kơ tơlơi dưi, bruă kiăng ngă mơng sa čô mơnuih nao plĕ hră, tơlơi yôm mơng bruă ruah khua.

Siu H’Mai: Pơblang