VOV4.Jarai - Tom brơi lơ 14/5, ơi Bùi Văn Cường, ding kơna Ping gah, Khua anom bruă Pơ ala mơnuih ƀon sang dêh čar, Khua čih pioh Ƀirô khua pơ ala mơnuih ƀon sang ngă khua grup wai lăng bruă ruah khua mơng Jơnum min ruah khua hơmâo mông ngă bruă hăng Ping gah tơring čar Gia Lai, Kon Tum kơ bruă ruah khua pơ ala mơnuih ƀon sang dêh čar tal 15 hăng khua pơ ala mơnuih ƀon sang djŏp gưl rơwang thun 2021-2026. Ƀơi Gia Lai, truh ră anai, tơring čar hơmâo pơphun 17 wơ̆t brơi ƀing tơbiă anăn ngă khua pơ ala mơnuih ƀon sang tal 15 hăng mơnuih ƀon sang pơbưp nao rai, 155 anih pơbưp kơplah wah mơnuih ƀon sang hăng ƀing tơbiă anăn ngă khua pơ ala mơnuih ƀon sang tơring čar rơwang thun 2021-2026. Hăng sa anih hơmâo lu mơnuih ƀon sang djuai ƀiă, Jơnum min ruah khua djŏp gưl tơring čar Gia Lai gơñăm nao bruă pôr pơthâo kơ abih bang ană plơi pla, ngă tui hơdră pơgang klin Covid-19, pơhlôm rơnuk rơnua kơ mông plĕ hră.

Ƀơi Kon Tum, Jơnum min ruah khua tơring čar hơmâo ngă klă tơlơi pơtrun ruah khua mơng Kơnuk kơna, hăng tui tơlơi phiăn. Ơi Bùi Văn Cường lăi, hơdôm boh tơring čar kual Pơngŏ Dap Kơdư kiăng pơtŏp rơguăt bruă, jao bruă rơđah rơđông kơ ƀing djru bruă ruah khua hăng him hlâo, prăp lui hlâo pơsir djŏp tơlơi truh tơdah hơmâo.

Siu H’Mai: Pơblang